- Niederdrees

Dä Überläufer
Jetz ess doch jlatt ald wedder e janz Johr en et Land jetrocke, zick däm ich he et
eetste Mol als Frischling jestande han!
Jenau an däm Daach wood et Martha Lindenthal 85, un mer han dat öntlich
zesamme jefiert.
Wie immer wollte mir och ene Bunekünnich finge un däten deshalv e klein
Muuzemändelche en e Stöck Sahnetaat stecke. Echte Bunne ze nemme, kann
mer jo nit riskeere: Et künnt jo sin, dat e paar Zäng fleje jonn, wenn einer vun
Üch do drop bieß!
Dat Koocheesse jing loss, ävver keine dät sich melde, dat hä en Bunn jefunge
hät. Also jingken mir eröm un luurten op die Tellere, ov do irjendwo e
Nunnefützje am Rand looch.
Un tatsächlich: Beim Martha woodten mir fündig. Dat hatt dat
Muuzemändelche usssorteet un jemeint: „Dat jehüürt ävver nit in dä
Sahnekooche erin!“
Trotzdäm: Mir hatten uns Bunnekünnijin! Dat Jebootsdaachskind kräht dann
sing Kron opjesätz un woss jah nit, wie im jeschoh!
Ich jläuve, esu ene Jebootsdaach hät dat Martha noch nie jefiert. Et hatt och
vell Spaß, ovwohl sing Schwester meinten, wenn et dat all vürher jewoss hätt,
wör et nit jekumme!
En Zick drop wood dä Maibaum opjestellt. Mir stundten ald all parat an d’r Eck
Kreuzburgwääch/Ahl Holzjass, dä Baum looch om Ware, de Feuerwehr und dä
Spellmanszoch en de Startlöcher. Ävver et dät sich nix. Woröm nur? Op emol
schoss ene Trecker met Hänger met Karacho uss däm Feldwääch rächs eröm.
En d’r Kurv nohm hä noch ene Latänepohl met, avjebrochene Deile flochen
vum Hänger – un fott wor hä! Wat wor dat dann?
Et wor dä Chorleiter vum Männerjesangsverein, dä en Arbeitsklamotte om
letzte Dröcker vom Feld jeschosse kohm! Jetz moht dä sich joh nur noch
ömtrecke un sich Richtung Kirch bewäje zom Maiansinge, un mir kunnten uns
dann met unserem Baum och endlich in Jang setze!
An de Kirch anjekumme, wood dä staatse Baum jeschmück un vun dä
Feuerwehrlück op altherjebraahte Aat un Wies met Leidere professionell en de
Senkrech gebraaht.
Anschleeßend mohten mir joh jetz dä Mai aansenge: Dä Männerjesangsverein
hatt sich op dä Kirchetrepp opjestellt. All – och dä Chorleiter – hatten sich
staatsjemaht: Em dunkle Aanzoch, met Schlips un feierlichem Jeseech, fingken
se an ze singe. Dat wor esu schön un herrlich stimmungsvoll – wenn nur nit am
Treppejeländer vür däm schwatze Aaanzochhingergrund dat neonjähle Schild
jehange hätt! Dodrup stund: „einjeschränkter Winterdienst“. Em Mai!!!
Et ess och kaum einem opjefalle, dat dä Paukist vum Spellmannszoch „Echo“ ,
och met feierlichem Jeseech, ald en de Badeschlappe do stund un sing Trum
met Inbruns schlare dät! Summer hatten mer doch och noch nit – oder???
Fronleichnam hatt ich mer vürjenumme, in d’r Prozession metzejonn. Do jov et
ävver vürher en Mess. Un die wor mer vell ze fröh! Zick dat ich Rentner ben,
weiß ich: Fröh opstonn ess dä eetste Schrett in de falsche Richtung!
Jetz woss ich joh nit, wie lang dä Pastuur für die Mess bruche dät, un daachten
bei mir: Wenn Du die Balkondüür opmähs, hüürst de se joh bedde un singe,
wenn de Prozession lossjeht. Do hatt ich mich ävver verdonn! Als ich die Lück
et eetste Mol hüüre dät, un bess ich ahnjedonn am Kreuzburgwääch stund,
woren die ald lang fott. Die sin äch flöck he im Dörp!
Ich dachten joh, die kräht ich noch en, un ben mutterseelenallein övver dä
blötebedeckte un beflaggte Kreuzburgwääch und die Niederdreeser Stroß
hingerherjestepp. Enjekräje han ich die Prozession nit, ävver pünklich zom
Schlusssäje wor ich an de Kirch.
Do ben ich ävver och nit mieh erinjekumme, weil die Lück ald aan de Düür
erusstundte.
Dat wor die eetste Fronleichnahmsprozession, die ich janz für mich allein jehatt
han!
Anfang September hatten mir 3 Daach Kirmes un Musikfess.
Do ben ich Samsdaachsovends ens hinjeschrömp, öm ze luure, wie dat he in
mingem Dörp esu avvläuf. Die Musikante vum Spellmannszoch „Echo“ stundten
met befreundete Vereine op däm ahle Schullhoff eröm. Dä Bürjermeester vun
Rheembach un unse Ortsvorsteher woren och ald do. Ävver keiner sahten jet.
Dann mahten sich die Vereine op dä Wääch durch et Dörp, un mir paar Ziveliste
troken in et Zelt, denn et dät in Ströme rähne! Ich erstund e paar blaue
Märkcher für mer jet ze drinke un ze esse kaufe ze künne, und dä Typ an de
Kass sahten: „ Am Mondaach jit et jröne.“ Während die Musiker in däm Rähn
drissnaaß woodte, nohm dä Büsers Ralf et Mikro un meinte: „ Die Kirmes
wurde vor einer Viertelstunde eröffnet.“ Do wor ich ävver platt!! Dat hatt ich
jah nit jemerk! Ävver de Haupsaach ess joh, wenn de Verantwortliche wesse,
an welchem Punkt dä Festivitäte se jrad anjekumme sin!
Sunndaachs wor ich och wedder do, han mer neue blaue Märkche jekauf un
met Möh un Nuut fass all verbrode. Am Mondaach zom Rievkoocheesse hann
ich dä Ress ze Hus jelosse, ben an die Kass un wollt jröne Märkche kaufe. Ävver
die worden immer noch blau!
Drusse han ich dat e paar Wiever jesaht, die do zesammestundte, un die Frau
Raaf dät och verzälle, se hat ihrem Mann am Daach vürher all blaue Märkche
metjejovve, weil et joh am Mondaach jröne jevve sollt. Dä hät sich dann och
ärch anjestrengt, die Märkcher losszeweede, hätt sujar Runde jeschmesse! Ich
wor also nit die Einzije, die se met dä jröne Märkche verascht hatte!
Mer moss he janz schön oppasse bei dä Ureinwohner vun däm kleine Dörpche
hinger dä Kääzefabrik!
Em Oktober wood dat Krämers Renate 70! Un weil et esu fröh dodran jedaacht
hatt, blivv im beim „Tom“ nur noch dä Sunndaach zom Fiere, un mir woren öm
10 Uhr zom Brunch enjelade. Mir hatten jesammelt für e Jeschenk, un et Dina
erklärten sich bereit, dat kleine Päckche dekorativ en enem riesenjruuße
Kartong ze verpacke un mit singem Auto och zom „Tom“ ze transporteere. Et
ess joh emmer joht, wenn einer esu jet övvernimmp – dann han die andere
domet kein Sorch mieh!
Als ich also an däm besachte Sunndaachmorje öm Veedel vür zehn dä
Schwalbewääch erunger fuhr, soh ich däm Dina sing Auto jäjenövver vun
Kowals Huus stonn. Ich dacht: „ Dat nemp bestemmp et Jerda met.“ An unserer
Donnersdaachs-Eck stundten noch e paar Wiever, un ein dovun meinten, dat
Dina hätt noch en de Mess jewollt. Joh – wie sollt dat dann jonn? Dann kunnt
dat dat ävver nit bess 10 Uhr nohm „Tom“ schaffe! Mir beschlosse, och ohne
Jeschenk ald ens do opzeschlare.
Uns Dina verzällten nohher, et wor noch an de Donnersdaachs-Eck vürbei
jefahre, un als do keiner stundt, fing et an ze simmeliere. Beim „Tom“ jov et, als
dat do endlich ankohm, och keine Parkplatz mieh in d’r Nöh, un esu moht dat
ärme Minsch dä Riesekartong och noch wick schleppe un domet allein die
Trepp eropklabastere. Mir hann dat joh och jah nit kumme jesinn, denn als dat
kohm, wore mir ald am esse. Sonst hätte mir däm joh natürlich jeholfe.
Ich jläuve, dat wor e Jeschenk met de Höhere Weihe. Wenn dat nix ess!
De 3. November erwaaten ich meddachs ming Fründin Lisa, die, wenn se
morjens un ovends in Rheembach Deens hatt, bei mir jet schlofe kohm. Ich hat
uns jet jekoch un wor dobei, e paar Deil fottzespöle, als die Klingel jing. Ich
daacht: „Wiesu schellt dat? Et hät doch ene Schlössel.“, nohm die Hängk us
däm Spölwasser, drückte dä Türöffner, leet die Korridordüür opstonn un jing
wedder en de Köch. Vun do uss hüürten ich, wie eine sich langsam met Möh
die Trepp eropschleppte. Ich daacht: „Dat han se ävver hück jeschaff!“ un reef
uss dä Köch: „Da kommt ja der müde Krieger!“ Ävver do kohm keine erin,
sondern vum Dürpel tönte en deefe Stemm: „Guten Morgen, Frau Zensen.“ Ich
luurten öm de Eck – un wat moot ich sinn? Dä „müde Krieger“ wor dä Herr
Neumann, dä mich frore wollt, ov ich en dä Jury für die Latäneprämierung beim
Määteszoch metmaache künnt!
Esu schnell kann et kumme, dat us enem ehemalije Offezier vun d’r
Bundeswehr ene möde Kreejer weed.
Do moht dä bloß ens bei mich kumme!!!
He em Dörp treffe sich joh rejelmäßig e paar Wiever reihöm zom Stricke. Die
sin all nit mieh taufrisch, un esu bliev et nit uss, dat se sich övver ihr Moleste un
Wehwehche usstuusche. Et Dina soß dobei met singem funkelnarelneue
Hätzschrettmacher, Kowals Jerda met singem gebruchte, un die Frau vun
Köller hatt de Scholder jebroche.
Nevvenbei wood och noch jet jestrick, un op emol frochten ein Frau dat Dina:
„Brummt Dein Herzschrittmacher auch immer so?“ Dat Dina meinten: „Enä.
Meiner brummt nicht.“ Dodrup die andere: „Aber Gerdas brummt.“ Wodrop
dat Jerda saht: „Meiner brummt auch nicht. Das ist mein 24-Stunden-EKG.“
Domet woren die medizinische Frore für dä Daach ömfassend avvjeklärt un mer
kunnt – bejleitet vun enem dezente Brumme av un zo – beröhigt wigger stricke.
Su – jetz sinn mer ald in de Adventszick anjekumme: Am Nikolausdaach wor ich
ungerwächs gewess, hatt dä Nikolaus jespellt un die ruude Mötz noch an, als
ich noh Hus fuhr. Am Lerchewääch anjekumme, soch ich dat Krämers Renate,
dat am Auto met Usslade beschäftigt wor. Zo singem blaue Anorak, die Kaputz
om Kopp, trock dat Badeschlappe! Ich öm die Eck, die Autoschiev erav un
frochten met deefer Stemm: „Warst Du denn auch brav?“
Dat hatt ich ävver nit jekannt: Dat Renate fuhr zesamme, driehten sich eröm,
maaht e wöödisch Jeseech, soch mich met dä Nikolausmötz und reef: „Du bist
vielleicht bescheuert!“
Saht ens: Sprich mer esu mem Hillije Mann?
Et jitt joh och noch andere Lück, die behaupte, dat dat Krämers av un zo en
Meise hät! Ich han dä Vurel sujar persönlich kenne jeliert: Als mir am
Neujohrsmorje vun dä Stroß wedder in däm Renate sing Wohnzimmer kohme,
soß en Blaumeis op dä Jardingestang! Mir han die dann tirek erus
komplimentiert, avver ich jläuve, vun Zick zo Zick sitz die widder do!
Am Neujohrdaach hät joh dat Erlenbachs Ulrike Jebootsdaach. Ich mahten mich
op, öm däm ze jrateleere, un all Lück op de Stroß wünschte sich e jood neu
Johr.
Weil se joh e paar Daach vürher bei Büsers enjebroche hatte, wor dat och
Thema bei Erlenbachs, un als ich vun do fott jing, soch ich jäjenövver e
verdächtich ald Auto met Mönchenjladbacher Nummer vür Steins Jrondstöck
stonn. Dohinger en mir unbekannte Frau, die esu verdächtich unauffällig luure
dät. Ich fixierten die, un weil ich daacht, dat die jrad Schmier für ene Enbrecher
stund, wünschten ich der e fruh neu Johr met däm Zosatz: „So ist das hier bei
uns im Dorf!“ Dann ben ich wiggerjejange met däm joode Jeföhl, ne Enbruch
verhindert zo han!
Wat ich nit woss: Dat wor däm Ulrike sing Schwester, die op ihre Mann met
däm Jeschenk waade dät. Die hatt ich völlig irretiert, ävver mir kann keiner
nohsare, dat ich nit op ming Lück em Dörp oppasse!
Vielleicht wollt Ihr joh noch hüüre, wie dat Schedels Renate em Januar in et
Fitnessstudio jing: Alles luurten et an, un et daacht, et wör an däm Daach
besonders schön. Et föhlten sich jrußartich! – Bess et sich in esu en Maschin
klemme dät, wo mer hingen mem Kopp opkütt: Do merkten et nämlich, dat et
de Röllche noch en d’r Frisur hatt! Als die erus wore, hät et och keiner mieh
beluurt…
Dat wor et für dies Johr vum Überläufer, wie mer joh esu ene Frischling nit jrad
nett noh einem Johr nennt.
Ich bedanke mich bei Üch all dofür, dat Ihr mich esu fründlich he em Dörp
opjenomme hat. Ich ben janz jewess, dat mir für dä Vürdrach em nächste Johr
als wilde Sau widder jenoch Anekdötche ze Uhre kumme weede.
Ich wünsche mir, Üch all dann he ze treffe, un jevve Üch dä joode Root:
Verjesst et Ödeme nit!!!

Download Report