Hoffnig Guete Morge mitenand

KW25 Montag
Hoffnig
Guete Morge mitenand
I hoffe sie händ alli a gueti Nacht gha und gönd mit Zueversicht
i dä neui Tag! Da isch min Wunsch für üs alli. I weiss natürli,
dass es au vili Mänsche git, wo ohni Zueversicht i dä Tag
gönd... Wieso isch da eigentlich so...? Es’fählt d’Hoffnig!
D’Hoffnig, dass d’Zuekunft öppis Guets bringt. D’Hoffnig uf
Erläbnis, wo eim ufstelled und freued.
Die Wuche wot i Gedanke zum Thema Hoffnig wiitergäh. Ich
wot si debi ermuetige aber au usefordere! Vieles hät mit mim
persönliche Handle und Denke z’tue. Mini achzgjöhrig Muetter
wo numme so guet gseht und au numme ganz sicher uf dä Bei
isch, hät es neus Halbtaxabo brucht. Si isch am Bahnhof
z’Schaffhuse an Schalter. Doh hät d’Frau am Schalter ihre
gseit, dass si es neus Foti brucht. Mini Mueter hät innerlich
scho überleit, wie mach i dah ...? D’Frau am Schalter hät da
gspürt und hät sie gfroget: Söll ich ihne debie hälfe? Dankbar
het mini Mueter da Aagebot aagno. Die Frau hät sie zum
Fotiautomat begleitet, hät ihre gholfe alles i’zstelle, hät ihre
d’Foti zuegschnitte ... Wow! So Lüt gits au, wo so hilfsbereit
sind und sich Ziit nämed i üsem suscht gstresste Alltag. Die
Frau hät minere Mueter Hoffnig gschenkt. Hoffnig, dass eim
gholfe wird.
Ich wünsch Ihne en guete Tag.
Ramu Bhalla – Coach, Projektleiter Waisenhaus Indien, Pastor Salem Life
KW25 Dienstag
Hoffnig
Guete Morge mitenand
Die Wuche redi über d’Hoffnig. Hoffnig isch ä Chraft wo
motiviert, wo aatribt und uftrib gitt au im gröschte Sumpf.
Überleget Sie emol – wa isch für Sie Hoffnig? Wah git Ihne
Hoffnig? Hoffnig schenkt Vertraue fürs handle im Alltag. S’git üs
die Zueversicht, dass es „funktioniert“. Wenn me sich cha
verloh uf es Wort, oder es Verspräche: da git Hoffnig und
schafft Vertraue. Wenn me sich uf Hilf cha verloh, oder uf
Mitgfühl, oder uf Versorgig ... All da, git Hoffnig. Ich ha mir i däm
Zämehang Gedanke gmacht über Macht und Hoffnig ... Doh
isch mer ufgfalle, dass dört wo Macht zum Guete, zum Wohl vo
dä Mensche igsetzt wird, döt gits Hoffnig. S’umgekehrte gilt
natürlich au. Döt wo Mensche und Gmeinschafte ihri Macht
(das heisst, ihri Gobe und Mittel) für sich allei bruchet – döt
herrscht bald rundume Ohnmacht und Hoffnigslosigkeit. Mir
sind Mensche, wo Hoffnig verbreitet mit em e Läbe, wo andere
dient, a grosses Vorbild. Morn verzell i meh über Hoffnig.
Ich wünsch Ihne en guete Tag.
Ramu Bhalla – Coach, Projektleiter Waisenhaus Indien, Pastor Salem Life
KW25 Mittwoch
Hoffnig
Guete Morge mitenand
Geschter han ich verzellt, wie Machtmissbruch Hoffnigslosigkeit
schafft. Immer, wenn Mensche, Firme, Länder ihri Gabe, ihri
Mittel und Möglichkeite für sich und ihres eigene Wiitercho
bruchet, dänn lidet oder verletzt me anderi. D’Bible verzellt vom
Volk Israel wo versklavt em Egyptische Pharao het möse diene.
Ohni Hoffnig und voller Ohnmacht händ si um Hilf g’schraue ...
Doh het Gott ihren Schrei ghört und hät ihne än Maa gschickt –
dä Mose – wo ihne het sölle Hoffnig bringe? Da isch würkli
mega schwierig gsi! Er hät ihne vo dem Gott verzellt, wo ihri Not
gseh hät, und ihne wet hälfe ... Sie sind skeptisch gsi ... Gott
aber het dur vili Wunder zeiget, dass ER für sie isch. D’Macht
vo dr Liebi hät schliesslich über d’Macht vo dä Sklaverei gsiegt!!
D’Macht vo dä Liebi Gottes, isch stärker wie Machtmissbruch.
Da isch d’Hoffnig vom Evangelium wo im Lied „we shall
overcome „ zum Usdruck chunt. Mensche mit Hoffnig händ
Geduld, sind aber nie untätig. Sie lebed im Jetzt mit em klare
Blick uf Gottes Möglichkeite. Üsen Blick bestimmt üsi
Fahrtrichtig.
Ich wünsch Ihne a hoffnisvolli Fahrt i dä Tag.
Ramu Bhalla – Coach, Projektleiter Waisenhaus Indien, Pastor Salem Life
KW25 Donnerstag
Hoffnig
Guete Morge mitenand
Die Wuche redi über d’Hoffnig. Geschter hani Gschicht verzellt
vomene Maa – em Mose – wo em Volk Israel Hoffnig inere
hoffnigslose Situation brocht hät. Hoffnig isch die Chraft, wo
durehebe hilft i schwierige oder sogar uswägslose Situatione.
Da isch ä Sicht vo de Realität, wo sich nid gfange neh loht vo
dä schlechte Umständ, sondern ä Lösig für d’Zuekunft gseht!
Isch dah nid unglaublich ermuetigend?
Üsi Zuekunft fangt jetzt mit de Gegewart aah. Wenn i zum
Biespiil a unfründlichi Atmosphäre verändere will, chani mi jetzt
entscheide zum selber fründlich sii ... so gestalt ich aktiv
d’Zuekunft. Nid warte, bis es anderi mached, sondern sälber
aafange. Afange s’Wort zhalte, aafange z’hälfe, aafange Ziit für
anderi z’neh ... aafange Guets tue. Da git Hoffnig ... Jesus hät
vorglebt was es konkret heisst, Hoffnig de Mänsche z’bringe. Er
beschänkt jede wo wett, mit de Chraft em Negative es Gueti
entgege z’setze.
Die Chraft und die Hoffnig wünsch ich Ihne au für dä Tag.
Ramu Bhalla – Coach, Projektleiter Waisenhaus Indien, Pastor Salem Life
KW25 Freitag
Hoffnig
Guete Morge mitenand
Die Wuche hani über d’Hoffnig gredt. Hüt noh es Gedankespiel
... Nehmed mir aah, es git kein Gott, kein Schöpfer, kein Erlöser
und kei Ewigkeit – wie vili behauptet – und nehmed mer aa da
wör au stimme.
Denn macht’s doch Sinn, zum egoistisch si; zum Lüge oder
zum d’Macht falsch, da heisst für sini eigene Zweck z’bruche ...
Wa söll’s – s’isch ja alles Zuefall – wa söll’s – noch dem Läbe
isch alles verbii ... ich bi ja zuefällig entstande ... Di Arme, di
Underdrückte, di b’Schissene, die wo under Krieg und
Ungerechtigkeit lidet ... sie händ denn eifach Pech gha. S’git kei
Hoffnig uf ... Ich stuune, wie stark dass bi einige, oder sölli säge
bi viilne, de Gedanke oder de Glaube a d Gottlosigkeit isch.
Für mich isch Gottlosigkeit letschtlich Hoffnigslosigkeit. Üses
Land und d’Grundlage vo üsem Zämeläbe sind ufbaut worde
ufem Fundament vom Gott vo dä Hoffnig. Dä Gott isch
barmherzig, gerecht und voller Mitgfühl. Er rüft jede Mensch uf,
ä Läbe i de Beziehig zu ihm z’läbe.
Mensche mit Hoffnig setzed ihres Läbe zum Wohl vo anderne i
– si hälfed und lönd sich helfe.
Ich wünsch Ihne ä wunderbars Wuchenend.
Ramu Bhalla – Coach, Projektleiter Waisenhaus Indien, Pastor Salem Life

Download Report