Bitzli lut, bitzli Gschtank, aber sunscht kai Gschyss. Fasnacht 2016 Todesstilli wäär doch bleed, s wurd nyt laufe, s wär mega eed. Mir hän lieber Action, ab und zue lärmt’s halt und soo. Aber wenn ewigi Rueh willsch, muesch uff s Heernli goo! Im Ärnscht: Nadyyrlig dien mr Ruggsicht nää. Aber anderi sotte au bitz Verständnis gää. Bref - Doleranz fiir die, wo andersch sin, macht hitte erscht rächt ganz vyyl Sinn. Mir heeben ab, dien fliege und fliege loo… nit nur an dr Fasnacht, das giltet au so. Sujet: Mir heeben ab __________________________________________ Gmietlig sitze mer am Rhy und leens lo schlyffe. Vo fäärn gheersch s‘Tattoo, si drummlen und pfyffe. Mer sin ganz lyyslig, wills dr Heer nääbedraa so will. Mer verzichte sogar wäägem “Gschtangg” uff dr Grill. Trotzdäm hämmer e ganz guete Chill und schloofe fascht yy, es isch esoooo still. Dr Rhy spieglet dr Himmel, d’Sunne schyynt iiber dr Ärderand. S‘fäält nur d’Prinzässin mit em Schimmel, und mer heeben ab ins Draimliland. WUMMS - e grasse Grach, es gnatteret und knallt, gheersch gar nimm, was di Kolleeg grad lallt. Und dr Heer vo nääbedraa lytet grad de Bullen aa. Mit em Tattoo und dr Patrouille Suisse hesch fascht immer dr Friide und fascht kai Gschyss. Dr Heer vo nääbedraa (iibrigens haisst er Hanselmaa) het gmaint, s‘gäb en Aaschlag, und schreit: “Zruggschloo am glyyche Daag”! Bombe siige d’Leesig vo jeder Schwiirigkait. Nai sorry, soone Dänggart duet uns laid! Drum loobe miir uns d’Patrouille Suisse. Drmit hesch kai Krieg und fascht kai Gschyss. Es wär doch scheen, wenn iiberall d’Jets wuurde fliege mit Iiberschall. Aber ooni Bombe und Maschinegweer, Drfiir mit Rauch, Effäggt und vyylem meer. Drnoo kasch denn aafoo, die andere Waffe au langsam bitz uff d’Sytte schaffe. Und denn heebe mer ab alli zämme und dien uns ab all dääne Waffe schämme. Denn wäärs wie mit dr Patrouille Suisse: Ganz ooni Krieg und fascht ooni Gschyss. Ych will mol mit soonere Maschine starte, ab uffe mit Vollgaas ooni z’warte. Mit em Rauch wurd y schryybe, das isch woor: “Pierrot Jungi Garde 25 Joor” Denn noone Gruess an Heer Hanselmaa, so dass er gseet, dass me Fraid ka haa, au wenn’s mool e glai weeneli lytter isch. Das gheert zuenere Stadt, checksch en, dr Fisch? Das isch s Glyyche wie mit dr Patrouille Suisse: Jetz kasch zer PIERROT gheere und pfyffe oder drummle leere. Wyteri Usskunft git dr d Obfrau Désirée Dreher, Delifon 076 539 50 79 oder eleggdronischi Boschd: [email protected] . Iebigsstunde sin am Zyschtigzoobe im Leonhardgymnasium. Am Frytig-Noomidaag, 19. und am Samschtig, 20. Hornig dien sich die Junge Garde uff em Barfi vorstelle und hoffe uff vyyl Bsuecher und Jungi, wo Inträssi hän. D Ladäärneuusstellig isch vom Määntigznacht, em 15., bis am Mittwuchdemoorge, em 17. Februar, uff em Minschterblatz. Deert kaa men iibrigens au alli Zeedel und Schnitzelbängg, d Blaggedde und dr Rädäbäng kaufe. Mer freuen ys uff Dyy Bsuech. De findsch uns au im Internet under www.pierrotclique.ch
© Copyright 2025 ExpyDoc
