Our da la chesa cumünela A la tschanteda dals 16 avrigl 2014 ho piglio la suprastanza cumünela da Bever las seguaintas decisiuns: Departamaint da fabrica 466 Immobiglia veglia da la posta, adatter glüsch da suringiò / alluntaner pensla La suprastanza cumünela piglia cogniziun dals plauns per adatter las glüschs da suringiò vi da l'anteriura immobiglia da la posta scu eir per alluntaner la pensla. L'edifizi ho intaunt circa 25 ans e muossa ün bsögn da sanaziun pü grand. Cun alluntaner las penslas ed adatter la glüsch da suringiò es previs da fabricher üna nouva vaidrina pella vschinauncha da Bever scu eir pel defibrillatur. Ultra da que stu gnir renoveda l'intera entreda da l'anteriur edifizi da la posta, causa cha quella cuorra. La dumanda da fabrica vain delibereda pella publicaziun ufficiela. Credit da 10'000.00 fr. part sanaziun dal s-chudamaint L'administratura da la cumünaunza da proprietaris in condomini Muntanella & Alva ho fat gnir ün'offerta pella sanaziun da la chüdera dal s-chudamaint, già cha'l schudamaint vegl stu gnir rimplazzo urgiaintamaing. La part pell'immobiglia da la posta chi tuocha a la vschinauncha s'amunta tenor l'offerta a 7'621.75 fr. Causa cha que fo dabsögn da lavuors da pittur, da müreder, d'electricited e da spizzer ed impü eventuelmaing d'üna puntineda sül tet u d'ün palc idraulic per monter il condot da svapur, savessan ils cuosts effectivs a charg da la vschinauncha esser pü ots. A vegnan auncha tiers adattaziuns tar la gruppa da s-chudamaint posta cun 1'257.65 fr., uschè ch'ün credit da 10'000.00 fr. pera indicho. A vain delibero ün credit ill'otezza da 10'000.00 fr. per saner il s-chudamaint da las immobiglias da la cumünaunza da proprietaris in condomini Chesa Muntanella & Alva. Inviamaint procedura plaun da quartier "Surpunt Plaun" La suprastanza cumünela decida da vulair invier la planisaziun da quartier Surpunt Plaun zieva cha'ls proprietaris da las parcellas 392 e 393 haun inoltro üna proposta in merit. La suprastanza cumünela tscherna il büro da planisaziun Stauffer & Studach SA per elavurer la basa da planisaziun ed a dr. iur. Rainer Metzger per elavurer las disposiziuns dal plaun da quartier. Plaun da quartier Bügls Suot 2/Davous 2: examinaziun preliminera La suprastanza cumünela inviescha las examinaziuns prelimineras dals plauns da quartier Bügls Suot 2 (nouv) scu eir Davous 2 (revisiun) tar l'uffizi da register fundiari a Malögia. Düraunt las prosmas eivnas varo lö l'exposiziun publica. Siglianter artificielmaing lavinas illa Val Bever In collavuraziun culla Viafier retica SA ho l'uffizi forestel elavuro ün proget preliminer per siglianter artificielmaing lavinas cun püttas da siglianter pella Val Bever. Ad es previs da siglianter las lavinas i'l territori Cho d'Valetta in avegnir cun quatter implaunts stabels (püttas da siglianter Wyssen). Lo s'ho fin uossa siglianto a maun las lavinas davent da l'elicopter. Ils implaunts stabels paun gnir activos da tuot temp, eir in cas da trid'ora. La suprastanza cumünela salüda explicitamaing il proget preliminer, pretenda però cha nu vegna siglianto illa Val Bever traunter las 21.00 e las 06.00. Departamaint da trafic, pulizia, silvicultura Circus Lollypop: permiss excepziunel areal da gö plazza da ballapè Il Circus Lollypop realisescha ün proget da circus insembel culla scoula cumünela. L'arriv saro il Firo da Tschinquaisma, ils 9 gün 2014 e la tenda dess gnir missa sü traunter las 16.00 e las 19.00. Al Circus Lollypop vain concess ün permiss excepziunel per metter sü la tenda düraunt ün firo scu eir ün permiss da plazza pella düreda dals 9 gün (saira) fin ils 16 gün (saira). Societed da tregants: appruvaziun program annuel 2014 Il program annuel da la Societed da tregants vain appruvo, cull'infurmaziun cha l'access a la chesa da tregants nu saro forsa adüna pussibel e cha la plazza da las dittas vain ütiliseda per depuoner veiculs causa cha la via fin tar la plazza da las dittas, la via champestra e la via forestela vegnan sanedas quist an i'l ram da las activiteds da fabrica da la VR. Departamaint da turissem, ambiaint, alluntanamaint da las immundizchas Proget senda Isellas Bever: contribuziun da la vschinauncha da Bever Las duos iniziantas dal proget senda Isellas, Christine Levy ed Andrea Martin, haun promovieu il proget ed haun già pudieu registrer contribuziuns da sponsuors ill'otezza da 10'000.00 fr. (Circul d'Engiadin'Ota 3'000.00 fr. / Fundaziun Willy Muntwyler 2'000.00 fr. / Fond Peter Gabriel 3'000.00 fr. scu eir Fundaziun Niarchos 2'000.00 fr.). Il proget es progredieu taunt inavaunt cha las istorgias sun elavuredas ed avaunt maun in fuorma da sböz da layout. Ellas sun gnidas tradüttas in differentas linguas ed ils lös pellas istorgias sun fixos. Uschè po il proget gnir cuntinuo sün basa privata. Pel proget senda Isellas Bever vain delibereda üna garanzia da deficit da la vschinauncha da Bever da 15'000.00 fr. Departamaint da finanzas, furmaziun, planisaziun regiunela Missiva per mauns da la radunanza cumünela: appruvaziun La missiva per mauns da la radunanza cumünela dals 30 avrigl 2014 vain appruveda e delibereda pella spediziun. Quint annuel 2013 / prüma lectüra Cunter tuot las aspettativas as preschainta il quint annuel fich positiv, il guadagn net aunz las amortisaziuns e reservas s'amunta a 569'940.65 fr. Da que sun gnidas fattas amortisaziuns ill'otezza da 239'780.80 fr. ed üna reserva pella sanaziun da vias da 300'000.00 fr., uschè cha resulta finelmaing ün guadagn net da 30'159.84 fr. Il quint d'investiziun serra cun expensas dad 1'170'402.90 fr ed entredgias da 741'368.80 fr., da que resultan investiziuns nettas da 429'034.10 fr. Il quint annuel vain delibero per mauns da la cumischiun da gestiun e dal post da revisiun. Tscherna da duonna Marigretta Dettmann scu mussedra Duonna Marigretta Dettmann-Conrad da Zernez vain tschernida scu nouva mussedra da la scoula cumünela da Bever cun cumanzamaint als 1. avuost 2014. Diversas contribuziuns La suprastanza cumünela approuva la seguainta contribuziun: Club da patins internaziunel, San Murezzan Bever, ils 22-4-2014rro
© Copyright 2025 ExpyDoc
