Min Name isch Schnupftruckli, guete Abig mitenand. Min Künschtlername isch „Black & White“, bekannt wiit umenand. Im Gägesatz zu „Black & Blond“, ich wett das na betone, Zeig ich kei Füdli, nei ich han Füdli, und tues au na vertone. Mit Karikature cha me ja scho einiges aarichte, vo Volksufschtänd im Nahe Oschte tüend d Medie vill brichte. Öisi Fasnachtsplakette zeigt nöd de Mohammed us em Oschte, die chasch hüt z Abig, Ehrewort, mit ruhigem Gwüsse poschte. D CVP hät da en eigni Sicht, wie üblich, akzentuiert, De Fillipo Lomabardi, natürli z Fuess, hätt ganz fescht interveniert. Wänn d Moslem ietz dänn sini Fahne verbränned, tüends nöd vill studiere Dänn wännd d Fahne vom Lombardi verbränsch, tuet si sicher explodiere. Nordic Walking isch ietz in, gsehsch immer me vo däne, mit zwee Stöck und Chappe dur öises Dörfli ränne. Ich mach das nie chasch sicher si, dänn das stört mich am meischte: Dänn meined sicher alli Lüüt, chönn mir kei Schi me leitschte. Am Personalabig vo de Gmeind tüends gmüetli Raclette brutzle, mit mindeschtens 10 Öfeli, bis d Sicherig tuet butze. Plötzli isch s ganz dunkel und s lüüted s Telifoon: Am andre Ändi schreit de Benedikt Weibel: Mir fählt scho wieder Strom. „Heil Hitler“ tönt’s ganz Luut vom Rütli am letschte 1. August, Glatzchöpf sind deete uufmarschiert, für die Fiir scho en Verluscht. Wänn de Samichlaus en Chnopf uf de Schooss nimmt chunnt er scho gli i d Chischte, aber die Nazis wärdet na nett heibegleitet vo hundert Polizischte… Mini Alt isch wieder mal, bi Tag und au bi Nacht nöd guet druff und schüüli muff, und das a de Fasnacht, Si heigi en Häxeschuss, und das tuet ja bekanntlich weh. Da hät wenigschtens eine e mene Liide mal en gschiide Name gäh. De Beat Ladner isch nöd grad en Fan vo CU West, defür vo Fuessball, drum pusht er au de FC Uetike ganz fescht. Ietz chum ich langsam druus was ihm d Fröid a dem Projekt tuet versoue: Er würdi doch vill lieber deet une es Fuessballstadion boue. Im Dezämber bin ich, wie scho lang, für d Chinde goge Chlause, en Chliine seit: Hoi Schnupftruckli, machsch eigentli nie Pause? Ich han en dänn uf de Schoos gnah, und woni wieder bi verwacht, Hät s Überfallkommando grad d Gittertüür hinder mir zue gmacht. En Zwäckverband de isch verzwickt hätt de Bohli au erfahre, nur wägem Stutz seit niemer ja, d Situation isch ietz verfahre. Und d Moral vo dere Gschicht: Mit de Füürwehr cham me dänn nöd gspasse, die lösched nöd nume sondern chönd au ordli Füür undrem Füdli mache. D Antänne Rebälle übernämed ietz dänn die reformierti Chilepfläg, öb das guet chunnt, wer weiss, oder isch s villicht de falschi Wäg? Die wellet d Wiehnachtsbelüüchtig vo de Bahnhofstrass grad nach de Wahle, uf Uetike hole, die teigi bekanntli nöd e so fescht strahle… Rusterholz und Rusterholz, das heisst für mich nur eis: Guete Service, Finanzkompetänz, i de Bank und Gwärblerbeiz I dem Alter scho ufhöre chasch nume wänd öppis häsch studiert, und i de Garage scho es Ziitli en guete Ferrari häsch parkiert. Und wänds dänn für de Pfänninger im erschte Wahlgang nöd sött lange, muess sini Partei no lang, lang nöd um de zweit Sitz bange. Wänn sich das abzeichne sött, git s e Gheimwaffe, so quasi d SVP-Uzi: Dänn bringets sicher, s würd mi nöd erstuune, de Toni Bortoluzzi. Falls de Ueli Egli gwählt wird, inere Wuche tümers wüsse, frögt er sich natürli, und das mit guetem Gwüsse. Welles Ressort gänz mer ächt, s git Variante noch und nöcher, d Finanze, klar, als Zahnarzt kännt er sich beschtens uus mit Löcher. De Tenniskönig Federer isch würkli phänomenal, de spillt und gwünnt, da würked die andre scho echli banal. Wieso hüüled de nach iedem Sieg, de laat doch susch nöd lugg? Isch doch klar, de weiss, ietz muess er wieder uf Basel zrugg. Mini Handorlge liit nach de Fasnacht für es Jaar im Egge, tuet so ganz langsam aber sicher zimmli Staub aasetze. Drum bin i gar nöd sicher öb ich hüt dörf musiziere, oder tuet si für de Leueberger scho zvill Fiinstaub produziere? Habemus Präsidiam, inere Wuche hät s Warte es Änd mir händ au für die nöchschte 4 Jaar wieder en nette Presidänt. S lauft ab wie z Rom, all tüend im Gmeindshuus nervös scho umegumpe, wiisse Rauch, hurra de Hänggi raucht sin Sieger-Presi-Stumpe. Läck d Zyt die lauft ja wie verruckt, ich muess scho wieder springe, de nöchschte Beiz die frohi Fasnachts-Botschaft überbringe. Ich chume wider imene Jaar, das isch, zur Orientierig, z Uetike Zyt vonere Schuelhuusiiweihig bis zur nöchschte Schuelhuusprojektierig…
© Copyright 2024 ExpyDoc