Liebi Truurfamilie, liebi Truurgmeind, Es isch für mich e grossi Ehr, das ich a dere Stell – im Name vo allne awesende SchützeKameradinne und –Kamerade es paar Wort über de verstorbeni Ernst Osterwalder dörf a Sie richte. 1972 – alässlich de Fusion vo de beide Schützevereine Hirslande und Riesbach isch under de wenige, verblibene Riesbächler Schütze au de Ernst Osterwalder zu eus gstosse und mer händ scho gli gmerkt, dass mer mit em Ernst nöd nur en grosse Schütz, sondern au en hilfsbereite Kamerad übercho händ. Er hät sich nämli au grad in Vorstand wähle lah. Mit allne Waffe – vom Karabiner über Pistole bis zur Armbrust – sind Spitze-Resultat sini Norm gsi. Denäbe hätt er aber au immer Ziit gfunde, weniger guete Schütze bizstah und über dene iri Erfolg hät er sich ebeso chöne freue, wie über di eigene. A kantonale oder Eidgenössische Aläss händ immer alli Schütze vo sim Organisationstalänt chöne profitiere. Au i fremde Schüss-Ständ isch de Ernst de Standchef gsi und mir händ au oni Rangeur chöne Schiibe belege. Churz vor sim 80. Geburtstag hät de Ernst mit eme Schribe an Euse Presidänt sin Rücktritt als Schützemeischter us em Vorstand akünnt. Ich zitiere us dem Schribe: „Geschätzte Mitglieder Mit dem heutigen Datum möchte ich meinen Rücktritt als Schützenmeister aus dem Vorstand bekannt geben. In meinem Alter von bald 80 Jahren, ist eine Aenderung sicher angebracht. Der Computer, die Schreiberei und stetes Präsent sein, macht mir zu schaffen. Das Schiessen geht zur Zeit noch ganz gut, aber wie lange noch ? Bitte lasst mich abtreten, so lange ich noch Freude am geliebten Schiess-Sport habe, gönnt mir etwas ruhigere Stunden. Das ESF Frauenfeld soll der würdige Abschluss meiner langen Vorstandszeit sein, in der ich zusammen mit meinen Kameraden so manche Lorbeeren ernten konnte. Besten Dank“ En ganz Grosse vo eusem Verein isch also nach fascht 40jähriger Vorstandstätigkeit als Schützemeischter zruggträtte um sich no espaar rühigeri Jöörli z’gönne und hätt sich debii no fascht entschuldiget.. Di rühigere Jöörli händ aber nöd lang duured, dänn 2008 hät euse Verein sis 125jährige Bestehe chöne fiire. Und wär hät sich mit Elan fürs Organisations-Komitee gmäldet ? Natürli, de Ernst Osterwalder ! Für dä Vereinshöhepunkt hätt er nomal welle a d’Säck. Immer meh Verein verschwindet hüt vo de Bildflächi will mer scho na gern s’Agebot vom Verein wetti konsumiere aber ja käs Aemtli übernäh. Und Type wie de Ernst Osterwalder werded au immer seltener. Wänn du mich na ghörsch, liebe Ernst: Du häsch dini letschti Reis aträtte und mir werded dich vermisse ! Mir danked Dir für Din grosse Isatz im Verein und vor allem für dini Kameradschaft über all die Jaar. Mer werded Dich in dankbarer Erinnerig bhalte. Hans Daetwyler
© Copyright 2025 ExpyDoc
