Timeḥnuceṭ Seg asmi i briɣ i tmeṭṭut-iw i ḥulfaɣ i yiman-iw amzun akken kecmeɣ deg yiwen uxenduq ur nesɛi yara taggara yessufuɣen; tezziɣ tenḍeɣ ɣef yiman-iw di texxamt-iw i d-yezgan di ṛṛef wis ṣa (7). Kullec yuɣal-iyi d arẓagan ger wallen-iw ; ula d aselkim (ordinateur) d tilibizyu staɛgizeɣ ad ten-ssiɣeɣ. Tikwal ttḥalfuɣ cɣel n walbaɛḍ n lerwaḥ ucmiten i d iyi-weṛgen s ul-iw. Syin tkeččem-iyi tisselbi n weɣẓaẓ d wučči deg yiman-iw alamma xebcaɣ yark taglimt iɣallen d ifassen-iw. Ur fhimeɣ ara amek i d-ufiɣ iman-iw di liḥala-yagi n umbuṛ ageswaḥ iɣunfan tudert-is maṛṛa. Niqal, smanat timezwura, ttruḥuɣ s ixeddim. Acu kan cwiya cwiya bdiɣ la ttbeṭṭileɣ; ssawaleɣ-asen yal mara sɛediɣ iḍ ulejlej d weɛwaz, qqareɣ-asen belli uḍneɣ, ur zmireɣ ara ad n-aseɣ. Amɛellem-inu d aṛumi, tazwara yefhem tagnitt n tillas i deg-i yezreɣ. Ahat yenna-yas kra n wussan neɣ kra n smanat ad srekkdeɣ cwiya ṛṛay-iw, ad uɣaleɣ d axxeddam-nni yessen si mraw (10) iseggasen aya. Taggara yeɛya deg-i, yestaxer-iyi-d. U cwit n idrimen i yi-d-yefka ɣef iseggasen xedmeɣ ɣur-es, swiɣ-ten di tbernat n “17eme arrondissement”. U ccumaj i bdan la yid- ttaken yal taggara n waggur, zzuzureɣ-t di crab di tzenqatin n Paris. Dɣa taggara n waggur, reṭṭleɣ-ed idrimen i yi-ixuṣen i lexlaṣ n texxamt-iw ar kra n yemddukal i yi-dmazal. Imi ṭṭaqa deg-sen squqreɣ-ten fell-i s imeslayen imerẓuga i sen-ttakeɣ d tarzeft yal mara yi-d-taṛsel. Yewwas, makken ǧǧiɣ tilibizyu la tesreɣruɣ weḥdes kan, nek yellan ẓleɣ deg usu ger tguni d takin, sliɣ mi la heddren ɣef “Darknet” (tama taberkant n lanternet). Heddren- d ɣef widak yettaɣen znuzen lkif ( le canabis ) d yemrigen (leslaḥ) mebla ma yezmer win ara sen-ifaqen. Dɣa imir-en kan tkakiɣ-ed. Ḍefreɣ acu yark i d-mmeslayen ɣef usental (sujet). U nek yellan d acawrar iɛewqen acu ara yexdem s tudert-is seg asmi i yi-teǧǧa teqcict i d-wwiɣ si tmurt s uqenṭar n lekwaɣeḍ d iqarwiyen n lkuraj d sbeṛ, ufiɣ-ed imir-en s wacu ara s-ttuɣ iɣeblan i wallaɣ-iw d wul-iw. Nniɣ ger-i d yiman-iw ḥala s tɣawsa tamaynut i zemreɣ ad neṭṭleɣ tayri-inu iruḥen teǧǧa-yi. Sin wussan s wuḍan-nsen i zreɣ mebla taguni di “Darknet”. Ssuliɣ-ed aseɣzan (logiciel) n TOR, skelseɣ iman-iw s yisem “uqjun inecfen” (le chien enragé) syin bdiɣ anadi d umehgeṛ ger ismilen (sites) yeṭṭuqten din. Seg uzenzi n lkif ɣer uzenzi n yemrigen, si tsartit ar isura n ssinima, kullec yella din. Lḥiɣ nḍeɣ ger yesmilen armi i d-ɣliɣ ɣef usmil anda i la ttmeslayen ɣef tmenɣiwin. Cuffen imeẓẓaɣ-iw mi yufiɣ zemreɣ ad d-sbeddeɣ albɛaḍ s 1000 Dollars ara d-iqeṭṭin ɣef tin i d i-yeǧǧan mebla ssebba, truḥ tewwi-d si tmurt ula d nettat, umbaɛd mi dtewwi lekwaɣeḍ, yiwen ilemẓi yettlusun nwaḍer tiberkanin. Yekcem ubeḥri assemmaḍ ɣer tasa-w mi d-xuylaɣ yiwet n terṣaṣt di tmelɣiɣt n win i la yegganen tura d tin yegnen yidi azal n semmus (5) iseggasen deg yiwen n wusu. Skelseɣ iman-iw deg usmil-nni s yisem n “ uɣbalu n tillas (source des ténébres). Syin bdiɣ taɣuri n wayen yark i d-yettwaran din ɣef tmenɣiwin. Aṭas i d-isarsen iɣallennsen mgal 1000 idullaren ɣer 100.000 idullaren ɛlaḥsab timura. Tugti ttmeslayen s teglizit d tesbenyulit. U ṭṭaqa n tusmirin (les annonces) llant di Marikan talaṭinit ladɣa tamurt n Lmiksik (le Mexique) akked Brazil. Ɣas ma ẓriɣ iman-iw mači d yiwen ara imennin timenɣiwt n tin yellan d tameṭṭut-iw yewwas, acu kan taɣuri-yagi ɣef tɣawsiwin-agi n tmenɣiwt akked uxayel n ixeddim-nsent yuɣal-iyi cɣel n tejbirt i leḥzen alqayan i d-teǧǧa deg-i Kra kan n wussan umbaɛd, wehmeɣ mi yi-d-yewweḍ yiwen yizen ɣer tebewwaṭ-inu n lanternat i d-lliɣ deg usmil-nni. D yiwen yizen amecṭuḥ yuran s tṛumit : “Azul a mass. Sɛiɣ cɣel i keč di temdint n Paris. 50 n tebrikin.” Yufa-yi-d lḥal ass-nni, swiɣ armi i ddneddneɣ. Lliɣ a d-ttmektiɣ tagdi-nni i d-sarsen deg-i imsulta (policiers) asmi i yi-tessaweḍ tmeṭṭut-iw taqdimt belli wteɣ-tt. Nniɣ-asen d tidett, wteɣ-tt; acukan d nettat i tent-id-yewwin. Sfehmeɣ-asen belli nekni di leɛwayed nneɣ ur tettɣimi yara tmeṭṭut d wergaz awerdani ɣer tilifun teɣzi n yiḍ, ɣas ma yella yid-es i la ixeddem. Nitni ugin ad fehmen. Sɛeddan-iyi ger iɣuraf imaẓayen n tsirt. Ẓdan-iyi iẓuran n wallaɣ-iw armi i sḥulfaɣ qrib ad yeṭṭarḍaq… Ugadeɣ seg assnni i yebdan ttruḥun-iyi tikwal laɛqel d lmaɛqul… Dɣa mi d-nemlal zdat lkumiṣer, ssutreɣ-as, ad d-tekkes lkarṭa i yi-d tessufeɣ. Tenna-yi-d s teqbaylit belli teqbel ma qebleɣ ad as-bruɣ. Riɣ-as belli ur zmireɣ ara ad as-bruɣ. Imi nettat d tameṭṭut-iw; ur zmireɣ ara ad tt-ḍegreɣ akka kan. Imi ur tt-id-wwiɣ ara si tmurt armi i tent-carweɣ merɣit. Dɣa zdat lkumiṣer, mi walaɣ teṭṭef deg awal-is, rriɣ iman-iw qebleɣ, ɣas makken i d-newweḍ s axxam, ruɣ-as iḥemmalen akken ad iyi-tsemmeḥ u ad teqqim yidi. Nettat s wudem igarsen tenna-yi-d belli werǧin i yi-teḥmil u d imawlan-is kan i ttiḥetmen teqbel-iyi. Nniɣ-as mači akka i yi-d-tenniḍ asmi i nemlal. Teḍsa. Dɣa nek si zɛaf ddmeɣ-ed yiwet n tjenwitt i yellan ters ɣef ṭṭabla, sarseɣ-tt ɣef tefkert n wul-iw akken ad as-iniɣ lemmer ad iyi-teǧǧ ad nɣeɣ iman-iw. Dɣa nettat tfureṣ tagnitt-nni n tjenwitt, tebda la tettuɣu ɣer lǧiran s teɣzi ugerjum-is. Teqqar-asen : “ il veut me tuer…il veut m’assassiner… il veut me tuer,… aidez-moi… aidez-moi… il veut m’assassiner…” Ur iyi-d-sarḥen ara si lḥebs n “la maison de la santé” armi i ten-uyseɣ. D arrac n taddart-iw i iruḥen ḥellelen-tt-id s cwiṭ uhuccu, tenna-d tidett deg umur uqbal-inu i berru…Tadyant-agi teǧǧa-d deg-i cwami timeqranin. Ɣas akken ifuṛ uqerru-yiw armi yulwa am tilqi n weɣrum, ddmeɣ rriɣ-as i yizen-nni i yi-d-yewweḍen. Uriɣ-as s tṛumit : “lecɣal aṭas i yellan. Ini-d acu i k-iceɣben. Syin ad nwali.” Mazal isenna wedfel di targit-iw n taddart anida sɛeddaɣ temẓi-w taẓidant mi yi-d-yuɣal yizen :“ D yiwet n taṛwiḥt i bɣiɣ ad ssiwezleɣ ineẓman n ddunit.” Rriɣ-as imir-en kan am win yebɣan ad yurar : “Ayɣer ?” Yerra-yi-d : “Lemmer ttafeɣ ad freɣ sseba i yiman-iw, mulac aɣilif.” Rniɣ, steqsaɣ-t : “Ayɣer d nek i d-tqesdeḍ ?” Yennayi-d : “Ulac yark win ixeddmen lecɣal-agi di temnaṭ n Paris. Aqli ddeqs aya-gi i la ttnadiɣ deg usmil-agi armi d tikelt-a i d-ufiɣ izen-ik.” Nek am win yezzuɣer wurar imeslayen-agi, uriɣ-as : “Amek ara ẓreɣ keč ma d amsaltu neɣ d bu tidett.” Yerra-yi-d : “Ula d nek ur zmireɣ ara ad ẓreɣ. Acu kan ahetwir amessas yekren zdaxel-iw i yi-d-ḥettmen ad tt-qamreɣ. Imi acwari idemmek ar yiran. Aqli la ttlemmimeɣ di tmerẓuga. Lemmer ur neqqleɣ ara tablawt-iw yeččuren d arṣeḍ, ugadeɣ ad ifelleq wul-iw… Irej yuɣen yegguma ad yens.” Kkreɣ seg ukarsi. Bdiɣ la leḥḥuɣ di texxamt am ujelwaḥ ɣeẓẓan igerzan-is. Ttaɛraḍeɣ deg agu n crab-nni i deg-i weḥleɣ ad sneqdeɣ anamek d lmaɛna n wayen yebɣa seg-i umcum-agi i yi-d-yettarun s lanternat. Ḍsiɣ aṭas mi d-tuflaw temsalt ɣef ixixan n wallaɣ-iw : “Amdan-agi yebɣa ad yi-d-ixelleṣ 50000 euro akken ad as-nɣeɣ albɛaḍ iɣucc am qeḍran.” Ḥulfaɣ teqqeclulef u tekkaw tyersi-w am ucettiḍ yesbiḥliw waḍu, dɣa ruḥeɣ ddmeɣas-ed yiwen n tebyirt tasemmaṭ seg ufrijidir. Sgergreɣ-tt ɣef yiwen ubrid. Syin wteɣ aqqeru-yiw ɣer lḥiḍ; isenxaxer-iyi-d. Ɣliɣ d taguni di tiɣerɣert s timmi-w yeččuren d idammen. Kecmeɣ di tirga tiseṭṭafin tucmitin anida cwaṭen imecṭaḥ s tacciwin bdan la sentuyen deg iles-iw tigeḍmatin timecṭaḥ tiquranin. Reggeleɣ ger ixidwac d wuzzuten n lexlawi i d-yezgan seddaw taddart-iw. Nitni deffir-i, sburen-ed ibṛenyas n tmes, la sčemčimen s tutlayt werǧin slan imeẓẓuɣen-iw. Rewleɣ ɣer yiwet n tɛecciwt taqdimt anida i dqqaren imɣaren n taddart belli yella yiwen umrabeḍ ameqran izedɣen deg-s di zman anida heddren lewḥuc. Nitni rrubzen-en ar zdaxel. Syin bdan aɣẓaẓ, tiytiwin d usxenčew-inu. D aqraḥ i yi-d-qarḥen di targit i yi-d-issakin si tnafa-w. Ufiɣ-ed izen la yi-ttraǧu di tbewaṭ-iw n lanternat. Yeqqar-ed deg-s : “Nekkini mači d amsaltu, u ssarameɣ keč daɣen mači seg-sen. Ma tebɣiḍ ad nemlil di “ Chatelet Les Halles.” Ad nqeṣṣer mebla ma nudder-ed awal ara ɣi-ibaṣin di sin. Ad ak-ed-fkeɣ isem, tawleft d tansa anida txeddem tneɣḍimt… Syin keč muqel amek ara txedmeḍ. 50 n tebrikin d ayla-k… Azgen meqbel, azgen umbaɛd… Awal ha-t-an ar ɣur-ek…” Lsiɣ tacacit tazeggaɣt, nwaḍer tiberkanin, acemmil n kifya akked tbaskiḍin timellalin akken i msefhameɣ yid-es. Dɣa mi wwḍeɣ ɣer tfewart n “Les Innocents”. Qimeɣ ger igelfan n lɣaci ileḥḥun, yetturaren din, la ttmuquleɣ anida ara marqeɣ anwa i d-yelsan am nek. Armi i sliɣ si deffir-i, taɣect n win i d-yeqqimen di tṣeddart taɣezfant anida qqimeɣ. Ger ssuɣat d uneḥneḥ n yelmeẓyen yetturaren “Skateboard”, yenna-yi-d : “Azul a Mass, si zgelli i la k-ttraǧuɣ.” Rriɣ-as : “amek ihi ?” Yerra-yi-d : “Aqli ad aken-fkeɣ tabratt anida tella tewleft n tmeṭṭut ḥemmelent lmalayek, yura fell-as yisem- is akked tansa n wanida i txeddem. Meyyez ɣef yiman-ik, tmuqleḍ ma tzemreḍ ad tfakkeḍ cɣel-ik aggur i d-iteddun, imi nek sɛiɣ inig ɣer tmurt n ṭelyan di leɛnaya n tkebbanit anida i xeddmeɣ. Idrimen akken i nemsefham. Azgen ad ak-tsarseɣ deg umḍiq i nemsefham meqbel tameɣra. Azgen nniḍen umbaɛd tameɣra…” Rriɣ-as : “Yeshel wannect-a. Acu kan 50 n tebrikin drus. Ilaq 70. Imi ḥwaǧeɣ aṭas, amrig d waṭas n tɣawsiwin nniḍen. Issusem cwiṭ am win ittxemmimen, yerra-d nnehtat u yenna-d : “Aṭas 70 fell-i… Maɛlic… Ulac aɣbel… 70…” Mi yekker ad iruḥ, ur ẓriɣ ara acu i yi-ssekren ula d nekkini. Zziɣ-ed tafekka-w ɣef tṣeddart s weḥnuceḍ n tqesrit-iw fell-as. Imi niqal wa yefka azagur i wayeḍ. Dɣa beddeɣ zdat-es am ujebbad sleɣwant tiytiwin unezgum alqayan. Kkseɣ-ed zdat-es tacacit-iw, acemmil akked nwaḍer, u ssutreɣ-as ad ten-yekkes ula d netta. Nniɣ-as bɣiɣ ad cfuɣ fell-as ma yella dɣa yebɣa ad iyi-sɣendef. Ikkes-iten … Nemyesmuqal s allen… Netta am nek… D yiwen yeffeɣ yiḍes seg acḥal-aya… Waqila ineẓma-ines ɣelben ayla-w… Bɣiɣ ad t-id-zemḍeɣ s idmaren-iw akken ad nessenɣes, wa i wayeḍ, taɛekkemt ẓẓayen n tisselbi i ɣ-ed-ibdan di sin ɛlaḥsab udmawen-nneɣ… Si tmuggent-nni (Rdv), rriɣ metwal ɣer ttbarna tamezwarut i d-mlaleɣ di tikli-w, bdiɣ tissit armi ttuɣ anwa i d iyi-ilan. Kullec deg-i la izehher am umutur aqdim n walbɛaḍ n tbarwiḍin tiqdimin. Ulac yark d acu i wumi cfiɣ deg iḍ-nni, ḥala agarṣun n tbarna mi yi-d-yewwi si teɣruṭ, isars-iyi ɣef tṛutwar mi d-iwweḍ lawan ad d-yemdel tiwwura. Ufiɣ-ed iman-iw ɣef yiri n wasif “la seine”, amag-iw yarṣa di tḥelwiṭ iriran izeggaɣen, azekka-nni mi yi-d-yessarɣ yiṭij iberḍiyen-iw. Lɣaci la d-ttɛeddin fell-i mebla ma gren-iyi tamawt, baneɣ-asen-d am albaɛḍ n tsekkwin yellan din si zman aqbur… Ayen yark riɣ imir-en d ifassen ileggaɣen n tmeṭṭut-iw, ad d-tass ad iyitessired s teḍsa-s tabaḥant tafekka-yagi inu yeǧǧa usirem; ad iyi-d-tesfeḍ anezgum iɛencen ɣef tuyat-iw yettbbebin tura taẓayt n laxaṛt. Ur ẓriɣ ara amek ssawḍeɣ ṭṭfeɣ amiṭru s axxam seg iɣsan-iw igersen. Ccucfeɣ, beddleɣ-ed leḥwayeǧ, wteɣ-as-ed abriq n lqahwa meqbel ad d-fɣeɣ srid ɣer temnaṭ n “14éme arrondissement”, s aɣerbaz n tmeṭṭut yellan ɣef tewleft (photo). Ufiɣ-en tezga-d tewwurt uɣerbaz zdat snat leqhawi akked sin iseččuyen; yiwen n lekbab, wayeḍ d Aṭelyani. Qimeɣ din, deg yiwet si snat leqhawi-nni. Bdiɣ la ǧeɣmeɣ di leqhawi am udɣar yeffuden, ta deffir tayeḍ. Sya ɣer da ad d-ddmeɣ si lǧib-iw tawleft-nni akken ad tt-muqleɣ. Teṭenṭen d ṭnac. Bdan warrac la d-tefɣen. Rǧiɣ cwiya armi walaɣ taneɣḍimt n tewleft s uṭayur azeggaɣ akked usebbaḍ bu tqebqabin, acebbub-is yettwagzem nnig tuyat, d taqebbanit cwiya. La teddelwiḥ mi tleḥḥu seg makken ẓẓay uqrab yersen ɣef yiri n tayett-is. Kkreɣ ddiɣ deffir-es s tufra. Nek s nwaḍer tiberkanin akked yiwen učapun i d-ssufɣeɣ si texzant-iw ur sumaɣ ara seg asmi iyi-teǧǧa teɛzizt-iw, tin yegganen tura d yiwen umurḍus nniḍen. Amecwar kan armi tennezrureb ɣer yiwen usečču i d-yezgan d uffir seddaw ubrid, u meqbel ad tekcem tmuqel zelmeḍ yeffus; ḥulfaɣ amzun tḥulfa s tilin-iw n din. Ula d nek kecmeɣ s asečču-nni. Walaɣ-tt mi temmeɣ s uɣiwel ɣef yiwen urgaz i yellan waqila la ttyettraǧu. Tḥebba-t-id meqbel ad t-id-tessuden. Xemmemeɣ imir-en belli yezmer d argaz-is neɣ d ameddakel-is. Dɣa qimen din, ččan cwiya s tɣawla, imi ur lḥiqeɣ ara ad zegneɣ ayen i yellan di tḍebsitt-iw n wučči mi kkren ad sahlen. Ḍefreɣ-ten di sin armi d zdat yiwet n tewwurt ubatimut sani i kecmen. Niqal nwiɣ ad d-berneɣ imir-en ɣef yiman-iw, acu kan ḥulfaɣ amzun d kra i yi-n-iṭṭefen iqejjaren-iw din, ugin ad d-mbbiwlen. Dɣa deg yiwet n teɣmert anida yella ukarsi n weẓru qqimeɣ, u ssufɣeɣ-ed yiwet n teḥdert taqdimt n uɣmis i d-yettmeslayen ɣef tmurt n Leqbayel akken ad arǧuɣ yess tufɣa-nsen. Azal n ssaɛa umbaɛd armi i tt-walaɣ teffeɣ-ed si tsemmit tameqrant ubatimut. Tebda am tin isaɛdalen iman-is, tettmuqul akka d wakka amzun kra i tugad. Ddiɣ deffir-es. Tekcem s amiṭru. Kecmeɣ ula d nek. Teḥbes di “la station Odéon”. Teffeɣ-ed seg uderbuz umiṭru. Ddiɣ-ed deffir armi i nessaweḍ ɣer tewwurt n yiwen uɣerbaz imeẓyanen. Tufa-n aṭas n tilawin nniḍen i la yettraǧun arraw-nsent sima ara d-fɣen. Terǧa dinna yid-sent. Taggara mi d-telli tewwurt uɣerbaz, si ger igelfan n warrac d tullas i d-yefɣen, sin dɣa warrac ipunpunen negzen-d fell-as s leḥmala. Ṭarḍqeɣ d taḍsa, u nniɣ ger-i d yiman-iw belli nek qqarṣeɣ ! Amek dɣa ara bduɣ lḥirfa n tmenɣiwt s tmeṭṭut yesɛan argaz d sin warrac am widnni. Xuyleɣ-ed dɣa imir-en tayemmust n 70.000 €. U ssusfeɣ-tt deg allaɣ-iw. Nniɣ: “ Ad k-yexzu Ṛebbi a cciṭan.” Kecmeɣ s axxam s uculliḍ n tebyirin. Sgargureɣ-tent irkelli, ta deffir tayeḍ, armi yeṭṭuben wallaɣ-iw. Mmektaɣ-ed ssebba i d i-yerran ɣer crab, bdiɣ asxenčew ucebbubiw akken ad d-sxenzreɣ tikti izedɣen allaɣ-iw: ggugmeɣ asmi i yi-d tenna belli tella la tleḥḥu mi tt-id-xeḍbeɣ d win tuɣ tura,u di semmus(5) iseggasen tella yidi, qqimen d imeddukal s tebratin n lanternat. Yeqqar-as-ed belli yenddem ansi ur tt-id-yettara asmi i s-yunef yewwi-tt wayeḍ. Nettat, ur ẓriɣ ara ayɣer, ur ẓriɣ acu-t yizi i s-ikecmen s ameẓẓuɣ, tebda la yi-dtettnadi tilkin deg uqerru-yiw azedgan. Ulac amek ur as-sqazbeɣ ara. Nettat segmi i yi-tettḥeqir ugar deg ul-is. Ssawḍeɣ armi i cikkeɣ belli tella tettraǧu argaz s wacu ara yi-tbeddel u nettat mazal-itt teggan yidi. Neɣ ahat d ttar i tebɣa ad d-terr seg iman-is akked seg imawlan-is. Tkakiɣ-ed snat swayeɛ meqbel tafrara. Usu slučxaɣ-t s tidi. Kkreɣ s aselkim(ordinateur). Lliɣ-ed “TOR”. Ufiɣ-ed izen seg argaz-nni anida i yi-d-yeqqar melmi ara nemlil akken ad iyi-d-yefk 35.000 € timezwura. Rriɣ-as belli ur zmireɣ ara ad d-qeṭṭiɣ ɣef tmeṭṭut yesɛan argaz d sin warraw-is imecṭaḥ, nek tanefsit-iw tɣunfa anect-nni. Dɣa seg ass-nni i ttuɣ tamsalt-nni. Bdiɣ la ssenɣaseɣ si tissit, u ssawalaɣ-as i yemma ɣer tmurt; ḥekkuɣ-as cwiya seg ayen i d iyi-ḍran. Nettat meskint tettru kan. Dɣa umbaɛd mi s-ed-ẓmiɣ yark arseḍ yellan di tasa-w, tessuter-iyi-d ad muqleɣ albaɛḍ seg imeddukal-iw ara yeṭṭhellan di lexlas n ccumaj-iw, u ad ssekruɣ taxxamt-iw i walbaɛḍ nniḍen sneɣ d bu wawal, ladɣa yiwen ur nesɛi yara lekwaɣeḍ, u nek si laɛḍil ad ruḥeɣ ɣer tmurt kra n wagguren sima ara yi-ikkes waṭan-agi amarẓagu n tmeṭṭut i d iyixedɛen. Meyzeɣ aṭas. Ufiɣ tesɛa lḥeq yemma. Sfehmeɣ-as tamsalt i umeddakel-iw, Naser At Imexlaf. Yenna-yi-d: ur ttagad ara, d nek ara yeṭṭhellan di ccumaj-ik wala win ara yessekrun taxxamt si laɛḍil, sima ara d tuɣaleḍ si tmurt. Kra n wussan umbaɛd, mi lliɣ ttḥewisseɣ di temnaṭ n “Saint Michel”, ur umineɣ ara iman-iw mi d-ɣliɣ allen deg allen d urgaz-nni n tcacit tazeggaɣt. Yella ileḥḥu afus deg ufus d tmeṭṭut-nni i ɛeqleɣ d tin i yebɣa ad ineɣ. Yuɣal d azeggaɣ mi yi-d-yeɛqel, ḥulfaɣ-as yebɣa ad iyi-d-yemmeslay. Acu kan nek rriɣ iman-iw ur d-cliɛeɣ ara segsen. Ɣas ma deg ul-iw, ur ẓriɣ ara acu n tindert i yeqqerṣen imir-en deg-i. Tameddit-nni ṭṭfeɣ-ed izen s tṛumit: “yemma-s n warrac, teggan d yiwen nniḍen. Tɣil ur ẓriɣ ara.” Am win ara yi-d-yefken tiyta s umenṭas neɣ s ddakem ɣer tmelɣiɣt-iw. Tuli-yi-d yiwet n cceḥna tameqrant mgal tameṭṭut-nni i walaɣ tḥebba wayeḍnin deg usečču. Mmektaɣ-ed imir-en tadyant-nni i yi-id-yeḥka umeddakel-iw Reḍwan At Bugcic. Yesteqsa-yi-d yewwas mi d-yuɣal si tmurt ma yella tunag tmeṭṭut-iw ɣer tmurt. Nniɣas d tidett, ha-tt-an tuḍen deg uxxam, ur tezmir ara meskint ad d-tekker ula d tanekra seg usu. Netta yesmejger s icenfuren-is, u yenna-yi-d s lwehma belli yemlal-ed di Ziralda yiwet n tmeṭṭut yaččabin am snat tmeqwa n waman d tmeṭṭut-iw; tedda-d d urgaz-is ɣer teftist (la plage). Imir-en ur arriɣ ara lwelha ɣer temsalt-nni, imi imir-en kan swaswa yerna-d ɣur-neɣ yiwen seg imeddukal-nneɣ, isettu-yaɣ yark ɣef acu i nella nettmeslay. U nek, yal tikelt i d-mmektaɣ awal-nni, sququreɣ-t seg allaɣ-iw am uccen illuẓen armi d asmi i nekcem deg uxenduq-nni n berru. Wwiɣ-as tawleft n wergaz amaynut n tmeṭṭut-iw taqdimt, iɛqel-it d winna iwala yid-es di Ziralda… Ass-nni qrib ččiɣ lekwaɣeḍ-iw. Dɣa si zɛaf-nni d-inuntan deg-i, kecmeɣ deg yiwen usmel (site) anida i d-nudaɣ i taɣin timeẓyanin timecṭaḥ akked yiwen n lmus iṣeggaden iǧeḥden. Imi ur ẓriɣ ara amek i ḥulfaɣ i tṛumit amzun d nek i texdeɛ. Ɣucceɣ-tt imir-en anect ɣucceɣ tameṭṭutiw taqdimt i d iyi-kksen s imeṭṭawen-is n tkellax zdat zzuǧ tugti n cci d yedrimen i dleqḍeɣ seg ixeddim di semmus (5) iseggasen yezrin. Ɣef zzuǧ n sbeḥ i d-ufiɣ yiwet n tmeẓyant tamecṭuḥt di tmurt n Rumania, i yi-dyesqamen 850€. Nemsefham ad iyi-tt-id iceggeɛ deg yiwet n “la chaine stéréo” taqdimt ɣer yiwet n tḥanutt n “ point relais”. Xelṣeɣ s yedrimen n lanternet (Bitcoins), u tansa n tḥanutt n “Point relais” i s-fkiɣ tebɛed aṭas ɣef uxxam-iw di Paris. Azekka-nni, lmus iṣeggaden si ssuq n “ Saint Denis”, i t-id-uɣeɣ. Syin, seg ass-nni, bdiɣ aḍfar n tmeṭṭut si laɛḍil sima ara d-taweḍ tmeẓyant-iw. Anda tedda ddiɣ. Uɣaleɣ-as am lexyal yeṭṭafaren bab-is di tafukt uzal unebdu. Aɣuccu yark ikemnen deg iɣisan n wul-iw ssurgeɣ-t-id ɣef tṛumit i bdiɣ la ttwaliɣ tura am yir tameṭṭut di ddunit. Fehmeɣ ayɣer yebɣa wergaz-is ad tt-yesfeḍ seg nnig wakal. Ahat yefka-yas ul-is d lǧib-is akken tettak temcict tabbuct-is i warraw-is d-ilulen imiren. Nettat, ur ẓriɣ acu n tisselbi i tt-yulin, tḍegger iman-is s idmaren n wergaz nniḍen ur nuklal ahat ula d tifdent tamecṭuḥt n win i tt-yuɣen. Uɣaleɣ ttwaliɣ-tt amzun d tameṭṭut-iw. Leḥged segmi yettzad deg-i mgal-is. Uɣaleɣ uḍneɣ yess makken i ttttwaliɣ ɣef yiri n wergaz nniḍen. Tewweḍ-ed tarzeft i tt-ttraǧuɣ si Rumania. Lliɣ akarṭun yettwacuden. Ufiɣ-ed “ la chaine stéréo” tettwakbel deg upuciḍ n tcuftin i d-kkseɣ s uɣiwel. Ddmeɣ-ed aturnuvis, lliɣ-tt. Ufiɣ-ed yiwet n tmeẓyant yesɛan seddis (6) n terṣasin. S targagit d uxenčew n tmuɣli-w i tt-id-ddmeɣ. Selfeɣ-as akken yeslufuy umeksa i tqarruct izimer-is. Uriɣ-as izen i wergaz-nni, nniɣ-as ad iyi-d-iheggi azgen n lexlaṣ i d-mazal. Imi azgen amezwaru i yi-d-yefka smana meqbel ufiɣ-ed amek i t-ceggɛeɣ ar tmurt s yiwen akken ittbeddilen idrimen. Netta si tama-s, yessuter-iyi-d ad arǧuɣ xeṛṣum smana sima ara iruḥ ɣer tmurt n Tefriqt ugafa deg yiwen n cɣel n tkebbanit anida i ixeddem. Rǧiɣ mraw (10) n wussan akken ad d-stufuɣ ar cɣel-inu. Sɛeddaɣ-ten d tissit n crab akked igerra n lkif yettemḍafaren. Xezneɣ iman-iw di texxamt-iw, ur d-fiɣeɣ ara maḍi ar beṛṛa, Kkes-ed snat tikkal mi d-ṣubbeɣ ad d-aɣeɣ aɣrum neɣ aṣundwič. Tga-yas i uqerru-yiw am ssuq ččuren icenga yettembenṭaḥen, yettemdubbazen teɣzi n wussan deg-s. Ula deg ulejlej-inu tettuɣ anta i d tameṭṭut-iw: ma d tin i d-wwiɣ si tmurt neɣ d taṛumit yettkelixen i wergaz-is s tufɣa d urgaz nniḍen. Ass n udwiwes yezga-d d lǧemɛa. Teɣzi n wass rǧiɣ zdaxel n lqahwa i d-yezgan zdat uɣerbaz anida i tesɣaray. Tačamart tamecṭuḥt, nwaḍer tiberkanin, tacacit akked ucemmil n “PSG”. Deg yiwen n lǧib-iw slufuyaɣ-as i tfettust n tmeẓyant, u di lǧib nniḍen ẓriɣ yers lmus s wacu ara smuddeɣ tiyta ma yella ugadeɣ aṭarḍeq n terṣast. Di leǧwahi dɣa n kuẓ (4) n tmeddit, walaɣ-tt mi d-tesseḍmameḥ taqerruct-is tawraɣt seg tewwurt uɣarbaz. Srid ineggez-ed fell-as, ur ẓriɣ ansi, urgaz-nni d wumi uɣeɣ tannumi ttwaliɣ-tt. Ur ẓriɣ ansi i d-yeffeɣ am cciṭan yefren di leḥyuḍ. Xemmemeɣ geri d yiman-iw belli mači ass-a i d lajel-is. Acu kan, umbaɛd mi meyzeɣ cwiṭ makken i d as-yeslufuy ger lɣaci amzun d nek i la d-yesqijjir, ɣas ma yeffer fell-asen wanida qqimeɣ, qesdeɣ ad ten-ḍefreɣ di sin si deffir. U daɣen sneɣ iman-iw d yiwen izemren ad yuɣal ɣer deffir deg awal-is; ḥnineɣ aṭas akken ad xedmeɣ ayen n diri i walbɛaḍ, u ma unfaɣ-as ass-a ugadeɣ ad i-yekkes leḥged-nni ameqran yellan deg-i. Nitni dduklen di sin, ttemyuṭṭafen, u ttmizmaḍen am sin yefrax di teẓgi yettazalen ger ifurkan. Ttaḍsan, ttnecraḥen. Nek ttayzageɣ seg ayen i ttwaliɣ. Xuyleɣ-ed imir-en tameṭṭut-iw d uḥbib-is amcum di Ziralda, deg ujdi n teftist, la heddren fell-i s utihi amzun d abuhyuf iceggɛen tameṭṭut-is ad d-testaɛfu di tmurt. U yarnu, ḥemleɣ-tt aṭas akken ad izmireɣ ad tt-nɣeɣ… Ahat yewwas ad tarẓag deg ul-iw akken ad i-yeǧǧ ad as-sarseɣ taḥebbuyt n wuzzal yerɣan di deffir temgarṭ-is. Ddan di sin armi d tawwurt ubaṭimut-nni sani uɣen tannumi ttalin dima, ccikeɣ d win i d axxam n urgaz-nni. Dɣa akken ruḥen ad kecmen di tewwurt, ḥulfaɣ i yidammen-iw yerɣan mi bdan tazla tameslubt deg iẓuran-iw, uẓaɣ ɣur-sen s wallen tizeggaɣin am irej d wul icebblen s wayen ittwali. Ssawleɣ-as: “Madame!”. Tezzi-d ɣur-i. Tufa-d zdat-es argaz s tcacit tazeggaɣt ɣef uqerru, nwaḍer tiberkanin ɣef anzaren, tamart n mraw n wussan u tameẓyant twehha s aqerru-yis. Dɣa argaz-nni i d-yeddan yides, mi wala anect-en, inezrab ɣer tesga ubaṭimut. Tegra-d nettat meskint weḥdes ger ifasseniw. Ḍsiɣ-as s usmejger. Ssutreɣ-as ṣṣak-is amzun d takarḍa i bɣiɣ ad tt-akreɣ. Nettat tezmeḍ-it s iciwi-s, imi ur tefhim ara acu iḍeṛṛun yides. Dɣa imir-en kan jebdeɣ di znad. Teṭṭarḍaq tarṣast am lbumba, tesṭṭuben-iyi imeẓẓaɣ. U nettat mazal-itt tebded, d tawraɣt. Rniɣ jebdeɣ di znad acḥal n tikkal, u nettat mazal-itt tebded. Din i faqeɣ belli tirṣaṣin-nni i d-yeddan tmeẓyant i d-uɣeɣ d tiqdimin yeffeɣ ṛṛuḥ. Ur ẓriɣ acu n lkuraj neɣ aɣuccu i d-yennuntan deg-i imir-en, makken i walaɣ ɣlin-ed ibeccan seddaw iḍarren-is, armi i d-ssufɣeɣ lmus si lǧib n daxel n tkebbuṭ-iw. U s lemɣawla sentaɣ-as-t deg idmaren ar tama n wul. Syin kkseɣ-t-id amzun seg udi aleqqaq i t-id-kkseɣ. Rniɣas snat tiytiwin deg uɛeddis-is… Tɣaḍ-iyi aṭas armi qrib i d-ruɣ. D tazla i tt-id-ṭṭfeɣ s yinna. Tiɣmert tamezwarut ṭṭfeɣ-tt. Lḥiɣ deg iberdan ibernen akken ulac anwa ara yi-d-iḍefren. Aṭaksi amezwarru i d-mlaleɣ, uliɣ ɣur-es. Nniɣ-as ad i-yawi ɣer “Puteau”, tamdint yellan ɣef yiri n “Paris”. Mi wwḍeɣ ɣer din ṭṭfeɣ aṭaksi nniḍen i d i-yewwin ɣer temdint n “Versaille”. Syin ṭṭfeɣ aṭaksi nniḍen ɣer temdint n “Rambouillet” anida i d-nudaɣ asensu (hôtel) i kra n wussan. Yufa-yi-d lḥal sefḍeɣ lmus seg idammen, U rriɣ-t netta d ucifun s wacu i t-sefḍeɣ ɣer yiwen upuciḍ i d-heggaɣ, U deg ubrid kkseɣ tacacit-nni tazeggaɣt, rriɣ deg umur-is yiwen ubiri aqehwi. Uɣaleɣ lsiɣ nwaḍer-iw timellalin, u kkseɣ takebbuṭ-iw i yarriɣ s aṣaci. Mači aṭas n tikkal i d-fɣeɣ seg usensu. Beddleɣ leḥwayeǧ-iw, seṭleɣ tamart, uliɣ-ed ɣer Paris. Zziɣ s tufra di tezniqt anida zedɣeɣ, ttmuquleɣ ma yella wwḍen-ed imsulta (policiers) ar ɣur-i neɣ ala. Ulac acu i d-ibanen ! Tameddit mi d-uɣlaɣ s asensu n “Rambouillet”, lliɣ lanternat. Ufiɣ-ed izen di tbewaṭ-iw : “ Ha-tt-an di sbiṭar. Ulac yark asirem i ḥellu ines. Imsulta ɣilen d takarḍa yeḥnucḍen ɣer tmenɣiwt. Idrimen-ik ad ak-en-awḍen azekka s amḍiq-nsen. Tanemmirt”. Rriɣ-as: “Ɣas ma ṭfen-iyi yewwas, lbaḍna-k ad temmet yidi. U lemmer ad iyi-gezmen d ticeṭiṭin. Qim di talwit.” Deg iḍ-nni swaswa, tessawel-iyi-d yemma: “ Ayɣer akka tugiḍ ad d tarreḍ seg uxxam… Aqli ufiɣ-ak yiwet n teqcict d tamxaleft, tecbeḥ am aggur… D tidett tebra-d, acu kan teḥdeq u d tukyist, mači am tneɣḍimt… Yelli-s n Mmi-s n Dda Abdenur At Ḥaǧ Ssaɛid… D argaz lɛali…Ɣiwel-ed, tḥar melmi ara k-tissin…” Wwiɣ-ed idrimen-iw. Uɣeɣ-ed abiyit n tmesrifegt. Wwiɣ-tt-id di taddart-iw di Tmeẓriwt. Beddleɣ irkelli tagnitt. Ur ẓriɣ ara amek i ddan lecɣal armi i d-ufiɣ iman-iw d yiwet n teqcict taḥlawant am tament. Nettat tettxemmim tesɛa zheṛ mi d iyi-tuɣ. Nek ttaḍsaɣ ɣef yiman-iw. Kra n wussan umbaɛd, yewweḍ-iyi izen di lanternat: “Taneɣḍimt-nni tessukes-ed si lmut, ɣas ma mazal-itt la tesseḥarejdil s yiwet n tqejjirt. D nek i yeṭṭhelayen tura degs… Yeǧǧa-tt winna… Tɣil ḥemmleɣ-tt… Waqila, tikelt-agi tebda la iyi-tḥemmel cwiṭ … Hi hi hi… Aqli la ttxemmimeɣ ma nezmer ad as-nɛiwed yewwas i tedyant-nneɣ, kra iseggasen umbaɛd… Ahat… Hi hi hi… Tanemmirt”. Rriɣ-as: “ Aqli la zehhuɣ cwiṭ d yiwet akken n tbuhyuft ibanen d tin ara d-issemɣin tiferrawin asmi ara tesriḥ taɣerma n Faffa … U daɣen aqli la ttxemmimeɣ ula d nek ɣef yiwet akken n tneɣḍimt… Ahaqel yewwas ad bɣuɣ ad as-siwḍeɣ tunṭict i yi-dtefka s ul-iw… Ẓriɣ ur tefhemmeḍ ara…Qim di talwit a yaḥbib n daɛwessu”.
© Copyright 2024 ExpyDoc
