Fegl parochial Breil Dardin Danis/Tavanasa mars-avrel 2015 In plaid sin via Ils davos meins ei il Fegl parochial da nossas pleivs cumparius sin ina moda emplau pli sempla. Il motiv ei, che la lavur d’administraziun ha stuiu vegnir restrenschida duront il temps transitori, che cuozza aunc entochen l’entschatta uost 2015. Las activitads dil proxim temps ed igl agid da pliras varts ha uss tuttina lubiu da tschentar ensemen in Fegl parochial empau pli pulpiu. Ord quei motiv vi jeu introducir el cun igl usitau plaid sin via. Il plaid „selfie“ ei ils davos meins fetg presents en las medias ed en nies mintgadi. Igl ei ina moda e maniera da memorisar fotograficamein e sin sperta moda in mument dalla veta. Secapescha muossa la fotografia sesez, sco quei ch’il plaid „selfie“ di (deriva digl engles: self= sez). Avon entgin temps sun jeu vegnida cunfrontada cul maletg d’in selfie da Jesus che vus veseis cheu dasperas. Mei ha il maletg plidentau en dus graus. Per l’ina muossa el in Jesus che s’occupescha da facts dil mintgadi. El ei era presents en nos novs mieds da communicaziun. Per l’autra ha il cuntegn, il messadi dil maletg plidentau mei. En la fatscha da Jesus semuossan las fatschas da carstgauns. Dunnas ed umens, indigens ed jasters, giuvens e vegls. Nus essan sco cristians la fatscha da Jesus en quest mund. Nus dein perdetga dad el, entras nies far, plidar e patertgar. Che quei gartegi sin ina buna moda, giavischel jeu a nus tuts. Flurina Cavegn-Tomaschett, gidontra pastorala REMARCABEL Remarcabel, con gronda ina bancnota da 50 ei sche ti prendas ella en baselgia, e con pintga, sche ti vas cun ella en stizun. Remarcabel, con grev ch’igl ei da prender in’ura peda per Diu, e con spert che 90 minutas d’in giug da ballapei ein vargadas. Remarcabel, con pauc che vegn endamen a mi cu jeu plaidel cun Diu, e con ch’jeu hai da raquintar ad ina buna amitga. Remarcabel, con grev ch’igl ei da leger in capetel ord la Bibla e con spert ch’jeu legel in artechel dalla gasetta. Remarcabel, con spert che las retschas davon ein occupadas tier in concert e co la glieud sesa en baseglia els bauns oradem. Remarcabel, con spert che nus cartein las novitads el radio e con critics che nus essan enviers la Bibla. Remarcabel, ni curios ni trest? Remarcabel, che Dieus careza tuttina nus. Rapport annual dil cussegl pastoral Alla sava dad in onn niev stat mintgin da nus cun ses giavischs e sias spetgas, denton era cun ses dubis e sias temas da dumignar il pensum che ha da vegnir ademplius. Aschia eis ei era stau tier il cussegl pastoral. Sin fundament dalla decisiun da sligiar la regiun pastorala Breil-Trun, ch’era vegnida inaugurada igl uost 2013, eran nossas pleivs senza plevon e la damonda „Co vinavon?“ ha fatschentau pulitamein ils gremis responsabels. En la persuna da sur Marcel Köhle ei legreivlamein vegniu anflau in plevon per nossas pleivs. Cunquei ch’il plevon giuven ei denton aunc ligiaus en sia plazza a Turitg, eis ei buca stau pusseivel ad el da surprender siu pensum avon la stad 2015. Aschia ha ei giu num dad organisar il menaschi da pastoraziun duront quei temps. En las persunas da sur Marcus Flury, ch’ei era staus promts da surprender la funcziun dad in plevon administratur, sco era da sur Tarcisi Venzin e sur Giusep Venzin havein nus denton survegniu grond sustegn. Els ensemen cun ulteriurs plevons en la vegliadetgna da pensiun han segidau cun celebrar ils survetschs divins duront quei temps transitori. Gest en quei temps senza plevon ei semussau, con impurtont ch’igl ei dad haver in cussegl pastoral che s‘engascha activamein. Era el post pastoral ha ei dau ina midada: Flurina Cavegn ha entschiet cun il studi da teologia, aschia ch’ella ha reduciu siu pensum da lavur sin 20 %; per ils ulteriurs 20 % ha Claudia Bundi da Schlans astgau vegnir engaschada. Malgrad il menaschi transitori ha il cussegl pastoral era exequiu uonn siu pensum annual. Il Fegl parochial ei cumparius – en vesta alla pastoraziun provisoria – en fuorma pli sempla. Plinavon ein las occurrenzas usitadas vegnidas menadas atras (gentar resp. sera da suppa, l’acziun da cureisma, l’uncziun dils malsauns, visetas en casas dad attempai, usits da s. Clau e dils s. Retgs e.a.v.) ed era ils engaschis en la pastoraziun ein buca vegni tralaschai (p. ex. vias dalla crusch el liber, survetschs divins dil plaid e.a.v.). El decuors digl avrel ha giu liug ina sentupada per mussar las fotografias dil viadi en Tiarasontga ed igl atun vargau ei vegniu organisau in pelegrinadi ad Ittigen, al qual 35 persunas ein separticipadas. Era ils ministrants han – sco pign engraziament per lur engaschi – astgau guder lur excursiun egl Alpamare. A caschun dalla devoziun dils s. Retgs a Breil ein duas commembras dil cussegl pastoral, numnadamein Cornelia Deplazes-Cathomen ed Annadora Friberg, vegnidas undradas per lur merets en connex cun la tgira digl usit dils s. Retgs. En num dalla Fundaziun „Brigel“ ha il president Michael Friberg surdau ad ellas in present. Cordiala gratulaziun! Sco mintg’onn ei era vegniu fixau uonn in accent da lavur, numnadamein la presentaziun dalla lavur dil cussegl pastoral alla publicitad. Cunquei che la preparaziun da quella lavur drova pulit bia temps, ei vegniu decidiu da presentar il resultat en differents Fegls parochials el decuors dil 2015. Enteifer il cussegl pastoral ha ei dau duas mutaziuns: Claudia Carigiet/Dardin (midada da domicil) ed Andrea Riedi/Danis (scolaziun professiunala) han deplorablamein inoltrau lur abdicaziuns. Cun success han ils dus posts denton saviu vegnir occupai entras Marta Cathomas/Breil e Patricia Herger/Danis. Allas commembras partentas engraziein nus da tut cor per lur lavur prestada ed allas commembras novas giavischein nus bia plascher en lur engaschi. En num dil cussegl pastoral admettel jeu a tut nos voluntaris che s‘engaschan per il beinstar da nossas pleivs in cordial engraziament per lur nunstunclenteivla lavur. Era a Vus, preziai parochians, s’auda in sincer engraziament per il sustegn che nus astgein sentir duront igl onn ora. Quei engaschi dat anim e tschaffen a nus da cuntinuar cun nossa lavur. Cun plascher spitgein nus il mument dad astgar beneventar nies niev plevon, senza denton emblidar dad engraziar grondamein a tut nos plevons che han segidau cun nus duront il davos temps. Dardin, fevrer 2015 Patricia Derungs, presidenta CALENDER LITURGIC MARS 2015 2. dumengia da cureisma, Dumengia dils malsauns du, 01-03-2015 09.30 Danis 10.45 Breil sur Marcus 3. dumengia da cureisma du, 08-03-2015 09.30 messa a Dardin 10.45 messa a Danis sur Giusep 4. dumengia da cureisma du, 15-03-2015 10.30 s.d. da famiglia Flurina 09.30 messa a Danis 10.45 messa a Breil 14.00 devoziun a Dardin sur Giusep Firau da s. Giusep gi, 19-03-2015 5. dumengia da cureisma du, 22-03-2015 09.45 messa a Dardin 11.00 messa a Danis sur Alexi Dumengia da Palmas so, 28-03-2015 du, 29-03-2015 19.00 messa a Dardin 09.45 messa a Danis 11.00 messa a Breil sur Giusep sur Alexi AVREL 2015 Gievgia Sontga, messa cun ils premcommunicants gi, 02-04-2015 19.00 messa a Danis sur Giusep 09.30 10.30 14.00 15.30 20.00 gruppa liturgia gruppa liturgia sur Giusep Venderdis Sogn ve, 03-04-2015 via dalla crusch a Breil via dalla crusch a Dardin liturgia dalla passiun a Dardin liturgia dalla passiun a Danis liturgia e processiun a Breil sur Marcus Sonda Sontga so, 04-04-2015 20.15 messa a Danis 21.45 messa a Breil sur Tarcisi sur Giusep 09.45 messa a Dardin 11.15 messa a Breil sur Alexi Pastgas du, 05-04-2015 Gliendisdis Pastgas gl, 06-04-2015 10.00 messa a Dardin sur Marcus 10.00 messa a Breil sur Giusep Dumengialva du, 12-04-2015 3. dumengia pascala du, 19-04-2015 09.30 messa a Dardin 10.45 messa a Danis sur Giusep 4. dumengia pascala du, 26-04-2015 09.30 s.d. Plaid a Dardin 11.00 s.d. Plaid a Breil Claudia Ei sa dar pintgas midadas vid il calender liturgic – las publicaziuns actualas ein d’anflar mintg’jamna el Fegl ufficial Surselva! Cant aviert Per saver exercitar novas e meins canzuns enconuschentas canzuns ord il cudisch da cant “Lauda il Segner” envida il Cussegl pastoral ad in cant aviert per in e scadin. Quel ha liug avon il survetsch divin da famiglia dalla 4. dumengia da cureisma. Nus serimnein: 15 da mars 2015, allas 10.00 sin lautga dalla baselgia a Breil CUREISMA 2015 La via dalla crusch ha siu ferm plaz el temps da cureisma. Igl ei ina biala ed impressiunonta pusseivladad da schar reviver e meditar la via che Jesus ei ius per nus. En tuttas treis pleivs vegn menau atras differentas vias dalla crusch sin moda tradiziunala ni era pli innovativa. Ils termins ed ils temps vegnan publicai el Fegl ufficial. Via dalla crusch el liber: A Dardin da Venderdis sogn, allas 10.30 A Danis: ils 08-03-2015, allas 17.00 per famiglias Devoziun da penetienzia Il temps da cureisma vala sco temps da preparaziun per la fiasta da Pastgas. Las devoziuns da penetienzia dattan a mintginA caschun da prender serius quella preparaziun. Reponderar l’atgna veta ed igl agen agir, tedlar il Plaid da Diu, rugar Diu per perdun, retscheiver perdunament e far buns propiests per continuar la via – quei ein entginas dallas finamiras dalla devoziun da penetienzia. Pren era ti quella caschun! Breil: Mesjamna, ils 25 da mars, 19.00h Danis: Gievgia, ils 26 da mars, 19.00h Unfrenda da cureisma La campagna stat uonn sut il motto: „Dameins per mei. Avunda per tuts!“. En quest Fegl parochial anfleis vus il satget dall’unfrenda da cureisma. Il cussegl pastoral ed ils responsabels per la pastoraziun da nossas pleivs recamondan da sustener quell‘instituziun. Ils satgets vegnan rimnai da Dumengia da Palmas. Igl ei era pusseivel da pagar ina contribuziun cul cedel da pagament che sesanfla en l’agenda da cureisma. Di d‘oraziun mundiala Il di d’oraziun mundiala ei in project ecumen da dunnas cristianas digl entir mund. La fimanira ei da segidar e tschentar in segn da solidaritad cun urar ed agir. Uonn ei la liturgia vegnida preparada da dunnas dallas Bahamas. Las cuminonzas da mummas e dunnas dalla vischnaunca envidan cordialmein: venderdis, ils 06 da mars, allas 19.00 uras en baselgia a Danis Communiun a casa La communiun a casa ha liug vinavon l’emprema gievgia dil meins. Nus supplichein ils confamigliars da contactar igl uffeci parochial, sche quei survetsch vegn giavischaus per malsauns ed attempai ch’ein aunc buca annunziai. Radunonzas generalas Las radunonzas generalas dallas pleivs han liug: 20-03-2015 a Danis/Tavanasa 21-03-2015 a Dardin 22-03-2015 a Breil L’invitaziun cun la gliesta da tractandas vegn publicada el FUS. Entschatta d’uffeci da sur Marcel Köhle Nies niev plevon sur Marcel Köhle vegn ad entrar en uffeci l’entschatta uost. Ils 9 d’uost ha liug a Breil in survetsch divin da beinvegni per el entras il decan sur Alfred Cavelti. Sur Marcel vegn ad esser presents allas radunonzas da pleiv e sepresentar cun quella caschun a nos parochians. Adressas Plevon administratur: sur Marcus Flury, Glion en cass urgents 081 544 58 24 079 703 54 82 Uffeci parochial: Claudia Bundi e Flurina Cavegn Cadruvi 33, 7165 Breil 081 941 17 18 www.pleivs-breil.ch [email protected]
© Copyright 2024 ExpyDoc
