Anton Battista PAOLI dettu Paoli di Tagliu (1858

Anton Battista PAOLI dettu Paoli di Tagliu
(1858-1931)
A miò biografia
N’acqui a Taglio in cinquant’ottu,
Fù di marzu a l’attracchjata ;
Nudu cume un pernicottu,
Frescu cume un’insalata,
Nizzulandu, grassu e tondu,
Feci entrata nu lu mondu.
Fate focu ; è un mascacchione !
Gridò à Babbu la mammana.
Tantu megliu, ete ragione,
Cume l’acqua di a funtana
Corga u vinu ; aiò ò zitelle,
Fate manferre e frittelle !
E pò, lestu infuriatu,
Tirò una gran plutunata ;
Ognunu dicìa : « Ch’è statu
Su culpacciu a l’ispensata ? »
Ma dòpu circa un minutu
U fattu era conosciutu.
Tuttu quantu u paisòlu
Ghjunse unitu e cungrigatu
A vede lu rusignòlu
Nu lu so nidu spiumatu ;
Un finì lu colla e fala
Tutta a notte pè la scala.
Quanti brindisi si fece
All’onor di lu fantinu !
Tenaci cume la pece
Tutti intornu a u tavulinu
Si bivìa e si cantava,
Si ridìa e si ciarlava.
Ed’eo sottu a lu linzòlu
Mi ne stava ingrufulatu,
Cu la miò mamma un era sòlu,
Era bellu accumpagnatu ;
Tuttu m’era indifferente
Canti, soni, roba e ghjente.
Ingrandai pian pianinu
Cume u querciu in la furesta,
Un piegai mai lu spinu,
Un calai mai la testa
Nè a tosi, nè a frisati
Nè a mustacci inturchjati.
A vint’anni fui suldatu,
Feci un sott’ufficiale,
Da tutti fui stimatu,
È lu più ch’importa e vale ;
Fà carriera un ci ebbi idea,
Mi ne junsi in casa mea.
Una sera a lu fucone
Babu disse : « Or piglia moglia. »
Li risposi : « Ete raggione
Bench’eo un ci abbia tanta voglia
Da figliòlu ubbidiente,
O bà vi staraghju a sente. »
Prestu allòr mi maritai,
Ebbi cumpagna fidata,
U miò babbu cuntintai,
Cinque fù la miò nidata,
I tre maschi l’aghju in guerra,
Unu in mare e dui in terra.
Ricacciatu da PAOLI DI TAGLIO, Risa e Pianti. Sunetti e Poesie varie c’un introitu di
Maistrale, Aiacciu, Stamparia di a Muvra, 1926, p. VII-X.

Download Report