Zwiegespraech 2016

Zwiegespräch Optimist / Pessimist 2016
P
Ohjerom, ohjerom dia Fasnet hot a Loch
ond hot koi bissle Geld em Sack
zom a Päckle Schnupftaback
ohjerom, ohjerom dia Fasnet hot a Loch
O
Oh mein Freund was isch den los
was machsch den für a Gsicht na blos
P
Ha hosch den du des net kapiert
was do grad eba isch passiert?
O
Ha doch dia Narra hen grad eba
für des Johr ihren Abschied geba
P
Des isch was mi so traurig macht
a Schand das dei Gsicht weiterlacht
O
Mein Pesimist, ja Menschenskind
es gibt koi Fasnet ohne End
des isch no lang koin Grond zom Schreia
ma ka sich jo scho uf die nächst Fasnet freia
P
Des isch bei mir no net so klar
wenn i dra denk was des Johr wieder älles war
wie emmer glei am fufta Januar
trifft sich zom Abstauba die ganze Narrenschar
au des Jahr wars mol wieder soweit
in da Burg hend troffa sich die Leut
zur Tradition isch des scho grota
onderm Häs a paar Prominente zu errota
dozu braucht ma d Narrenkleider ond zwar alle
doch desmol war des eine Falle
da Optimist und Pessimist send natürlich au dabei
beim Azieha vo de Promis dann an lauta Schrei
des kennet mir doch ned so lassa
dabei send do zwei Optimista-Masken
O
Brocht hat die a Weckles-Verkäufere a Gute
onserm Zunftmeister sei Frau, sei geliebte Trude
was hot die sich do blos wieder denkt
wahrscheinlich hot se s Hirn net arg verenkt
vielleicht war ihr des Maskaglomp au wurscht
weil se an d Burg denkt hot und an ihran Durscht
des isch s Problem, em Alter muss ma s büsa
Alzheimer lässt do scho manchmol grüßa
drom Trude tu de net geniera
gang wie dein Ma en d Volkshochschul dei Hirn trainiera
des macht halt au blos Sinn, wenn en deim Grend
no a paar Hirnzella vorhanda send
P
Bei dr Narraparty en Bergfelda
dort gab's so manche Sulzer Helda
zwei Narrarät laufet uff dr Bus direkt aus dr Bar
se waret beide em Kopf no fascht ganz klar
beim Eisteiga zom hoimfahra war d Stimmung famos
so fährt dr Bus dann au glei los
ond weil die Fahrt noch Sulz isch furchbar lang
krieget die zwei an durstiga Drang
sie laufet em Bus vor bis fascht zur Tür
denn em Kühlschrank do hots no Bier
Ond weil do s Mikrofon isch net weit fort
ergreift dr Thomas Kopp au glei das Wort
em Achim Rebholz tut des so gefalla
dass er do nei will au was lalla
die Narraschar denkt muss des jetzt sei
do fährt dr Bus in eine Linkskurv nei
ond plötzlich wirkt die Fliehkraft Wonder
wirft beide Laller en dr Fußraum nonder
und die Moral von der Geschicht
üb bei Kurven freie Rede nicht
P
Bei dr gleicha Party en Bergfelda
gab es aber noch so an grüna Helda
da Narrenrat Hubert isch an bsondra Held
der guckt, dass d Narrazunft hot emmer Geld
en da Dickeberghalle hot er ganz gschwärm
von da Narrenzunft "24 Höf" die er hot kennaglernt
des Narrenkleid hot er zwar überhaupt ned kennt
doch oine isch da ganz Obend om ehn rom grennt
uff da Bahnhof noch Sulz sodet die heut no komma
da Hubert hot se em Narrabus mit ronder gnomma
ganz om a sonscht isch die Fahrt aber ned passiert
da Hubert hot dem Narr nähmlich s Busgeld kassiert
doch gnuag hot er von dera aber no lang ned ghet
ond hot die ens Roma no mit nei geschleppt
sie hot au braucha net viel saga
er hot sie glei zom Getränk eiglada
O
En seim Hirn ehn tut no äbbes bloga
soll i se vielleicht glei no donoch froga
beim Ringtreffa send no a paar Arbeitsdienste frei
frogt ond teilt die Närrin glei zom schaffa ei
da Hubert goht hoim, es war an Erfolg
plötzlich merkt er, er wird verfolgt
es war die Närrin, die lässt ehn net los
wo möglich will die was, vielleicht uff mein Schoß
em Hubert wird’s uff oimal ganz flau
denn onder dem Häs steckt jo a fremde Frau
dahoam akomma, was mach i jetzt blos
wie breng i die Närrin blos wieder los
die lässt plötzlich ihr Maske falla
onser Hubert isch fascht en Ohmacht gfalla
dr Schreck sitzt ganz tief en seim Leib
onder dem Narr steckt sei eiges Weib
für oins muss ma onsern Hubert loba
bis heut hot sich sein guta Gschmack no net verschoba
P
An da Fasnet, des wisset älle Kender
do isch meistens emmer Winter
aber net jeder Sulzer Narr hot des gschnallt
dass es do manchmol wird’s halt kalt
so isch s au beim Umzug en Aistaig gsai
do war au so an langbeiniga Narrarot dabei
vor am Umzug hot er scho die Minuta zählt
weil er sich mit dr bleda Kälte quält
o Frau mi frierts an d Fiaß, Mensch Maier
des zieht scho nuff bis fascht an d … Knie
O
Sei Frau die moint, om Schäda zu vermeida
sollsch du, mein Mann nicht länger leida
sie greift en Korb, des isch was netts
für deine Fiaß hab ich dir Wärme-Päts
dr Sülzle stahlt, legt's en dr Schuh drenei
des wohlig warme breitet aus sich glei
so gwärmt kann er dr Omzug laufa
ond drondertnei au kalte Schnäpsle saufa
oin Nochteil hots, des sag i ogeniert
bei Wärme wird dr Schwoißfuß generiert
do gibt es dann stenkige Füß ond Socka halt
emmer no besser, wie wenn dir send die Hoda kalt
P
Bewegung hält au Narra fit ond xond
drom goht d Mänteles Ursel morgens mit am Hond
vor drei Wocha gabs viel Schnee
die Ursel moint des isch jo scheh
der hohe Schnee macht sie ganz wuschi
der reicht ihr fascht bis an die …
... noi, bis an die Knie
drom zieht se a sich ihre Langlaufski
denn mit so Brettle an de Stotza
kasch du dem Schnee doch sehr guat trotza
O
Onterwegs trifft se die Kitzlingers Sabine
au an Narr der achtet uff sei Linie
die secht so Langlaufski die haltet fit
wart i hol gschwend meine ond lauf mit
zehn Minuta später, sieht ma selle zwei
wie elegant se gleitet durch dr Schnai
dr Hond hopst lustig nebaher
blos die Sabine die hots schwer
mit dr Ursel kommt se fascht net mit
macht zwei Schritt vor ond oin zurück
die Ursel siehts ond lacht, d Sabine lauscht
du hosch die Langlauf- mit de Abfahrtski vertauscht
P
Die Stadtverwaltung Sulz, schnucklig ond klei
isch wie die NZ Sulz dr gleiche Narraverei
am ersta Januar im Backsteinbau glei
gabs das Neujahrs-Konzert edel ond fei
do isch älles vo Rang und Nama dabei
drom derf au s Programmheft in hochglanz sei
ond weil koiner musikalisch bled will sei
schaut do natürlich jeder drenei
O
im Feber das nächste Highlight kommt glei
des isch dr Zunftball a große Narretei
au do isch die ganz närrisch Prominenz dabei
ond die Speiskart isch bunt und vierseitig gsai
guggsch du en Speiskart ond Programmheft gnauer nei
send do die gleiche Hirnies am schreiba gsai
warscheinlich waret die en dr Schul scho henda drai
statt 2016 schreibet die groß ond fett 2015 do nei
do fällt mir für Zunft ond Verwaltung no ei
älles Narra die net emmer hend s Hirn dabei
P
Bei da Sulzer Hexa isch emmer was los
des goht scho vor dr Fasnet los
für die schwarze Hexabesa wo die hend
machet die scho zom Stecka brenna an Event
ma trifft sich en Vöhringa bei dr Hexe Schneider
do pfleget se ihre Besa, noi net ihre Weiber
zu so ra Besaprob ghört au reichlich zom trenka
ond die Flugversuche endet meischt uff am Zenka
O
So gut grüschtet könnet die Omzüg komma
wo dr Hexawaga wird meischt mitgenomma
blos en Aistaig do war der net drbei
laut Hexa gabs do zu viel Schnai
aber net auf de Sroßa, weil do war sauber graimt
nur vor dr Halle wo der drinstoht hot ma s versaimt
also ohne Hexawaga war ma en Aistag blos dronda
weil sich zom Schnee raima koi Hex hot gfonda
P
Aber in Denkinga wo isch s Ringtreffa gsai
do war dr Hexawaga wieder dabei
do hot dann beim Hexavater was net gstemmt
der isch mit ma halblebiga Hexavater-Stecka romgrennt
normal isch der oba mit zwei Hexaköpf verziert
ond vo dene isch oiner ronder ghaglet ogeniert
O
Wenn i die Hexagschichtle grad so hör
fällt mir a Zusammafassung gar net schwer
onsre Hexa saufet sich ihre Besa grom
laufet oft kopflos em Omzug rom
ond Schnee schippa muss a Fremdwort sei
do fällt mir außer lacha nix me ei
P
Jo dai Gsicht des duat blos lacha
obwohl des send fai ernschte Sacha
O
Oh sei doch froh, dass i no lacha ka
ond hör zum Schluß mein Wahlspruch a
wenn Sorge drückt wenn Not und Pein
dich zwingt ein Pessimist zu sein
schau auf tu es dem Optimisten gleich
ein fröhlich hoffnungsvoller Blick
den Weg zum Licht zur Sonne weist
Narri Narro

Download Report