Das Bühnengespräch der «Sännechilbi» in

Bühnengespräch Sännechilbi 2016
Verfasser:
Nikolaus Hess
Aufführende:
Mitglieder des Jodlerklubs „Echo vom Rigi“, Küssnacht
Personen und ihre Darsteller:
Talamme:
Mario Schmid
Sännewysi:
Patrik Büeler
Chüefermänz: Nikolaus Hess
Schluchemelk: Leo Achermann
Souffleur:
Edi Bucher
Alle:
Einzeln:
Alle:
Iehr liebe Lüüt us Dorf und Land,
mier sägid üch es härzlichs „Grüezi mitenand“!
De Sännewysi, de Talamme, de Chüefermänz und au de Melk vom Schluuche,
tüend jetz die nächscht Viertelstund für es paar Gschichte z’verzellä verbruuche.
Losid guet zue und tüend die Värsli gniesse,
mier wends zum Afang miteme Schluck Kaffee Schnaps begiesse!
Alle:
Stosst an mit harmonischem Klange… (4xsingen)
Sännewysi:
A de Chlause-GV gahts zue und här , es isch ä Schand,
während de Reed vom Dossebach grated alles usser Rand und Band!
Es wird pfiffe und glärmet, de Vorschtand tuet nidemal vill undernääh,
e so öppis döffts bimene sone schöne Bruuchtumsverein überhaupt nid gääh!
In Zuekunft settid d’Klausjäger meh Respäkt zeige und nid eso rebelliere,
und GV sowie Chlausenacht in Ehre halte und würdig zelebriere!
Talamme:
Im Bezirksrat isch in letschter Ziit e huuffe gange,
de Looser isch useghiit, Petra und de Gnos hend frisch agfange.
De Fuchs, de Träsch, de Heinzer, d‘Mayor und au de Fischli,
grüblid und suechid wiiterhin nach Lösige uf ihrem Bürotischli.
Schlussändlich, und da müend mier nid lang schtudiere,
tued ja sowiso de Lüönd Wolfi alles regiere!
Schluchemelk: Ja, ja, im Bezirk unne lauft sowieso nid alles e so rund,
da gits e Person, die triibts de doch grad e chle gar bunt.
Da und det es paar Rächnige manipuliere,
und s’Gäld eifach grad für sich sälber abkassiere.
Da fählid i üsere Bezirkskasse plötzlich 100‘000 Schtei,
also mit e so vill Gäld i de Täsche giengt ich de au nu gäre hei!
Chüefermänz:
Chüssnacht liid am schöne Vierwaldstättersee,
det druffe fahrid ä huffe Dampfschiff, das wott doch jede gseh.
Aber die schöne Schiff wend nid uf Chüssnacht fahre,
d’Schifffahrtsgsellschaft wott da demit vill Gäld ischpaare.
Doch hend mier i de Zwüscheziit vernoh,
dass die Schiff ab hüür au wieder tüend da an echo.
Zwee Manne sett mer zu Ehrebürger vo Chüssnacht ernänne,
ich glaube, iehr alli settid die zwee initiative Dörfler au känne.
Sännewysi:
Ja, ja, de Keller Ursli und de Stocker Fritz sind halt scho zwee gueti,
wärid die beede im Bezirksrat – so vermueti –
würdi das nü Seebodealp-Bähndli im Seeplatz unne stah,
und Tourischte müesstid nümme bis zur Grepperstrass ufe gah.
Diräkt vom Dampfschiff is Bähndli inestiige ganz elegant,
da chämid Gescht in Schaare uf Chüssnacht, das wär doch allerhand!
Talamme:
Schön und heiss isch er gsii, de letschti Summer,
das macht a villne Freud, a de einte aber au Chummer.
D’Wärchdienschtler i de lange orange Hose tüend grüüsli schwitze,
wenns mit de schwäre Sprützkanne müend im Dorf umeflitze.
Galatti seit, churz Hose sind gfährlich s’chönnt öppis passiere,
mit dem Churz-Hose-Verbot tuet sich de Bezirk Chüssnacht wiit ume plamiere!
Schluchemelk: In letschter Ziit chömid vill Tourischte us em asiatische Ruum,
mängisch grad scharewiis, me glaubt das chuum.
Ufem Titlis, ufem Pilatus und au uf de Rigi mag me chum me nache mit zellä,
d’Rigi Bahne müend sogar seperati Wäge und provisorischi WC anestelle!
Au hie uf em Chreisel bliibt plötzlich e Car vorem Adler schtah,
das e Tschupplete Chinese cha i Hirsche abe gah.
Mier chönd da scho nu e chle lamentiere und au pläre,
s’Gäld wos da tüend la ligge nämmer trotzdem gäre.
Chüefermänz:
Üsi Seebodealp isch es herrlichs Wanderparadiis,
sigs im heisse Summer oder im Winter bi Schnee und Iis.
Hets dunne Näbel gönd all mit de Seilbahn oder äbe mit em Auto duruf,
da bruuchts de aber hie und da ä chlene lange Schnuuf.
Z’Allerheilige isch alls verschtopft, vill tüend ihri Göpple wieder chehre,
drum muess d’Füürwehr grad die ganz Seebodestrass schpeere!
Sännewysi:
Nideröst-, Fassbind- und Streiffe-Seebi-Huus,
vor luuter alte Hüüser chunnsch bald nümme drus.
De gits nu es paar alti Hütte i de Rigigass,
und s’Streiff Huus bi de Chnochestampfi als s’beschti Ass.
Tät’mer die historische Buute alls Chüssnachter Ballebärg i de Ruodisegg ufstelle,
chönnt s’nüe Seebode-Bähndli sicher e huuffe Passagier meh zelle.
Talamme:
Du Melk, a mier hänkts bim Rede langsam a,
ich sett wieder einisch ä Schluck Kaffe ha.
Schluchemelk: Jä ja, e sones Schwarzes isch s’Bescht für Gsundheit und für d’Luune,
über die heilsami Wirkig wurd nu mänge Dokter schtuune.
Alle:
Jetz schtönd mier zäme und schtossid a,
zwüschetdure döffid au mier öppe es Freudeli ha!
Alle:
Stosst an mit harmonischem Klange… (4xsingen)
Chüefermänz:
Am WEF z’Davos wird gredt und vill plagiert,
i de vordere Jahre au degäge demonstriert!
Im 2015 isch das alles andersch gsi,
de Demonstrationsafüehrer isch nämlich grad sälber am WEF debi.
De SP-Maa Marugg tued anstatt ussetem Gitter demonstriere,
mit de höchschte Politiker über de tüüfi Euro und de höchi Franke diskutiere.
Talamme:
Ja, ja, de Euro macht üs gar vill Sorge,
am Abig i de Tagesschau und i de Nachrichte am Morge.
Ghiid är abe isch es a de einte rächt,
gahd är ufe isch es für die andere schlächt.
Mier vier sind froh und chönd nur danke,
hend mier zum Glück nu üse herti Schwiizer Franke!
Alle:
Sännewysi:
D’Evelyne Widmer-Schlumpf usem Kanton Graubünde,
tuet em Bundesrat ihri Liebi plötzlich chünde.
Under dene Umschtände well sie nümme kandidiere,
es söll öpper andersch uf Bärn ufe go regiere.
Für d’SVP isch das natürlich es gfundnigs Frässe,
sie wärid doch scho lang wieder gäre uf zwee Bundesratsschtüehl obe gsässe!
Schluchemelk: De Fifa-Boss Sepp Blatter chas eifach nid la sii,
und wott de Wältfuessballverband präsidiere au wiiterhii.
Da gahts halt um sehr vill Gäld bi dene Macheschafte,
drum bliibid die eso uf ihrne Sässel hafte.
Aber eigentlich machids mier ja schier gliich wie die,
Alle:
mier vier sind ja au all sächs Jahr wieder dahie!!!
Chüefermänz:
A de Landammefiir im Kanton Zug lauft allerhand,
de Hürlimaa und d’Spiess-Heggli hend glaubi pöppis mitenand.
Sie sind luschtig und luegid e chle gar tüüf is Glas,
nachhär gänds de aber defüür grad ghörig Gas.
Die Sexaffäre schlaat i de Medie sehr höchi Wälle,
gits de überhaupt tatsächlich nüüme Wichtigers z’verzelle?!
Talamme:
Bi de National- und Ständeratswahle vom letschte Jahr,
gsehtme ä huffe Plakat am Strasserand, das isch de wahr.
Au de Trompetler Mathias Bachmann hets welle probiere,
und tuet als CVP-Maa für e Nationalrat kandidiere.
Glängt hets ihm de zwar nid, es hed nid selle sii,
dank de Petra Gössi isch aber trotzdem öpper vo Chüssnacht debii!
Sännewysi:
D’Allrounderi Megy Imhof mit Übername Juliett,
am Sunntig nach de Chile a s’Peters Geburtstagsfäscht wett.
Da chunnt es SMS ine vo s’Truttmes Frau,
Megy wird röter und röter, was söll das genau?
„Stärnecheib, das git’s ja nid, das chas nid sii,
das Fäscht wär ja scho geschter am Samschtig gsii!“
Schluchemelk: Bi de Muotithaler Wätterschmöcker isch jetz au ä Chüssnachter debii,
uf de Ranglischte isch er zwar meischtens ehnder hinnenab gsii.
Mit de Prognose tuets de „Naturmänsch“ nid eso guet preiche,
prophezeit er schöns Wätter chunnts graad abe go seiche.
Aber ei Regle stimmt 100-prozäntig und das ohni z’plagiere,
a de Sännechilbi tuet de Hediger Kari mit em Geissbock dur s’Dorf dure marschiere!
Chüefermänz:
De Sännepropscht Werni Fleischme isch e villbegabti Person,
was iehr villicht nid wüssid, är isch mängisch ä richtige Clown.
Är cha sehr guet ander Lüüt imitiere und nachemache,
da muesch bim Zuelose und Zueluege ghörig Träne lache.
Bimene Fäschtli i de Piazzahütte hed ärs de doch ä chle übertribe,
defür isch ihm am Morge i de Rorate-Mäss grad schier d’Stimm ewägg blibe!
Talamme:
A de Haltikerstrass wird glochet und buuet fascht ohni Ändi,
hoffentlich chunnts bis am Schluss doch nu zunere guete Wändi.
D’Lüüt im Chaletdörfli und die wiiter obe müend scho e chle Geduld ha,
und mängisch ziemlich lang vorem Rotliecht aschtaa.
D’Haltiker chönd froh sii, dass nid nu e 30-er Zone ifgüehrt worde isch,
suscht möchtids gar nümme go poschte und hocktid vorem lääre Tisch.
Schluchemelk: Über d’Südumfahrig gäbs au nu langi Gschichte z’schriibe,
aber mier wend da ufem – respektiv im Bode bliibe.
Die grosse Maschine ratterid, dass nur so schtüübt und kracht,
s’Igangstor zum erschte Loch isch scho fascht gmacht.
Ich hoffe für die 2. Etappe siegt d’Vernunft,
drum luegid mier optimistisch i d’Chüssnachter-Südumfahrigs-Zuekunft!
Sännewysi:
Talamme:
Schluchemelk:
Chüefermänz:
Alle:
Jetz sind mier am Schluss mit üsne Schprüch und Gschichte,
und hörid uf mit verzellä und Värsli dichte.
Mier wünschid vill Glück, Gottes Säge und bliibid gsund,
gniessid die Sännechilbi und fiirid nu mängi gmüetlichi Schtund!
Liebi Gäscht, uf üches Wohl stossid mier nu einisch a,
dass mers mitenand chönd luschtig und fröhlich ha!
Alle:
Stosst an mit harmonischem Klange… (4xsingen)
Ade mitenand, uf Wiederluege…….

Download Report