Aifach Waggis - Gülle

Fasnacht2016WaageglyggeGülle-WaggisBasel1988
„AifachWaggis“
Was isch e Waggis? Nundefaahne,
dä Sachverhalt kasch nur erahne!
S isch klar: Ain mitere groosse Schnuure,
wo irgendwie und naimeduure
mit Jeedem mecht e bitz parliere.
(Z Basel haisst das „Intrigiere“!)
Dass dä Waggis - mit graade Logge
maischtens duet uffeme Waage hogge,
waiss jeedes Kind, wo z Basel wohnt!
Will „Waggis“ isch me am Cortege gwohnt.
Doch: Stopp! Und Halt!!! …das längt doch nid,
z beschryybe, was e Waggis witt!
E „Waggis“ isch – jetzt wird s hischtoorysch –
en ‚Alsacien‘, wo fir kain e Gfoohr isch.
Är isch e guety Aarbetskraft,
wo au fir d Basler Burger schafft:
Als Gmiesverkäufer uffem Märt,
als Billig-Biezer - ohny Wärt,
als Cümülüs-Tippse, wo kain duet schetzte,
will sy numme im Quartier duet d Parkplätz bsetze…
Das deent jetzt alles negatyyv,
proletaarysch und nayyv.
Doch wisse s z Basel ally Lyt:
Es git fir d Waggis e groossy Zyt:
Drei Dääg lang isch - usser Rand und Band –
Basel-Schtadt in Waggis-Hand!
Sy schängge Dääfy, Gmies und au Mimoose
an d Lyt wo am Kittel (oder an de Hose)
e Blaggedde traage und drbyy
zaige; sy mechte Waggis-Fan syy!
Nur hesch Du gwisst, dass all die Sache,
wo d Waggis mit vyl Gschnur und Lache,
uuse gänn vo ihrem Kaare,
Ally vom aigene Sagggäld schpaare?
Hesch Du gwisst, dass jeedy Roose,
jeedes Bier, jeedy Mimoose,
dää zahlt het, wo dir das git?
Gäll Bebbi, Settygs waiss me nid!
Dass d Waggis trotzdäm allne schängge,
wo si mit Danggbarkait bedängge,
isch soone Waggis-Aigenart!
(Grad by Kinder wird nid gschpaart!).
By gschminggte Gsichter (es sin maischtens Schwoobe)
duet zwar au e Waggis schnäll mol toobe!
…Är schänggt trotzdäm! … und gar nid lyys,
nämmlig Räppli – Kilo-wyys!
Wurum mir Güllis das betoone,
(fir ‚hey-tschöss-Aalde‘, Schwoobe und Bretoone)
isch, dass mir all Johr s Beschte gänn
und s Waggis-Image pflääge wänn:
Mir Waggis mache kainy Schulde,
bym Comité, wo das wurd dulde,
will mir bym Räppli uuseschmaisse
sicher nid Sepp Blatter haisse!
Au gohts by uns, uff unsrem Waage,
kaim vo de Waggis grad an Kraage,
nur will me zem Schpaare (locker-lyycht)
däm syy Waggis-Schtell grad schtryycht.
…do isch d Baasler Regieryg in dääne Sache
anderscht: me schryycht! Au das, wo Sinn wurd mache!
Esoo bewyyst dr Morin scheen:
Är het kainy Waggis-Gen!
Will soo, wie är duet z Basel wiete,
wär är als Waggis nur e Niete!
Will e Waggis isch gerächt!
Was dr Guy aber macht, das isch nur schl… nit so guet.
Au dr Wessels kha nääbebyy
nie e rächte Waggis syy!
Zum ainte deent sy Dialäggt
nid sehr Waggis-mässyg-pfläggt.
Zum andere isch syy polytysch Dängge
e Schtroof fir s Waggis-Waage längge!
Nur dr Eymaa – mr geschteen das yy –
kennt wirgglig en ächte Waggis syy!
Will soo wie dää dr ganz Daag schnuurt,
schnuurt är e jeede Wäägeler furt!
Und was är schnurt und duet verspräche,
duet jeede Naase-Rekord grad bräche!
(Nid d Waggis-Naase isch do z nenne.
Vyylmeh kasch dr Pinocchio erkenne!)
Unterem Schtich gsehts jeede yy:
E Waggis muess interger syy.
Dass d Politygg im groosse Ganze
drbyy duet nääbenuuse danze,
macht au klaar, (in ganzer Fülli)
s git nur ai Regieryg: Und das sin d Gülli!
D Ladäärne-Uusstellig uff em Minschterplatz und d Waageund Reggwisyte-Uusstellig bi dr Kasäärne sin vom Määntig
znacht bis am Mittwuch demoorge! Deert und an de 3 Verkaufsständ
(CINS) in dr Stadt kamen au alli Zeedel und Schnitzelbängg, d Blaggedde
und dr Rädäbäng kaufe.

Download Report