Gnatterpott un Wrangelpott - Oldenburgische Landschaft

Gnatterpott un Wrangelpott
Dar weer mal `n groden Appelboom. De stunn nipp un nau up de Grenz
twüschen twee Goorns. De ene Goorn höörde den Gnatterpott un de anner den
Wrangelpott to.
As in`n Wienmaand (Oktobermaand) de Appels riep wurrn, haalde de Gnatterpott
midden in de Nacht siene Ledder ut ´n Keller un steeg stillkens un klammliesen
up den Boom un plückde all de Appels af. As de Wrangelpott neegstsen Dag
arnten wull, weer kien Appel an`n Boom mehr to sehn. „Tööv is!“ sä de
Wrangelpott, „dat warrst du mi trüchbetahlen.“
Tokamen Johr plückde de Wrangelpott de Appels all in`n Harvstmaand
(Septembermaand), liekers se noch gor nich riep weern. „Tööv is!“ sä de
Gnatterpott, „dat warrst du mi trüchbetahlen.
Un in dat tokamen Johr plückde de Gnatterpott de Appels all in`n Aarntmaand
(Augustmaand), liekers se noch gröön un hart weern. „Tööv is!“ sä de
Wrangelpott, „dat warrst du mi trüchbetahlen.
Un in dat tokamen Johr plückde de Wrangelpott de Appels all in`n Heumaand
(Julimaand), liekers se noch leep gröön, hart un lüerlütt weern. „Tööv is!“ sä de
Gnatterpott, „dat warrst du mi trüchbetahlen.“
Un in dat tokamen Johr plückde de Gnatterpott de Appels all in`n Braakmaand
(Junimaand), liekers se noch lütt as Krinten weern. „Tööv is!“ sä de Wrangelpott,
„dat warrst du mi trüchbetahlen.“
Un in dat tokamen Johr sloog de Wrangelpott in`n Maimaand all de Blöten af, so
dat de Boom överhaupt kien Appels mehr drägen kunn. „Tööv is!“ sä de
Gnatterpott, „dat warrst du mi trüchbetahlen.“
Un in dat tokamen Johr sloog de Gnatterpott in`n Aprilmaand den Boom mit een
Ext um.
„So“, sä de Gnatterkopp, „nu hett de Wrangelkopp sien verdeente Straaf.“
Van dar af an drepen sik de beiden fakender in`n Laden to`n Appelkoop.
Woortverklaarn: Gnatterkopp = mürrische, böse Person, Wrangelpott = Streithammel,
nipp un nau = ganz genau, stillkens un klammliesen= heimlich, still und leise, leep =
sehr, lüerlütt = sehr klein, Krinten = Korinthen, Rosinen, Ext = Axt
Bild: Streithähne: www.nila.at, Apfelbaum: www.maerchen-welt.net

Download Report