«Igls gidànters vignan direct suainter las petas» 250 gidàntras a gidànters voluntaris s’angaschan par igl 13avel Transviamala DA BARBARA RIEDHAUSER-RIESCH / ANR An dumeingia â liac la 13avla cursa Transviamala ca magna da Tusàn a Donat. Igls blears gidànters voluntaris en latier da grànda impurtànza. Signalisar oravànt las cursas, luiear la tenda d’ustreia cun tgadafiac a mesas par passa 1000 parsùnas, pacatar aint igls renumnos fazalets cun spezialitads indigenas, mussar noua parcar gl’auto, dar or las numras da partenza a raspunder a nundumbrevlas amparadas, transportar cugl auto las efectas digls curiders ad anqual sportist ca sto dar sei la cursa, taner sei igl trafic d’autos a motivar igls curiders durànt la cursa, comentar las partenzas a la rivada, tgirar plajas, far a vender petas – quegl e me egna part da las blearas lavurs c’en da far avànt, durànt a suainter igl Transviamala. Gidànters fidevels «Igl ple grànd resùn digls curiders vainsa mintg’on sen noss buffet legendari da petas, direct suainter vignan igls gidànters. Cun lur grànd a sinzer angaschamaint parsunal a cun lur identificaziùn cun la cursa fan els impressiùn agls partizipànts da la cursa », gi Daniel Camenisch. El e cumember da l’Uniùn da Sport Tumpriv (UST) c’organisescha davent da 13 ons igl Transviamala, a digl comité d’organisaziùn digl Transviamala. Là e el raspunsavel pigls gidànters. «Ear quest on e’gl gartagieu bagn da catar igls 250 gidànters. Blears en cumembers da l’UST, oters sustignan schiglioc gea davent da blears ons la cursa.» Ear uniùns, sco las puras da Donat a danturn ad igls Samaritans d’Andeer en mintg’on da la partida. Bùna organisaziùn Damàn meseanda antschevan suldos a cumembers da la protecziùn zivila cun lavurs d’infrastructura. Igls gidànters indigens en lura activs an sonda, cura c’igl e da far las lavurs da preparaziùn, ad an dumeingia, igl gi da cursa. La Val Schons sameglia quels dus gis ad egn furmicler. Igl e egn ir a vagnir, egn luvrar a trafitgear, mintgegn sa tge c’igl e da far near seglmains, tgi c’ign sa amparar. Mintga sparta da lavur â numnadameing egn manader c’â partgieu aint sia glieud a c’â la survesta. Paja an furma da daners dat igl nigna par igls gidànters. Els survignan dantànt mintg’on egn tschincetg da l’UST. Igl blear e quegl anzatge da trer aint, peia egn pulover, egna tgapetscha near egna giaca. Ascheia en igls gidànters ear d’ancanuscher bagn an la bleara glieud. Ple beala cursa Par la tschentgavla geada e igl Transviamala uon vagnieu ligieu sco ple beala cursa segl portal online laufkalender.ch. Daniel Camenisch salegra: «Quegl e egna fetg beala rancunaschientscha par la grànda lavur digl comite d’organisaziùn a par gl’angaschamaint da tut igls gidànters.» Sacapescha ca la natira spectaculara da las Veiasmalas a la beala cuntrada da la Val Schons e igl factur prinzipal par quella valetaziùn. «Mo dezisiv e ear, ca nus eassan egna uniùn da sport c’organisescha igl evenimaint. Nus vagn nigns patratgs da profit davostier, nossa motivaziùn e igl plascher a nossas ambiziùns da porscher egna cursa parfetga. Que spért saintan igls curiders.» Transruinaulta Sper igl Transviamala, c’e cun seas 19 km ple u mains egn miez maraton, â l’UST uon organiso par l’amprema geada igl Transruinaulta, egn trail-maraton da 42 km. Quel magna da Gliànt tras la Ruinaulta ad a Tusàn. «Par quella nova cursa vagn nus ancuretg oters gidànters, par betga surcargear la nossa glieud », gi Daniel Camenisch. «Nus vagn colavuro cun las uniùns an la regiùn digl Transruinaulta, a cun Swiss olimpic volunteers. Ascheia vainsa cato bagn igls 150 gidànters c’igl drova.» Igl vegi tranteraint glieud da l’antiera Svizra ca vigni a gidar vendargis a sonda, cura ca 400 sportists curan par l’amprema geada la cursa ca magna tras la cavorgia impressiunànta digl Ragn anteriur.
© Copyright 2024 ExpyDoc
