Carambas Bericht

CHLAU-LA
WOLFSSTUFE 2016
De Samichlaus und de Schmutzli demonstriered geged Erdnüssli
und laufed debii natürli ufgregt i euses Atrete ine. Mier chömed nöd
druus und fröged nah, was denn los isch und so erfahre mer, dass
de Samichlaus allergisch gege Erdnüssli isch. Er haltets efach nüme
us, dass die jetzt überall sind, wo er au isch und ers sogar no i sim
Sack mitumeträge muen. De ständigi Erdnüssligruch i sinere Nase
und überhaupt… efach mega müehsam. Mier erchläred ihm, dass mier aber Erdnüssli eigentli
ganz gern hend. Doch die beide lönd sich ned umstimme, steigeret sich immer wiiter i ihres
Erdnüssli Dilemma ine, schimpfed sogar über de doofi Erdnussfabrik Bsitzer mit sinere Villa bim
Rumesee und verkündet uf eimal, dass sie in 24 Stund werdet die Fabrik id Luft sprenge. Und
denn sinds efach devogloffe.
Mier sind chli verwirrt und wüssed ned ganz so recht, wie wiiter… s hetti doch efach es
gmüetlichs Chlaula mit em Samichlaus, em Schmutzli, Mandarindli, guete Pfadifründe, vill Spass
und Erdnüssli selle werde… und jetzt lauft en Timer und i wenige Stunde gitz keis einzigs
Erdnüssli meh uf dere Welt. Das chans doch ned sii. Mer beschlüssed em Erdnussfabrikbsitzer es
Bsüechli abzstatte, um sini Siite vode Gschicht zghöre.
Womer bim Rumesee achömed, ischr grad ufm Heiweg vode Fabrik und völlig erstuunt, wo
mier ihm vode neuste Plän vom Samichlaus und em Schmutzli verzelled. Er chans chum glaube
und het uf eimal Angst. Well mier aber so null Ahnig vom Erdnüssli-Business hend, muener eus
natürli zerst idas ifüehre, damit mier ihm überhaupt nachher e Hilf sind. Mer teiled eus also i
Gruppe uf und mached, was Erdnussfabrik Mitarbeiter ebe so mached: mier lerned, wieme
effizient es Erdnüssli ufm Flüssband bzw. umde Rumesee ume transportiert – vo Station zu
Station, aso eigentli e Stafette. Ide grosse Quizrundi stellemer euses Wüsse unter Bewiis und
lerned, dass Erdnüssli ursprünglich us Ägypte chömed. Mer bastlet eus en Mitarbeiteruswiis,
lernet Erdnüssli i ihrer Form und Awendig mit verschiedene Spiili kenne und hend de Plausch.
Doch d Ziit lauft. Uf eimal zeigt de Timer scho nume no 20 Stund ah und mer mached eus
zeme mitm Fabrikbsitzer schleunigst ufde Weg zude Erdnussfabrik. Dadebii werdemer vomne
spektakuläre Sunneuntergang begleitet und lerned eus unterenand alli besser kenne.
Nachme lange Spaziergang, ja fast scho e churzi Wanderig, wo
eus mitsamt em Gepäck einiges abverlangt het, chömemer bide Fabrik
ah. D Ähnlichkeit mit eusere Pfadihütte isch erstuunlich gross; mier sind
aso fast userwählt em Fabrikbsitzer zhelfe sis Erdnussriich z schütze, d
Erdnüssli zrette und für de Weltfriede zsorge. Mier beziehnd s
Mitarbeiterhuus, richtet eus ih und sammlet währendeme churze Päusli
eusi Chräft für die bevorstehendi Herusforderig. Mer wüssed alli, s wird ned eifach. S isch bereits
stockdunkel und mer mached eus warm azoge ufde Weg, d Fabrik z besichtige. Immer i chline
Grüppli derfemer d Fabrik go aluege, bechömed huutnöch Iblick is Erdnussfabriklebe und derfed
sovill Erdnüssli esse wiemer wennd – mhh, so feini hemmer glaubs no nie gässe gha. Und denn
hemmer aber au würki würkli Hunger becho.
Zrugg im Mitarbeiterhuus, het eus d Chuchicrew mitme tolle Znacht verwöhnt und für die grossi
Challenge gstärcht. Grad womer debii sind, zeme zsinge und Spiili zspiele, laufed aber uf eimal de
Samichlaus und de Schmutzli i eusem Huus umenand. Womer sie fröged, was sie denn da
mached, sinds selber überrascht eus zgseh. Mer sind natürli nöd so mega erfreut über sie,
wennds doch schliesslich d Fabrik i wenige Stund id Luft sprenge. Doch sie verzelled, dass sie
sich extra wege de Sprüchli ufde Weg zu eus gmacht hend und das verzeihemer ihne doch;
zumindest fürde Moment. Gspannt hend druffabe d Meitli em Samichlaus und d Buebe em
Schmutzli zueglost, was er ihne z säge het und villi hend sogar selber es Sprüchli vorbereitet und
ufgseit gha, bevor jede eppis usem Sack het derfe neh. Nachdem mer alli fertig gsie sind, und ja
aud Leiter sind natürli dracho, hemmer eus im Ufenthaltsruum versammlet und welle wiiteri Spiili
spiele. Da findet de Samichlaus und de Schmutzli, dass aber die eher unartige Chind no e Rundi
in Sack müend und hend efach mehreri vo eus in Sack packt und weg sinds
gsie, mitsamt dene Chind und 2 Leiter. Die zurggbliebene Butzli sind chli
verunsicheret gsie, was das jetzt sell und überall hetme vermuetet, es seg
Gauni. Aber simmer mal ehrlich: de Samichlaus und de Schmutzli packed ja
immer unartigi Lüt in Sack – das isch scho bi eus Leiter so gsie. Drum bestaht
ken Grund zur Sorg und mer hend munter wiitergspielt und gsunge, im Wüsse,
dass sie ja bald wieder da sii werdet.
Da wirds uf eimal luut und de Füüralarm gaht ab…. oje, das ischs letzt womer jetzt brucht hend.
Panisch ziehmer eus ganz fest warm ah und versammlet eus so schnell wie möglich vorde Hütte.
D Leiter sind natürli au ziemli verunsicheret, d Caramba telifoniert de Füürwehr und die andere
lueged, dass alli au sicher dusse sind. Schnell gsehmer, dasses bide Fabrik hell lüchtet und dass
au det de Alarm abgange isch. Mer laufed det ane und oh Schreck: em Samichlaus und em
Schmutzli sin Sack liegt voller Bluet det. Was isch au nume passiert? Wo sind all die restliche
Butzli, eusi Fründe hii? Was passiert mit de Fabrik? De Timer zeigt nur no wenig Ziit ah. Alli hend
Angst. D Leiter au, obwohls dass vorde Butzli z verstecke versueched. Was machemer nume?
Gmeinsam versueche mer eus z beruhige, doch die panische Telifon vode Caramba, wo
versuecht de Idfix z erreiche, helfed eus debii so gar nöd. De Idfix nimmt nämli ned ab und wenn,
denn sind nume schlimmi Tön, verstückleti Bruchteil vo Sätz, s Wort Entfüehrig und efach ganz vill
Angst vode andere Siite usezghöre. Mer sind verlore und folged drum efach de Bluetspure, womer
no so halbe am Bode chönd erkenne. Uf eimal treffemer dadebii ufde Schmutzli. De schiint uf
eimal ganz nett zsii und versicheret eus zude anderen zbringe. En Funke Hoffnig springt uf eus
übere… doch uf eimal rennt er bös lachend devo und laht eus vormene gfürchige Cherzliweg allei
zrugg. Au das no… d Welt isch gege eus und mer chönnted efach alli numeno brüele. Doch mer
rissed eus zäme, denn eusi Fründe gilts zrette, egal was! Nahdisnah laufemer muetig alli allei de
Cherzliweg und versammlet eus ruhig am Schluss devo. Vo wiitem gsehmer es Füür und de
Samichlaus, de Schmutzli aber au de Idfix und d Puma, wo gfesslet gfange ghalte werdet. Wie
wemmer die kritischi Situation jetzt löse? Und wo sind d Chind?
Mer laufed all uf eimal uf die Bösewicht zue, doch sie reagiered aggressiv und drohet, die beide
Leiter und d Chind endgültig zvernichte, wemmer ihne ned folget. Mier ziehnd eus aso nomal
zrugg und sueched all agstrengt nachere Lösig. Schliesslich hemmer en Plan und d Yuki schriitet
zur Verhandlig vor. Sie brichtet ihne, dass mier gern helfed es Antiallergikum fürde Samichlaus z
braue, wenn er eus d Chind und de Idfix und d Puma wiedergit. Und zum grosse Glück willigets ih,
doch nume unter de Bedingig, dass sie de Timer ned abstelled sondern efach bis morn Morge
verlängeret. Findemer kes Antiallergikum, sprengets d Fabrik trotzdem id Luft. Klar isch das ned
beruhigend doch huff… wenigstens es bitzli Ziit hemmer eus somit verschafft. Unendlich happy
umarmemer eusi verlore glaubti Leiter und au d Chind nehmer alli fiirlich i Form vonere Taufi
wieder i eusem Chreis und mit neuem Name mituuf. Völlig fertig aber mega zfriede chömme mer
denn zrugg im Mitarbeiterhuus ah und lönd de astrengendi und ufregendi Tag bi Vanille&Schoggi
Glace aka GaggiBisi usklinge. Bald druffabe sind alli tüf und fest igschlafe.
Am nägste Morge gseht d Welt scho vill besser us und nachme guete
Zmorge machemer eus uf, s Antiallergikum z braue. I Gruppe
erkämpfe mer eus verschiedeni Rezeptteil und Zuetate und braued
em Samichlaus es Wundermittel zäme. Und tatsächlich, euse Isatz
het sich glohnt und s Antiallergikum würkt. Doch da wär nomal es
Problemli… de Samichlaus und de Schmutzli hend doch tatsächlich
vergesse wieme gnau die Bombe entschärft. Mer mached en Menschechnopf, umd Zündschnur z
entwirre. Spiled es paar wiiteri Gedanke-und-Idee-stiumlierendi Spiili und entschärfet
schlussendlich alli zeme erfolgriich d Bombe. D Erdnüssli Fabrik isch grettet und de Weltfriede
vorerst wieder hergstellt! Mier sind alli extrem glücklich. Zeme simmer starch gsie, hend alli
Hinderniss mit Bravour gmeisteret, euses Ziil erreicht und sind debii alli über eus selber
hinusgwachse. Was für es unglaublichs wunderbars Wuchenend das trotz allne Astrengige doch
gsie isch! Es Chlaula, wo eus glehrt het, was es Team zsii heisst und eus d Erdnüssli jetzt usme
ganz andere Liecht aluege laht. Und es Chlaula, wo eus allne sicher no lang in Erinnerig bliibe
wird… danke tuusig sinder alli mit debii gsie!!!

Download Report