Es nöis Jahr fat a - Schleusenverein CH

Es nöis Jahr faat aa
© Maya Delaquis
Scho weder isch es Jaar verby!
Silveschter isch doch ersch grad gsy!
Mini Zyt rennt schnäu voruus.
Eg hingerhaär, es isch e Gruus.
Für aues dünkt’s mi sig i z‘schpäät,
wie wenn i Gwicht a de Haxe hätt.
Mängisch chum i chuum voraa,
cha ruedere so fescht i maa.
Tifiger gei’s trotzdäm chuum.
Was mach i fautsch, was louft da chrumm?
I ma eifach nümme g‘choo
mit dämm, wo ni mer ha vorgnoo!
Es isch mer, i sig langsam worde,
chönn nümme, was i sött iiordne.
De plötzlech geit mer aues z‘ schnäu.
Gsee nume no dunku, nümme häu.
Chume totau i nes Züüg,
u frage mi, wo Zyt heflüüg‘.
U gang i chli schnäu us em Huus,
de geit mer o mau der Schnuf uus.
Mues i de nöime i erscht Schtock,
de piischten i, wie ne auti Lock.
Chas sy, isch z‘ Läbe müehsamer worde?
Das plaaget mi, das macht mer Soorge!
I cha se nid schtoppe, d‘Zyt geit verby.
I cha’s nid ändere, es blibt derby
Z‘aute Jahr isch ändgöutig gloffe un eg ir Arbeit fasch versoffe.
Eso chas nümme witergaa.
Mis Tempo.- I muess öppis ändere draa.
Veu gueti Vorsätz tue ni nid fasse,
süsch überlouft si weder, mini Tasse.
I dänke, weniger sig meeh
u mängs mües eeg eifach la gscheeh.
Meeh möchte i weder ga schpaziere
u schöne Sache nacheschtudiere.
Die Zyt wo mer blibt, die wott i nütze
u mi nid nume i d‘ Arbeit schtürze.
Mys Tempo, das mues i o aapasse.
Grad da wott i bsunders guet ufpasse.
I muess nümme aues haa,
cha o mau öppis eifach la schtaa.
I möcht mer Zyt nääh für die Sache
wo mer würcklech Föid tüe mache.
Gchrampfet han eeg i mim Läbe gnue
u ha’s se verdienet mini Rueh.
Mit der Zyt muess i nümm Schritt haa,
die chan‘ eeg o eifach mau la gaah.
Z‘ Umefreese teu ni chli vergässe.
Das macht chrank, tuet eim uffrässe.
Eeg wott’s jetz e chli gmüetlech nääh
u mer mini Zyt o gääh.
Möcht mer würcklech öppis gönne
u syg’s o nume, d’ Zyt elei la z’renne.
U so, gloube ni isch es guet.
Es git mer weder nöie Muet.
U z‘frede fang i z‘ Nöie Jaahr aa.
Ds aute Jaahr lan i ändgültig schtaa.
Tatzliger z‘ gaa han i mer vor gnoo.
Schlussändlech han i de meh dervoo.

Download Report