datum 9 – 15 mei
Studia lès di e siman aki pa prepará pa
Sabat, 16 mei
HESUS, SPIRITU SANTU I ORASHON
Lesa pa estudio di e siman aki: Lk. 2:25-32; Huan 16:5-7; Lk. 23:46; Lk. 11:1-4;
Mt. 7:21-23; Lk. 11:9-13.
Versíkulo di Memoria: “I Mi ta bisa boso, pidi, i lo wòrdu duná na boso; buska, i boso
lo haña; bati, i lo wòrdu habri pa boso. Pasobra ken ku pidi ta risibí; i esun ku buska,
ta haña; i pa esun ku bati, lo wòrdu habrí. (Lk. 11:9, 10).
Di e tres evangelionan sinóptiko, Lukas ta papia mas tantu ku e otronan over di
Hesus Su relashon ku e Spiritu Santu. Miéntras ku Mateo ta referí 12 biaha na e Spiritu i Marko ta hasié 6 biaha, Lukas tin den su evangelio 17 referensia i den e buki di
Echonan 57. For di konsepshon di Hesus den humanidat (Lk. 1:35) te na e enkargo pa
establesé Su mishon global (Lk. 24:44-49), Lukas ta mira un konekshon operashonal
entre Hesus i e Spiritu Santu. E konekshon ta básiko pa komprondé e ministerio di nos
Salbador. Di mesun manera, Lukas ta mustra e importansia di orashon den Hesus Su
bida i mishon. Siendo kompletamente divino, igual ku e Tata i e Spiritu, Hesus den Su
humanidat a laga un ehèmpel pa nos enkuanto orashon.
Si Hesus a mira e nesesidat di orashon, kuantu mas nos tin mester di dje?
Sin orashon konstante i vigilansia diligente nos ta den peliger di krese den deskuido
i di desviá for di e kaminda rekto. E atversario kontinuamente ta buska pa opstruí e kaminda pa e propisiatorio, pa nos no optené grasia i poder pa resistí tentashon pa medio
di súplika sinsero.” Ellen G. White, Steps to Christ, p. 95.
92
Djadumingu 10 mei
Djaluna
HESUS I E SPIRITU SANTU
Komo un komberso paganu i un kompañero mishonero di apòstel Pablo, Lukas a
mira henter e entrada kristológiko den historia – for di enkarnashon di Hesus te na
Su asenshon i e ekspanshon di iglesia – komo un maravia divino produsí i guiá dor
di Spiritu Santu. Den bida di Hesus nos ta mira Deidat kompletu man na obra pa nos
redenshon (Lk. 3:21, 22); i, dor di su referensianan konstante na Spiritu Santu, Lukas
ta enfatisá e punto aki.
Kiko e siguiente versíkulonan ta bisa nos over di e tarea di Spiritu Santu den Kristu
Su binida akinan den karni humano?
Hesus Su mishon a kuminsá ku diferente referensia na Spiritu Santu. Di akuerdo
ku Lukas, Huan Boutista a predesí ku ounke ku e a boutisá ku awa, Esun ku lo siguié
lo boutisá ku e Spiritu (Lk. 3:16). Na e boutismo di Hesus, tantu e Tata komo e Spiritu
Santu a afirmá e outentisidat di Su mishon di redenshon. Dios Tata a deklará for di ariba ku Kristu ta Su Yu stimá mandá pa redimí humanidat, miéntras ku e Spiritu Santu
a baha riba djE den forma di un palomba (Lk. 3:21, 22). For di einan padilanti Hesus
tabata “yená di Spiritu Santu” (Lk. 4:1) i kla pa enfrentá e enemigu den desierto komo
tambe pa kuminsá Su ministerio (Lk. 4:14).
E palabranan inisial di Su sermón na Názarèt tabata un aplikashon di e profesia mesiániko di Isaias na Su mes: “E Spiritu di Señor ta riba Mi” (v. 18). E Spiritu tabata Su
konstante kompañero, Su forsa afirmativo, i Su presensia duradero entre Su siguidónan
ora ku Hesus no por tei mas meimei di nan (Huan 16:5-7). No solamente esei, Hesus a
primintí ku Dios lo duna e don di Spiritu na esnan ku pidi p’E (Lk. 11:13). E Spiritu ku
semper a konektá Kristu ku Su Tata i ku e mishon di redenshon, ta e mesun Spiritu ku
lo fortifiká e disípulonan den nan biahe di fe. P’esei, e importansia krusial di e Spiritu
den bida kristian: enbèrdat, blasfemia kontra e Spiritu Santu ta esun di mas grave di
tur piká (Lk. 12:10).
Kua ta e maneranan konkreto i práktiko ku nos por habri nos mes na guia di e Spiritu
Santu? Esei ta: kon nos por ta kuidadoso pa nos eskohonan di ningun forma ta hasi
nos duru pa ku Su bos?
93
Djaluna 11 mei
Djadumingu
E BIDA DI ORASHON DI HESUS
Entre e kantidat di biahanan ku Hesus a hasi orashon, algun di nan ta registrá
solamente den Lukas. Nota e siguiente insidentenan ku ta mustra Hesus den orashon
durante di momentunan grandi den Su bida.
1. Hesus a hasi orashon na Su boutismo (Lk. 3:21). “Un époka nobo i importante tabata habri Su dilanti. Riba un esenario mas amplio, E tabata drentando awor e
konflikto di Su bida.” – Ellen G. White, The Desire of Ages, p. 111. E no tabata ke
riska kuminsá ku e etapa mas amplio di Su ministerio públiko – ku lo hib’É eventualmente na e krus di Kalvario – sin orashon.
2. Hesus a hasi orashon promé di a skohe Su 12 disípulonan (Lk. 6:12, 13).
Ningun lider ta skohe su siguidónan djis asina numa. Pero Hesus no tabata djis
selektando siguidónan, pero skohiendo esnan ku lo komprondé i identifiká nan mes
kompletamente ku Su Persona i Su mishon. “Nan enkargo tabata esun di mas importante pa kua sernan humano a yega di wòrdu yamá, i tabata segundo solamente
na esun di Kristu mes.” – Ellen G. White, The Desire of Ages, p. 291.
3. Hesus a hasi orashon pa Su disípulonan (Lk. 9:18). Disipulado ta eksigí entrega apsoluto na Hesus i un komprondementu di Su identidat. Pa e diesdosnan por a
sa ken E tabata, Hesus “tabata hasi orashon Su so,” i despues di esei e a desafiá nan
ku e pregunta krusial: “Ta ken boso ta bisa ku Mi ta?” (Lk. 9:20).
4. Hesus a hasi orashon promé ku Su transfigurashon (Lk. 9:28-36) i a optené
pa Su mes Shelu su segundo aprobashon ku E ta Dios Su “Yu stimá.” Pruebanan te
na e momentu, i pruebanan ku mester a bin, no por a kambia e laso mas será entre e
Tata i e Yu. E orashon a resultá tambe den e echo ku e disípulonan a bira “testigunan
ku a mira Su mahestat” (2P. 1:16)
5. Hesus a hasi orashon na Getsemaní (Lk. 22:39-46). Ku tur probabilidat esaki
ta e orashon di mas importante den historia di salbashon. Akinan nos tin e Salbador
konektando shelu ku tera, i dor di hasi esei E ta establesé tres prinsipio krusial: e supremasia di Dios Su boluntat i propósito; e kompromiso pa kumpli ku e supremasia
ei, hasta ku e rísiko di sanger i morto; i e forsa pa vense kada tentashon na kaminda
pa kumpli ku Dios Su propósito.
6. Hesus a hasi orashon, poniendo Su bida den Dios Su mannan (Lk. 23:46).
Den Su palabranan final na e krus: “Tata, den Bo mannan Mi ta entrega Mi spiritu,”
Hesus a duna nos e último propósito di orashon. Na nasementu òf na morto, den
presensia di enemigunan òf amigunan, durante di soño òf ora di ta lantá, orashon
mester tene nos den konekshon permanente ku Dios.
Kiko e ehèmpelnan aki ta bisa bo over di bo propio bida di orashon?
94
Djamars 12 mei
Djarason
Djaluna
E ORASHON MODELO: PARTI 1
Lesa Lk. 11:1-4. Kon e versíkulonan aki ta yuda nos komprondé kon orashon ta
funshoná?
“Tata” ta Kristu Su manera faborito pa deskribí Dios i esei ta registrá asina por lo
ménos 170 biaha den e kuater evangelionan. Dor di yama Dios nos Tata, nos ta rekonosé ku Dios ta un Persona, kapas di e relashon mas íntimo ku sernan humano.
Dios ta tan personal, tan real, tan amoroso, i tan atento manera un tata humano. Pero
E ta e Tata den shelu. E ta diferente for di nos tata terenal, pasobra E ta omnipotente,
omnisiente, omnipresente, i santu di forma perfekto.
E frase “Tata na shelu” pa semper ta rekordá nos ku Dios ta santu i personal i ku
kristianismo no ta ni djis un idea filosófiko ni tampoko un konsepto panteístiko¹ di un
dios kende ta tur kos.
“Bo nòmber sea santifiká” (Lk. 11:2, NKJV). Akinan nos tin un otro rekordatorio di
e santidat i dedikashon di Dios. Pa afirmá di ta siguiÉ i tòg ta peka kontra djÉ, ta nifiká
ku ta deshonrá Su nòmber. E palabranan di Hesus den Mt. 7:21-23 por yuda nos komprondé mihó kiko ta nifiká pa santifiká Dios Su nòmber.
“Bo reino bin” (Lk. 11:2, NKJV). E evangelionan ta referí na e reino di Dios mas di
100 biaha: kasi 40 den Lukas, kasi 50 den Mateo, 16 den Marko, i 3 den Huan. Ta loke
ku Hesus a bin revelá i establesé; ámbos den e realidat presente di e reino di grasia i
den e futuro promesa di e reino di gloria. Si no drenta e promé reino, lo no tin entrada
den e segundo, i ta deseo di e Salbador ku Su disípulonan lo eksperensiá esun promé
den antisipashon di esun di dos.
“”Bo boluntat sea hasí na tera manera ku ta na shelu” (Lk. 11:2, NKJV). E boluntat
di Dios ta rekonosé i obedesé na shelu. Hesus ta tuma e echo ei i ta kombertié den un
speransa ku tal boluntat lo ta igualmente e kaso na tera. “Na tera” ta sugerí no generalidat pero partikularidat. Laga e boluntat di Dios sea hasí na tera, pero laga esaki
kuminsá ku nos, ku kada un di nos personalmente.
Bo konosé Señor, òf ta djis bo sa di djE? Kua ta e formanan den bo bida di orashon ku
por hala bo mas serka di djE?
¹ Di e palabra: panteísmo, ku ta un kreensia ku Dios ta tur kos i tur hende, i ku tur hende i tur
kos ta Dios. P.eh.: un palu ta dios, un baranka ta dios, shelu ta dios, solo ta dios, luna ta dios,
abo ta dios, ets.
95
Djarason 13 mei
Djadumingu
Djamars
E ORASHON MODELO: PARTI 2
“Duna nos dia pa dia nos pan di kada dia” (Lk. 11:3, NKJV). E petishon ta kuminsá
ku e palabra duna. Sea ku e palabra ta sali for di e lepnan di un mionario, òf di un huérfano ku ta den nesesidat konstante, e orashon ta mesora un ekspreshon di dependensia
riba Dios, i e súplika insistente: “Duna,” ta forsa nos pa rekonosé ku Dios ta e fuente di
tur don. E ta e Kreador. Den djE nos ta biba, move, i tin tur nos ser. “Ta E ta Esun ku a
traha nos, i no ta nos a traha nos mes” (Salmo 100:3, NKJV).
Dios ta e Tata ku ta duna nos tur loke ku nos tin mester. Den lus di e promesa aki, ki
gran siguransa nos por haña den Lk. 11:9-13?
“Pordoná nos nos pikánan” (Lk. 11:4, NKJV). Pordon ta na kurason di e evangelio.
Sin Dios Su pordon, nos no tin salbashon: “I tempu boso tabata morto den boso transgreshonnan . . . , E a hasi boso bibu huntu ku né, dor di a pordoná nos tur nos transgreshonnan” (Kol. 2:13). Esnan ku a eksperensiá Dios Su pordon mester sali i brasa tur
hende ku por a hasi nan daño. E orashon pa pordoná manera “nos tambe ta pordoná”
(Lk. 11:4, NKJV) no ke men ku Dios Su pordon ta dependé riba nos pordonamentu di
otronan; mas bien, nos situashon di ta pordoná ta demandá ku komo disípulonan nos
mester biba semper denter di e sirkulo di grasia ku ta amplia – risibiendo Dios Su bondat di un banda i tambe ekstendiendo Su amor i pordon na otronan ku por a ofendé nos.
“No guia nos den tentashon, ma libra nos” Lk. 11:4, NKJV). Dos echo mester ta notá.
Promé: tentashon no ta piká. E palabra griego pa “tentashon” ta peirasmos. Sustantivonan griego ku ta terminá ku asmos normalmente ta deskribí un proseso, no un produkto. Skrituranan no ta mira tentashon komo un produkto final; e ta un método, un proseso usá pa logra un produkto partikular. Ounke ku tentashon no ta piká, someté na dje sí
ta piká. Segundo: Dios no ta e outor di tentashon (Sant. 1:13). Dios por permití tentashonnan bin, pero nunka E ta tenta den e sentido di sedusí hende pa peka. Orashon,
p’esei, ta rekonosementu ku Dios ta e fuente di e último forsa pa resistí esun maligno.
Revisá Lk. 11:1-4. Pensa over di tur e asuntunan ku e ta kubri. Den ki forma bo
eksperensia ku kada un di e asuntunan aki por ta enrikesé i profundisá pa medio
di orashon?
96
Djaweps 14 mei
Djabièrnè
MAS LÈSNAN RIBA ORASHON
Inmediatamente despues di a duna Su disípulonan un orashon modelo, Hesus a siña
nan, pa medio di e parábola di un amigu mei anochi (Lk. 11:5-13), e nesesidat pa hasi
orashon di forma persistente. Despues, miéntras ku E tabata aserkando e fin di Su
ministerio, E a rekordá Su siguidónan di e nesesidat pa penitensia i humildat den orashon (Lk. 18:9-14). Tur dos e parábolanan aki ta mustra ku orashon no ta djis un rutina
religioso, pero un kanamentu, papiamentu, i bibamentu persistente ku e Tata. Lesa Lk.
11:5-8. Hesus a konta e parábola aki pa enkurashá perseveransia den orashon. Orashon
no mester bira un rutina. En kambio, orashon mester ta e fundeshi di un relashon di
konfiansa apsoluto, persistente, i kontinuo ku Dios. Orashon ta e rosea di e alma: sin
dje nos ta spiritualmente morto. Hesus ta konta e parábola di un bisiña ku a nenga di ta
bon bisiña. E súplikanan kontinuo di su amigu pa un pan pa kumpli ku un emergensia
mei anochi ta pòrnada. Pero finalmente, hasta un bisiña asina ta rindi i ta entregá na e
persistensia di e batimentu kontinuo na porta mei anochi. Kuantu mas Dios lo ta pa ku
un hende ku ta persistí den orashon? Tal persistensia no ta pa kambia Dios Su mente,
pero pa fortifiká nos konfiansa.
Lesa Lk. 18:9-14. Kua ta akinan e lès krusial over di orashon?
E fariseo a spera Dios aprob’é a base di loke ku e a hasi, su obranan di hustisia. E
publikano a tira su mes na miserikòrdia di Dios i a roga pa aseptashon a base di e grasia
di Dios. Dios Su aseptashon ta bin pa nos, no riba base di ken òf kiko nos ta, pero dor di
Su grasia so. Solamente esnan ku ta penitente, humilde, i kibrá den spiritu por risibí e
grasia ei. “Mansedumbre i humildat ta e kondishonnan di éksito i viktoria. Un korona di gloria ta warda esnan ku inkliná nan mes na e pia di e krus.” – Ellen G. White,
Prophets and Kings, p. 590.
Hende ku no a yega di konosé Dios ta inkliná pa kompará nan mes ku esnan ku,
supuestamente, ta mas malu ku nan; tur esaki pa konvensé nan mes ku nan no ta dje
malu ei. Dikon esei ta asina un desepshon spiritual? Ta kiko ta importá si otronan ta
mas malu ku nos?
97
Djaweps
Djabièrnè 15 mei
Mas Estudio: “E alma ku diariamente, pa medio di orashon sinsero, bira den direkshon di Dios pa yudansa, sosten i poder, lo tin aspirashonnan nobel, persepshonnan
kla di e bèrdat i di deber, propósitonan di akshon elevá, i un hamber i set kontinuo
pa hustisia. Manteniendo un konekshon ku Dios, nos lo ta kapas pa plama na otronan, dor di nos asosiashon ku nan, e lus, e pas, i e serenidat ku ta goberná den nos
kurason. E forsa alkansá den orashon na Dios, uní ku esfuerso perseverante edukando e mente den konsiderashon i tene kuidou, ta prepará hende pa debernan di tur
dia i ta mantené e spiritu na pas bou di tur sirkunstansia.” – Ellen G. White, Thoughts
From the Mount of Blessing, p. 85.
“Yamando Dios nos Tata, nos ta rekonosé tur Su yunan komo nos rumannan. Nos tur
ta parti di e gran nètwèrk di humanidat, tur komo miembro di un famia. Den nos petishonnan nos mester inkluí nos próhimonan komo nos mes tambe. Ningun hende ku ta
buska bendishon pa su so, ta hasi orashon di forma korekto.” – p. 105.
Preguntanan pa Diskushon:
• E konekshon ku Lukas ta pone entre Hesus i Spiritu Santu no ta terminá ku e evangelio aki so. Ningun hende por lesa e buki di Echonan, e di dos volúmen di historia
di e iglesia kristian, sin nota e dinamismo poderoso di Spiritu Santu den bida di e
komunidat kristian, su mishonnan, i su ministernan. Enbèrdat, solamente Lukas ta
registrá Hesus Su instrukshon, despues di Su resurekshon, na Su disípulonan pa keda
na Herusalèm te ora ku nan “wòrdu bistí ku poder for di ariba” (Lk. 24:49), promé ku
nan por a bai na e finnan di tera ku e mensahe di e Salbador krusifiká i resusitá. Lukas
e ora ei ta kuminsá e buki di Echonan ku Hesus ripitiendo e promesa di Spiritu Santu
(Ech. 1:7, 8) i e promesa kumplí na Pentekostes (Ech. 2). Kiko tur esakinan ta bisa nos
over di e tarea sentral di Spiritu Santu den bida di e iglesia?
• Den ki formanan e hecho mes di orashon ta un rekonosimentu di nos dependensia
riba i nos nesesidat di Dios? Lesa Lk. 18:9. Kua problema spiritual profundo Hesus
tabata tèkel ku e parábola ku a sigui?
98
Djasabra 16 mei
Djasabra
E LÈS DI FORMA RESUMÍ - KOMENTARIO PA MAESTRONAN
Versíkulo Klave: Lk. 11:9-11
E STUDIANTE LO:
Konosé: Realisá ku den Su bida i ministerio, Hesus a keda serka di e Spiritu Santu i
tabatin un bida di orashon modelo.
Sinti: Komprondé kon dependiente e hende ta di e Spiritu Santu i di orashon ora di
kana den e kaminda kristian.
Hasi: Buska guia di e Spiritu Santu i “hasi orashon semper.”
DESKRIPSHON DI ESTUDIO:
I. Konosé: Relashon di Hesus pa ku e Spiritu Santu i Orashon
A. Kon Hesus tabata konsiderá e Spiritu Santu? Tabata nesesario p’E, siendo divi
no, pa ta asina dependiente di e guia di e Spiritu?
B. Ki funshon orashon tabatin den e ministerio di Hesus?
C. Kiko Hesus a siña [nos] over di orashon?
II. Sinti: Dependensia riba Spiritu Santu i Orashon
A. Kon nos, komo kristiannan, por haña forsa di e Spiritu Santu? Kon
nos akshonnan i karakter ta reflehá kon serka nos ta di e Spiritu?
B. Dikon orashon ta importante den nos bida? Kiko e ta revelá over di nos
konekshon ku Dios?
C. Kiko nos por siña di e bida di orashon di Hesus? Kon orashon ta kapasitá nos pa bringa e batayanan di bida?
III.Hasi: Buska e Spiritu i Biba un Bida Yená ku Orashon
A. Kua ta e seguridatnan ku nos tin di un bida ku ta kontrolá dor di e Spiritu?
B. Kiko “hasi orashon sin stòp” ta nifiká, i kon nos ta manifestá e prinsipio ei den nos bida?
Resúmen: Fe i bida kristian ta nasé i alimentá dor di e Spiritu Santu, i ta esensial ku e
bida aki wòrdu sostené atraves di un konekshon kontinuo di orashon, gradisimentu,
interseshon, i dependensia riba Dios.
99
Djasabra 16 mei
Djasabra
STAP 1—MOTIVÁ
Spòtlait riba Skritura: Lk. 3:16; 4:1; 6:12, 13; 22:39-46
Konsepto Klave pa Kresementu Spiritual: “Pasobra tur ku ta guiá dor di e Spiritu
di Dios ta yunan di Dios” (Rom 8:14, NRSV). “Pasobra . . . boso a risibí e Spiritu di
adopshon dor di kende nos ta sklama: ‘Abba, Tata” (v. 15, NKJV). Meskos manera ku
Spiritu Santu i orashon tabatin un funshon klave den e bida terenal di Hesus - for di
konsepshon te na e tentashonnan den desierto, for di Getsemaní te na e krus – asina
mester ta ku nos. Un kanamentu i serkania enkantador ku Spiritu Santu i un fe inmovibel den e poder di orashon por sigurá nos di kresementu spiritual, desaroyo, i e último
rekompensa.
Djis pa Maestronan: E relashon será entre Hesus i e Spiritu Santu ta proveé nos
ku un lès di e sekretu di un bida di fe eksitoso. I e bida aki por ta sostené, desaroyá, i
santifiká pa gloria di Dios si nos kumpli ku loke Hesus a hasi: mantené un konekshon
kontinuo ku Dios pa medio di orashon. Hesus tabatin un bida viktorioso dor di Su
konekshon ku e Spiritu i dor di Su dependensia riba e Tata pa medio di orashon. Nos
tambe por.
Habriendo Diskushon: Hesus ta e Segundo Persona di e Deidat. E ta Dios. Komo
hóben E tabata kompletamente konsiente di esaki. Dikon anto tabata nesesario pa E
warda riba e bahamentu di Spiritu Santu na boutismo promé ku E por a kuminsá ku
Su ministerio? I dikon tabata nesesario pa Kristu buska Dios Su boluntat, pa medio di
orashon, atraves di Su ministerio i hasta durante di Su dianan final?
STAP 2—EKSPLORÁ
Djis pa maestronan: “E orashon di Kristu {na Su boutismo} na fabor di humanidat
pèrdí a traspasá kada sombra ku Satanas a tira entre hende i Dios, i a laga un kanal di
komunikashon habrí te na e trono di gloria. E portanan a wòrdu lagá habrí, e shelunan
a wòrdu habrí, i e Spiritu di Dios, den forma di un palomba, a sirkulá e kabes di Kristu,
i e bos di Dios por a wòrdu skuchá bisando: ‘Esaki ta Mi Yu stimá, den ken Mi tin goso.”
– Ellen G. White Comments, The SDA Bible Commentary, tomo 5, p. 1078. Orashon i
e Spiritu Santu tabata e fuente di Kristu Su forsa den bringa kontra di kada barera ku
Satanas a pone den Su kaminda. Miéntras bo ta studia e lès di e siman aki, tene bo klas
enfoká riba Hesus i e Spiritu, Hesus i Su bida di orashon, Hesus i nos bida di orashon.
100
Djasabra 16 mei
Djasabra
KOMENTARIO BÍBLIKO
I. Hesus i Su Bida di Orashon (Revisá Lk. 3:21 i 22:39-46 ku bo klas.)
Kristu Su promé akto despues di Su boutismo tabata di ta Su so den orashon i
komunion ku Su Tata. E tabatin mester di tempu pa planeá e kaminda ku tabatin Su
dilanti. E por a mira e krus na un distansia, pero e distansia ei no mester ni dim Su
vishon ni daña e propósito pa kua E a bin. Asina anto, durante di 40 dia E a permití Su
alma pa lucha, stabilisá, i ta fortifiká. Un alma den komunion ku Dios ta un maldishon
pa diabel.
Kristu Su viktoria den e konflikto ku Satanas ta mustra kon serka i íntimo Su
relashon ku e Tata tabata (Lk. 4:1, 2). Miéntras ku un sentido di mishon tabata mantené Su direkshon den enfoke, konfiansa den e Palabra di Dios i komunikashon kontinuo ku nÉ a duna Hesus motibu pa kore ku esun malbado. Tabata Su relashon personal
i kontinuo ku e Tata ku a sostené den kada bataya di bida. Komo humano Hesus a usa e
poder di orashon pa mantené kontakto ku e Fuente di poder di shelu.
P’esei, promé ku kada evento importante den Su bida – sea ku ta e skohementu di
e Diesdosnan, e Transfigurashon, e bataya den Getsemaní, òf e morto na e krus. (Lk.
6:12, 13; 9:28-36; 22:39-46; 23:46) – Hesus tabata hasi orashon pa haña forsa, rumbo,
i guia for di Su Tata. Komo hende E tabata roga na e trono di Dios te ora ku Su humanidat tabata kargá ku un koriente selestial ku mester a konektá humanidat ku divinidat.
Dor di komunion kontinuo E a risibí bida for di Dios, pa asina E por a impartí bida na e
mundu.” – Ellen G. White, The Desire of Ages, p. 363.
II. Kristu i Nos Bida di Orashon
Dor di siñansa i ehèmpel Hesus tabata spera pa Su disípulonan komprometé nan
mes na un bida di orashon si nan kier a purba e bondat di Dios, ta partisipantenan
aktivo den Su mishon, i pa tin éksito den e luchanan diario kontra di e desepshonnan di
Satanas.
Ki sorto di bida di orashon nos mester tin? E evangelio di Lukas ta registrá Hesus
dunando nos algun prinsipionan general di orashon, un orashon modelo, i algun kalidatnan ku mester karakterisá orashon.
• Prinsipionan general ku mester guia orashon di un kristian: hasi orashon pa bo enemigunan (Lk. 6:28); hasi orashon pa Dios Su obra mundial (Lk. 10:2); hasi orashon pa
kurashi spiritual (Lk. 18:1); hasi orashon ku konfeshon i humildat (Lk. 18:410-14); hasi
orashon semper (Lk. 21:36); hasi orashon pa no kai den tentashon (Lk. 22:40, 46).
• E orashon modelo (Lk. 11:1-4): E orashon ‘Nos Tata’ ta rekonosé e sentralidat di Dios.
Un orashon mester kuminsá einan; di otro forma, e ta stòp di ta orashon. Orashon
101
Djasabra 16 mei
Djasabra
ta tuma tambe nota di nos – nos ta e otro banda di e konekshon. Na un banda nos ta
rekonosé Dios Su supremasia, prioridat di Su reino, i perpetuidat (durashon ilimitá)
di Su boluntat. Na e otro banda, nos ta roga pa nos supsistensia, pa poder pa vense e
trosementunan i biradanan di bida, i pa biba mas ayá di loke ku nos no a konosé i no
a purba. Nos pasado, presente i futuro ta bin bou di e búskeda i e promesa di un Dios
ku nunka ta faya.
• Kalidatnan ku mester karakterisá bida di orashon: Siguiendo e modelo di Getsemaní, nos orashonnan mester tin na nan núkleo sentral: “no mi boluntat, pero esun
di Bo.” Ora ku esei tuma lugá, e ingredientenan di un orashon signifikativo ta sigui:
gradisimentu, dependensia kontinuo riba Dios, persistensia, penitensia, humildat,
etsetera (Lk. 11:5-8; 18:9-14).
Pregunta di Diskushon: “Mi no ta laga bo bai a ménos ku Bo bendishoná mi,” Jakòb
a boga (Gen. 32:26, NKJV). Esei ta un bon ehèmpel di un orashon persistente. Di kua
otronan bo por pensa?
STAP 3 —APLIKÁ
Djis pa maestronan: E konekshon ku Lukas ta pone entre Hesus i e Spiritu Santu no
te terminá ku e evangelionan so. Ningun hende por lesa e buki di Echonan, e segundo
volúmen di historia di e Iglesia Kristian (esun promé ta e evangelio di Lukas), sin nota
e dinamismo poderoso di e Spiritu Santu den bida di e komunidat kristian, su mishon, i
su ministronan. Enbèrdat, solamente Lukas ta registrá e instrukshon ku Hesus a duna,
despues di a resusitá, na Su disípulonan pa keda Herusalèm te ora ku nan wòrdu “bistí
ku poder for di ariba” (Lk. 24:49) komo un kondishon pa bai na e finnan di tera ku e
mensahe di un Salbador krusifiká i resusitá.
Preguntanan pa Pensa:
• Dikon Lukas ta kuminsá e buki di Echonan ku Hesus ripitiendo e promesa di Spiritu
Santu (Ech. 1:7, 8) i djis despues e kumplimentu di e promesa na Pentekostes miéntras ku e apòstelnan ta den orashon kontinuo (Ech. 2)?
• Kon e Spiritu i orashon ta kombiná pa lansa e movementu di mas grandi riba tera – e
iglesia di nos Dios eterno? Ki logro maravioso ta posibel i ta nesesario awe?
102
Djasabra
Djasabra 16 mei
STAP 4 —KREA
Djis pa maestronan: Lukas ta registrá ku Hesus tabata konstantemente den orashon, i esaki tabata bèrdat, spesialmente promé ku krísisnan i eventonan prinsipal den
Su ministerio, tal manera e tentashonnan den desierto (Lk. 4:1-3), e skohementu di e
diesdosnan (Lk. 6:12, 13), i Getsemaní (Lk. 22:39-46). Pidi bo klas pa identifiká/imaginá situashonnan di posibel krísis, invitando nan pa nan kompartí kon nan lo hasi orashon i ki guia di Skritura nan lo buska. Algun di e krísisnan òf eventonan aki por inkluí:
Pèrdèmentu di trabou: Salmo 23:
Un ser stimá ku ta sufri di kanser
Infidelidat pa ku un kasá
Matrimonio di un yu
103
Djasabra 16 mei
Djasabra
MEDITASHON
LUKAS 11:1-4, 13
PREGUNTA PA KIBRA EIS:
Paul ta kaba di drenta paden i e ta tende ku e kombersashon ta tokante
‘Nos Tata’. Paul su tata mes nunka tabat’ei p’é. Kon abo por splik’é ku
akinan ta trata di ‘algu’ òf di un ‘otro hende’?
MI TA REKONOSÉ:
Lukas tabata sinti su mes bon na kas den tantu e kultura Hudiu i esun helenístiko.
Probabelmente e no ta kristian di e promé generashon. E tin bon konosementu
di Tèstamènt Bieu, ku e konosé for di e Septuaginta (ku ta e tradukshon Griego).
Lukas ta konvensí ku Hesus ta e Ungí di Dios, e Mesias. For di e konvikshon ei e
ta skirbi su evangelio.
E orashon ku Hesus a siña Su disipelnan tin serka Lukas un otro forma ku den
Mateo. Tambe ta dun’é na un momentu hopi diferente. Por wèl’i ta ku Hesus a
ripití e orashon ei na diferente momentu, pero por ta tambe ku Lukas a skirbi’é na
un otro forma.
MI TA STUDIA:
Lukas ta deskribí detayá e sirkunstansianan bou di kua e ‘Nos Tata’ a wòrdu duna
na e alumnonan. Komienso di e orashon ta diferente for di esun den Mateo, i e ta
mas kòrtiku. E ta un súplika pa tene Dios Su nòmber santu, i ta wak padilanti na
Su reino. Despues ta bini petishonnan pa bendishon den bida, pa pordon i forsa
pa pordoná. Despues un súplika pa tene tentashon leu for di nos.
● Kua ta e sirkunstansianan bou di kua ta duna e orashon den Lukas? (versíkulo 1)
● Papia di loke tin diferente den e orashon den Lukas i esun den Mateo (wak
Mateo 6:9-13).
● Kon nos por evitá ku e orashon aki, ku ta kompletu ma tambe kòrtiku, no para
bira un orashon ku nos ta djis resa mekánikamente?
Despues Hesus ta konta un historia di sirbishi na otro i pa ta dispuesto pa yuda
otro. Den e historia aki no ta papia bon di hende. Asta e palabra ‘malbado’ ta kai.
Sinembargo, siendo malbado, nos sa hasi bon obranan. E problema ta ku nos no
ta praktiká nan semper. Ku esaki Hesus ke indiká ku pa e motibu ei nos no mester
tin miedu di bai serka Dios.
104
Djasabra 16 mei
Djasabra
● Lesa Lukas 11:13. Pakiko nos no mester duda nunka di Dios Su intenshonnan? Lesa
tambe e tekstonan ku ta bini promé i esnan ku ta bini despues, ora bo ta formulá bo
kontesta.
● Kiko Spiritu Santu tin aber ku un historia tokante pan i hospitalidat?
MI TA APLIKÁ:
Lukas no ta papiando solamente ku su mes miembronan di kongregashon na final di
promé siglo, pero tambe ku e generashonnan ku lo bini despues, te den nos tempu.
Esaki ta nifiká ku nos tambe mester sinti ku ta hala nos atenshon na e orashon ku
Hesus a siña Su siguidónan. E mester apliká pa nos tambe kaminda hende ta laga otro
den pèrtá.
● Tin momentunan den bo bida kaminda e orashon di ‘Nos Tata’ a hala bo atenshon?
Lo bo ke kompartí algu di esei?
● Den ki forma abo por pèrkurá pa bo no laga bo próhimo na kaya ora e tin mester di
bo? Por tin momentunan ku asta na kas bo no ta duna?
● E teksto ta indiká ku Dios nunka ta laga nos na kaya. Bo tambe a yega di eksperensiá
esei? Den ki forma bo ta ripará ku Dios ta duna guia na bo bida?
MI TA RESA:
Señor, danki pa un orashon kompletu,
ku den dje tin gloria na Bo, medionan
pa supsistensia diario, gratitut pa
pordon, forsa pa pordoná nos mes, i e
deseo pa no wòrdu tentá. Señor, yuda
nos hasi bon segun nos posibilidatnan. Yuda nos pa nos t’ei pa otronan.
Nos ta trese nos preokupashonnan i
nos dudanan (bisa kua nan ta) dilanti
Bo, i ta pidi si Bo ke yuda ... (bisa e
nòmber òf nòmbernan) pa e topa ku
Bo i pa e konfiá Bo ku su bida. Yuda
nos den e siman aki pa sostené otro
den orason i echo.
105
© Copyright 2024 ExpyDoc
