La Pagina da Surmeir 68 avla annada Nr. 36 4 da settember 2014 13 CHORS XV. Festival Mundial de Coros Puebla, Mexico 14-22–8–2014 Canto an rumantsch per igls Mexicans Cun canzungs an tots quatter lungatgs naziunals ò igl chor da project incanto igl auditori mexican. ● Gio per la XV avla geda s’antopan chors da tot igls continents agl Festivial Mundial de Coros. Organiso vign chel, siva dalla fundaziun igl onn 2000, digl Mexican Maestro Jorge Altieri Hernández. Anfingen ossa èn sa participos 127 chors da 36 paeis dall'Europa, Asia ed America. Igl coro Normalista de Puebla festivescha chest onn igl sies 50avel anniversari. Uscheia ègl er sto tgapibel, tgi igl organisatour digl festival anveida igls chors a Puebla. La Svizra è neida represchentada gio per la terza geda digl choR inteR kultuR. Igl è en chor da project ed uscheia sa scontran cantadours e cantadouras da divers cantuns sot la direcziun digl musicist Fortunat Fröhlich da Coira. Mexico City: tranter 22 anfignen 28 milliuns abitants Igl festival ò cuzzo dalla gievgia igls 14 anfignen venderde igls 22 d’avost 2014. Essend en lung viadi, sgol da ca. 13h, è la gronda part digls participants parteida gio igls 9 d’avost vers Mexico martgea. Uscheia vainsa pudia galdeir divers deis cun igl guid, Serchio, tgi ò musso blers monumaints, baselgias e museums aint igl martgea da Mexico. Igl martgea Mexico dombra tot sagond tgi tg’ins dumonda 22–28 milliuns abitants. Ins vegia betg da s’annunztgier, uscheia tgi vign chinto cun tants abitants. An mintga cass enorm grond, bler travagl e canera, pulizeia sen mintga cruschada. Igl martgea è biagia sen igl taragn tgi era avant tschentaners en lai. Tirond davent l’ava a sies taimp, dattigl ossa grond problems tgi igl fundamaint sa sbassa e bleras tgesas, hotels e baselgias èn tortas e cupetgan mintg’onn en po daple. La catedrala vign survigilada de e notg. La differenza tranter dus tgesas pò esser da fons anse anfignen tigl tetg anfignen 1meter. Tenor igl guid mexican dattigl nigna pussebladad da far ensatge. Cactus cun ena otezza da diesch meters Fitg interessantas èn er las piramidas, chella dalla gligna scu er chella digl suglegl. Dimensiuns enormas. Speziala è er la cuntrada digls cactus tgi vignan anfignen 10m ots. Fitg impressiunont igl Ballet Folklórico de México. Las belas calours e musica mexicana, en deletg da tadlar. Betg mantgantar da vurdar, ins dastga igl «Museum National Anthropolog». Siva d’aveir via tantas tgossas ischans partias la gievgia per Puebla. Puebla, en martgea da ca. 2 milliuns abitants. En bel martgea tgi vign numno dalla UNESCO scu «Ierta culturala mundiala». En chor da 250 cantadouras e cantadours Diversas amprovas da cant cun tot igls chors participos on do antschatta agl festival. Chors participos: Mexico, Espana (Catalana) Polonia, Russia, Estados Unidos, Filipinos, Suiza, Argentina, Venezuela. Igl amprem cant communabel è sto la Messe Brève da Ch. Gounod, la dumengia durant igl sarvetsch divin ainten la gronda catedrala, celebro digl uestg. Ca. 250 cantadours/-as tgi on canto sot la direcziun digl grond Maestro Jorge Altieri Hernández. Tge impressiuns cun igl cant «Hallelujah» (from The Messiah) von G.F. Händel. Davent digl glindesde on concerto tot igls chors mintgamai ainten en oter li, ca. 2–3 ouras ordvart Puebla. Tots quatter lungatgs naziunals Igl chor svizzer ò canto adegna an tots quatter lungatgs naziunals. Igl moderatour ò er infurmo mintgamai sur dalla cultura svizra, managiond tgi detta betg angal bancas, caschiel e tschigulattas. Alla fegn da mintga bloc dumandava el er tge successiun tgi las canzungs vegian gia. Igl contact cun igls indigens è sto fitg bel e cun las nossas tgapitschas svizras nivans avant scu actours da films. Tants tgi levan ena fotografia cun singuls u an gruppa. Igl venderde ò gia li scu finiziun en concert da gala ainten ena sala tgi dat plaz a 3000 persungas. Mintga chor ò canto 3 canzungs ed alla fegn tots ansemen cun orchester ena finiziun magnifica. Er la tschagna da gala cun diversas furmaziuns mexicanas cun solt e musica on laschea passar la notg bagnspert. La sonda seira ischans partias da Mexico aeroport e rivos la dumengia seira sangs a Turitg. En evenimaint strantg, ma cun fitg bungas regurdientschas. Roland Capeder
© Copyright 2024 ExpyDoc
