Hauptversammlung vom 18. März 2015 Jahresbericht 2014 des Präsidenten – dieses Jahr mal in Reimen In chronologischer Reihenfolge der Ereignisse: Für mehr Sicherheit im Quartier: das Projekt Augenhöhe ein Meter zwanzig Chinder unterwägs als Detektiv Da isch denn nöd öpe primitiv De Vechehr hend’s onder d’Lupe gno Saugueti Vorschläg sind usecho Di einte sind scho realisiert Die andere uf enere Wartelischte fixiert Der neue Kreisel am Spisertor En Chreisel söll de läschtig Stau vetriiebe ‚S Spisertor isch ä wichtigi Dreischiiebe Zor Spisergass, zor Mühlegg, zom Lämmlisbronn, zum Burggrabe und is Lisebüel D’ Velofahrer ond dene z’Fuess loot da wäred em Bau nöd chüel ‚S Resultat – da dörf me do luut säge Isch guet usecho ond förs Quartier en Säge Alle Jahre wieder: die Brunnenfasnacht Am Fasnachtsfriitig vor em Bronne zo Eere vom Johann Linder Spieled Gogge, geht’s Glüewii, Brodwöörscht ond Punsch för Chinder Dank em Niklaus Staerkle ond wiitere Sponsore D’Schtiftä vo Lendemaa und Jenny sind auserkoore Da Bronnewonder zor Freud vo allnä Zmetzt im Winter zom sprodlä z’bringä Probieren über studieren: der Quartierstamm Elf Mool hät de Quartierverein iigladä ‚S isch wärt gsii, so en Monätstreff uuszprobierä Cho send im Schnitt drü bis vier Lüüt zom Stammtisch Im Moment isches kei Bedürfnis, simmer realis-tisch 2 Lesebiene: die kleinste Hol-Bring-Bücherei in der Stadt St. Gallen Vo dä Telefonkabine zor Läsebiene Alltag offä sächzä Stond ond im Joor drühondertföfesechzg Tääg D’Hol-Bring-Büecherei lauft choge guet ond isch öpe kein Gääg Danke dä Oberbiene Ruth und dä Rosy vom Kiosk vis-a-vi niederschwälligi Kultur mit tolle Büecher: da isch Sonneschii Die Hafnerstrasse hat nun einen richtigen Spielplatz ‚S Gartebauamt hät de Spielplatz a dä Hafnerstross saniert E Muetter mit Chind isch wäred de Erneuerig verbii spaziert Hätt gfrooged, öb men nöd e Rutschbaan chönnt anemache ‚S isch beiidruckend ond öppe nöd zom Lache ‚D Stadt hät de Wunsch unkompliziert entgäge gnoo Zwo Monet spööter: mit dem Spielplatz sind alli Familiä froo Gemeinschaft im Quartier: das Wiesenfest Bi beschtem Wätter auf de Schülerhuuswiesä ‚S traditionelle Quartierfäscht – it ue nöd öbertriebä Dank dä Yvonne und äm Chris Haute Cuisine zo chlinem Priis För d’ Chind en läässe Slalomparcours För d’Erwachsenä es Wiili ond Musig wiä z’Bad Ragaz i de Kur Der verschwundene Briefkasten E Poscht im Lisebüel hemmer schon e paar Joor keini mee De Briefkaschte bim Reschti Bauhoof, hesch gsee Sit de Sommerferiä isch au dä niene mee Dä Präsident seggled vo Pontius zu Pilatus Poscht seit: es heb zwenig Brieäf ghaa – wer’s globt, wird seelig De Chaschtä hanged gottseidank wieder: ond Brief hät’s nöd zweenig. Rauchen im Fumoir anstatt auf dem Trottoir ‚D Raucherinne und Raucher sind verosse vor em Gassechücheli Chonsch fascht nöd dra verbii, ufem Trottoir ond zom Cappelelli Sit em Sommer noch em Ombau händ’s es Fümoir mit enerä Schiibe: damit nöd ine gseesch, fascht noir 3 Werbung fürs Figurentheater E neuis Team managed ‚s Figuretheater im Lämmlisbronn Im Quartier simmer stolz: Kultur macht nöd domm För Chind ond Erwachseni isch da e bsonderi Kunschtsparte Zäme mache mer en Aktion mit verbilligtä Iitrittscharte Leider händ nöd viel dervo wölle profitierä Es isch wiä bim Quartierschtamm: muesch es uusprobierä Fondueplausch und Samichlaus Fondueplausch und Samichlaus, musch wärbe ond use posunä Figugegl : Fondue isch guet ond get e gueti Luunä Santi niggi näggi – henderem Ofe stäggi De Susanne, de Ute, em Klaus-Georg, de Trix und em Sankt Nikolaus Dene Vier und au allne andere Engagierte im Quartier: Dankä mit emene chräftige Applaus Dem verstorbenen Stadtrat Erich Ziltener ein Dankeschön Hüt hett’s statt de grüenä Schülerhuuswisä E Doppel-Tornhalle ond e Tüüfgarage ufgrond enere Kantons-Expertisä ‚D Nochberi Brigitte rennt zum Bauvorschtand i sini Sprechstond E paar Monet spööter diä gueti ond öberraschendi Chond ‚D Wisä dörf bliibe, d‘ Stadt hät de Kantonsaateil poschtet ‚S schräägste Fussballfäld vo de Wält hät halt es bitzeli koschtet Quartierzeitung: Ein Chefredaktor nimmt seinen Hut De Chefredakter Bruno Ludescher Hüüfig mit Huet: es isch en gang ganz fescher Hätt mit sim Redaktionsteam vil Joor ganzi Arbet botte Jetzt wött er echli chörzer trätte ond Gitarre spiele durante la notte ‚D Nochfolgeri isch d‘ Mareike Klee – üsi neu Quartierziitig-Fee Last but not least: der Quartiervereinsvorstand und die Kontaktpersonen Wa wär de Quartierverein oni Vorstand Worschinli e lami Ente oni Verstand Wo mösst me sech anewende mit Frooge ond Problem Hett’s nöd Kontaktpersonä wo schaffed ganz extrem Im Name vo eu allne sägi Dangge villmool Da wär de Jooresbricht gsi: bis zom nöchste Mool St.Gallen, im Südostquartier | 18. März 2015 | Patrick Roth, Präsident Quartierverein Südost
© Copyright 2024 ExpyDoc
