Excursiun atunila al Lag blau en Sursaissa Suenter che la Scola superiura Lumnezia ha stuiu stuschar il datum dall'excursiun atunila buca meins che duas gadas per motivs da schliat'aura, ha quella finalmein giu liug venderdis, ils 2 d'october 2015. Malgrad che la prognosa dall'aura fuva buca fetg empermettenta, han las persunas d'instrucziun ughegiau da far las turas alpestras, quintond fermamein cun gl'agid dil favugn. Las tiarzas classas realas e secundaras ein marschadas dalla «Lumbreinerbrücke» ella val Valgronda da Sursaissa en direcziun dil Lag blau. Il tschiel fuva lev cuvretgs, denton l'aura da favugn pareva da dar damogn all'aura dado onz freida e bletscha. E veramein, duront il dallas nov silla «Inneralp» sclareva il sulegl ed ils nibels sesligiavan cun ried el vent cauld dil sid. Quei ei denton stau in cuort intermezzo meteorologic. Arrivond da miezdi si tiel Lag blau, in liug idillic ch'envida da star e semiar, semida l'aura radicalmein. Neu dil nord surpren l'aura dado il domini e giu dil Péz Valgronda buffa in vent satel che va tras pial ed ossa. Enstagl da guder l'atmosfera romantica spel laghet alpin, consumein nus il gentar tut alla bahuta, enzugliai en giaccas cauldas, capetschas e capuzas. Silsuenter ascendin nus La Siala sur il lag e contonschein in'altezia da 2509 meters sur mar. Sil davos tschancun fagein nus enconuschientscha cull'emprema neiv digl unviern vegnent. Loschs dil contonschiu dein nus aunc ina davosa egliada giu sil lag solitari el profund dalla foppa al pei dil Péz Valgronda e dil Péz lad. Dallas 12.15 uras semettein nus sin via anavos dall'alp Gren giu a Meierhof. Il viadi da retuorn cuozza varga duas uras, malgrad che nus havein buca fatg ina suletta pausa. La val Valgronda da Sursaissa ei buca mo gronda, ella ei era liunga e para dad haver negina fin per tut tgi che conquista quella a pei. Commentaris dallas fotografias: 01 Carta geografica culla ruta dalla tura «Lumbreinerbrücke-Inneralp-BlauseeSattel-Gren-Lumbreinerbrücke-Meierhof» 02 Pausa sulegliva dil dallas nov silla «Inneralp» 03 Pausa da gentar alla riva dil «Blausee» 04 Enstagl da termagliar cull'aua vegn stau a garnugl per sedustar dil vent freid 05 Vesta sil lag alpin «Blausee» en Sursaissa 06 La buna luna resta, malgrad las temperaturas d'unviern 07 Cuntinuaziun dalla tura alpina dil lag sil «Sattel» 08 Ascensiun dil «Sattel» en caultscha cuorta 09 Vesta mistica dil «Sattel» enviers la cadeina dil Signina 10 Arrivada sil «Sattel» e descensiun en direcziun dall'alp Gren 11 Davosa egliada da cumiau sil laghet alpin «Blausee» Scola superiura Lumnezia Vella, ils 9.10.2015
© Copyright 2024 ExpyDoc
