Texte Schreibworkshop 2016

Klara Tasser
Die Oile
Di Oile isch aigentlich a Psücholognoile, wail jedo konn mit saina Onlign zi ior kemm.
Mit ihra Augn siggse jedn und a wos im falt. Oamol kimp do Wurbm aua gikrochn,
und sog: „I honn a Trauma. Mi het foscht amo a Henne zommgfressn und seido sem
renni fa jedn wekk, sogor fa maina Frainde!“ „Jojo, du muschdo oanfoch denkn,
dasse do greaschte bisch und niomand di fressn will, nocha geht’s wido!“ Do Wurbm
bidonkt sich und kriocht oggn. Giwiss wiard ihn kando fressn. Aines Tages hot di Oile
selbo a Problem kopp obo sich selbo terapiern gett ett. Si isch noch Athen gflogn und
hott sich giwellt Rot holn ba die ondon Oiln. Niomand hott a Lösung giwisst und aso
worse donoch a Traumapsüchologinoile.
Klara Tasser
Do Tigo
Do Tigo isch Olimpiasiega in Renn und isch af koan Foll a Wegetaria, weila jedismol
ban Mekkdonalds Tschikknnaggets frisst, a dohoam frissta foscht olm la Fleisch. Er
isch a begehrtes Ongriffsziel fa Terrorischtn, weggn do schion Haut und die weißn
Ohrringilan hinton Oare. Di Bebis san volle frio reif und sann folle lernfehig, sie
schaugn do Mama olbm ban Fleisch in Despar inkafn zui, oftamo missn die Bebis a
selbo zohl. Di Frau isch in insra Augn untreu, wail glai nouch do Pahrung
foschaichtse in Monn. Si hott a lauta Schtimme, man heartse bis augn zin
Aishokkeischtadion. Mandlan sann folle ibbogiwichtig, no mear awi di Waibilan. Obbo
a Diet zi mochn follat ihnan et in.
Sabrina Bioc
Do Hamschto
Do Hamschto wor fria olm a simpatischo und hilfsbereito Fiechsmonn. Owo in leschto
Zeit ischa amfoch nimma do olte. Olleweil ischa la ba Moodezeitungen lesn odo er
laft in sein Hamschtoradl die Runde.
Apou sogn, er spourt affa Schianheitsoperation. Di uan Fiicho redn schu blet ibon
Hamschto weil di anzige wos sischt sella kronka Ideen ott isch di Loise, di Umase.
Die sel ott schu fuchzan (15) Operationen mochn gilott und schaug itz wie ana fa de
schiachn Promis aus. Obo do Hamschto findit di Loise soffl schnaidig und er londat
gearn ba ihr. Owo di Loise ott la Augn fi setta Typn wie do Ken, do Monn fa do Barbi.
Bis do Hamschto in Ken glaicht, missata owo no viil mochn lodn. Laido tuta fi di Loise
olls. Do Termin fir seina Operation isch schu gimocht. Nua ischs soweit, er fohrt ins
Spitol und di Ärzte hebn un ba sein Gsicht manondo zi schneidn. Do Homschta isch
betaib deswägn spiirta nix. Owo er ott a letza Wohl gitroffn weil er ott di billigschte OP
ginum, weila et soffl Gelt hot. Bessa war obo giwedn, wenna lenga gschport hett, weil
do Orzt wor et soffl guit ausgibildit und so isch leido do orme Hamschto wernd do
Oparation voschtorbn. Sella Sochn kenn olbm passiern. Also mörkt enk: Sat zifridn
mit dem, wossas hob und wossas seit weil ondra Sochn san fi enk en bestimmp.
Sabrina Bioc
Is Kamäl
Is Kamäl lot sichs olm guit gin. Es leb im Luxus und hot a morz Geld. In seino gruasn
Willa ott s Kamäl is sogn, und do Tiggo und do Löwe missns bedian. Oftatia geats
aus af sella Promifeion. Sem triffts sein Freind is Faulfich. Se isch olm af Trap und
wass olm is noigschte. Is Kamäl ott a Problem, seina Willa stett nebn an risign
Wossofoll und es kannt san dastze iboschwemmt wert. Wegn insem getzin lamma
letz, ettamo is Faulfich dorichtits, is Kamäl auziheiton. Weil in Faulfich is Kamäl
dobormb, loditas afan Urlaub in Italien in, weil hem ott is Kamäl olm schu amo hin
giwellt weil di Pizza und di Schpagetti sotn sem volle schmeckn. In unfong ischs recht
a bäriggo Urlaub, sie schwodl im Meer und wern megabraun in do Sunne. Obo
donna, noch a poor Toge, find is Faulfich a schneidiga Walischa und ott lama Augn fi
di se. Is Kamäl pockts nimma und fort Venedig, hem hupfts fa a Brugge, weils in
Himml will. Obo do hellschte ischs Kamäl a wido et, weil di Bruggn in Venedig san et
huach und deswegn stirbs ett sundon muss la ins Spitol. Sem roschtits itz a Zeitl und
konn gimiatlich lign.
Laura Riva
Die Kroute
Die Kroute isch gorschtig und deswegn mog se aigntlich koano. Si ott lai oan Fraind:
di Floige. In do Floige konn sie olls dozehln, a des, dassze koan Job kriag obwohl se
voll do nette Typ isch. Wenn se sich zin Beispiel als Fotomodll bewirp, weart se glei
ogelehnt. Si findit dassze voll nett isch. Oanmol trifftse in Ox. Do Ox schrait glai und
rennt wek. Volauto dassa rennt kugglta in a Loch.
Die Kroute holt Foschterkung und hilft in Ox ausa zi kemm. Wos learn mir draus: Man
soll Leit (und Vicho) et vom Ausschaugn inschätzn sondon nochn Innoren ( und sem
moan i net di Organe)!
Laura Riva
Do Gaul
Do Gaul mocht an Hufstond und wiehot. In leschto Zeit gfreit in lammano se, suscht
otta foll die Depressionen weil ihn seina Freindin volossn ott. Die schiane Gisella ott
ihn mit an Stier betrogn und otts ihm ettamo gsog. Er hots la ban Stolkn af Whatsapp
gsechn. Noar ottara glei ins Gsicht gsog, dassa des et korrekt findit. Er ott sich ba do
Maus ausgireart und hot se um a Date gibittit, damit ers do Gisella hoamzouln konn.
Sem isch is Maisl ett infostonn, weil sie geat lai mit jemand, wenn er wirklich eppas fi
si empfindit. Tutta obbo et. Deswegn frogga die Mammagei. Diese isch infostonn,
weil do Stier wor ihr Monn und noar konn sis ihm hoamzohln. Zisommen mochnse
Flittowochn und schickn in Stier und do Gisella a Foto und a Postkorte in der steat:
Schöne Grüße aus Paris!
Und s beschte isch: di Mammagei und do Gaul liebn sich wirklich …
Lea Scheiter
Is Oachkatzl und is Flughörnchen
Is Oachkatzl sommlt in Herbischt Nisse und Vorräte fin Winto. Es geat olbn gonz
sporsom domit um, damits jo ginui zessn hot und et vohungert. Obo hoire, jedis Mol
wenns a poor Nisse gfun hot unt in sein Nescht obn in Bam vosteckt hot und la
kurschz weck gett, sanse olla weck. Es konn sich schun denkn worum, des wor sicho
do Ossi. Mitn sem hot s Oachale schun johrelong zi ranggl.
Und totsächlich, bols af do Lauo lig, um in Raba zi schnoppn, kimp is Flughörnchen
Ossi daher. Der weard schun sechn, dassa sich mitn Folschn ungileg hot, denkt sich
s Oachale und fong un, ihn mit saindo Stoanschlaido zi attackiern. Obbo des lot do
Ossi net oanfoch aso af sich sitzn und pockt sein Kloankalibo aus. Do woas sich is
Oachkatzl nimma zi helfn und vosteckt sich in sein Nescht. Obbo schun in negschtn
Tog rächts sich anin Ossi gnadnlos und schneit oanfoch sein Bam mit a Motorsoge
o. „Itz pische zi weit gong“, riaft do Ossi und foirt sein Atomkanone ou de wos is
Oachale la knopp vofahlt hot. Itz hots Oachale di Nose voll unt erklärt in
Flughörnchen in Krieg. Deswegn hom noa olla Oachalan und Flughörnchen gstrietn,
angaling olla Viecho fan Wold und zum Schluss a die Leit.
Asou fong Kriege un.
Lea Scheiter
Is Gliahwirml und do Stinkkäfo
Di Stinkkäfo san mit di Gliahwirmo olbn schun vofeindit giwessn. Ba do Familie fa di
Gliahwirmo gibs di Oma, in Opa, di Mama, in Papa und is Kind, gleich wia ba die
Stinkkäfo. Beada lebnse in Wold glei nebnanondo, obbo sie hom olbn la zi straitn. Ah
di Kindo dissn sich di gonze Zeit, und wenn se sich amo ibbon Wäg laafn, fong se
glei zi ranggl un.
Obbo in Summo, bol di Schuile ferschtig isch, weart ihnan longsom awin longweilig.
In Unfong ischs jo no gong obbo inangaling homsis foscht nimma auskep, folauto et
wissn wos tian. Noa sanse oamo beada zufällig ziglaich awin in Wold gong, filaicht
follt ihnan jo sebn in, wosze tian kennatn. Und noa, währnd se aso di Runde gian und
ihnan longweilig isch, hom se sich tröffn. Obbo is Gliahwirml denkt sich: „Ach, haint
hon i koan Luscht zi streitn, i gea oanfoch normal ban Stinkkäfo vorbai, noa
weartamo wo nix tian.“ Do Stinkkäfo hot sich gidenkt:“ Wenn mi s Gliahwirml haint et
ungraift, noa tui i ihm a nix.“ Und aso gianse baanondo forbei ohne zi streitn, ohne
sich zi dissn und ibohaup ohne a Wort zi sogn. Jedn Tog gianse in Wold und gian
baanondo forbai. Inangaling fong se un zi griaßn und wearn olbn netta zi anondo.
Nua fong se un mitanondo zi spiel und schlussentlich wearnse beschta Frainde.
Asea schiona Gschichte.
Miriam Perkmann
Di Kotzä
Di Kotzä isch a schians schworzis Fich. Sie orbatit in an Hotel und ihr gfollt ihr Lebm
guit. Obbo als se ihr Liabschto volosst, ischse am Bodn zoschtört und vokriacht sich
in ihrem Kotznhaus. Die Kotze wert Alkoholikarin und wert fett wi a Rinouzerus. Do
Hunt hot schun olbm a Auge af sie geworfn, obbo itz gfolltse ihm nimma so guit. Olla
Freinde fa do Kotze homse volossn, lammano do Hund red mit ihr. Er frog se wos los
isch und sie fong un zi rearn. „Jo woasch seit mi mein liabschto volossn hot gets
bergob mit mir.“ Do Hunt isch a suppo Treaschta und sie konn ihm sein Herschts
ausschittn. Zi olln Übbofluss voliart se a no die Orbat, obbo umra a Freide zi mochn,
mochn se zisommen Urlaub in Spanien, do Hunt und di Kotzä. Erschto essnse
Tortillias und nochan tonznse Flamenko und sem merkn se, sie san fianondo
gschoffn. Do Hunt hot die Adoptivelton volorn und woas net wera isch. Donna
schaugnse di Sitti un und kemm sich ollaweil nechna. Di Kotze finds Dubl van Hund
und nochane fennse außa, er isch a kokkaschpaniel. Mitnondo eröffnen se in
Spanien a Flamenko-Tortillias Pub namens FTP und wern stinkreich. Sie bleibm fi
olbm in Spanien und leben glücklich bis an ihr Lebnsende.
Miriam Perkmann
Laisä
Di Laisä faion afn Kopf di Parschti des Johrhunderschts. Se däswegn wail di Kinigin
gstorbm isch und itz sein se a Demokratie. Is pleide isch, ohne die Kinigin konn is
Volk et ibolebm. Wos tion. Währnt sich die Laisä beroutn, gett do Mensch af den die
Laisä sitzn Lunapark und forscht sem Tagada. Die gonzn Laisä werrn ochn giworfn
und die maischtn wiarn zotretn. Die ondon flichtn in die Wäldo unt wohn itz af an
Riesnbam unt san olla glicklich. Obbo lai bis di Pinen kem nochan ischs aus und
vorbei.
Lotte Forer
Is Nilpfert
Es wor amol a Nilpfert, se hot unbedingt ba an Wettbewerp mittian giwellt: Zett-MissSchmolschte-Tailie. Oans hot sichs fescht forginum: zi giwing. Is Nilpfert hot di Oile,
di Psichiatarin, gfrog wie man am beschtn tion kennat. Di se hot gsog: Du terfsch
lamma jedn Togo oan Prot essn!“ Des wor hort. Is Nilpfert hot sich total giplogg, unt
in groaßn Tog wors soffl dinn wia a Fodn. Es hot giwung sogor gegn di Aidexe, die
Giwinnerin fan leschtn Jor. Obbo noch do Sigaerung ischs umgflogn. Es wor zin Glick
la kurz ohnmächtig, obbo pols augiwochn isch, hots sofl giprüllt vor Hungo, dass die
Schürie sich net gitraut hot in Preis - a Sock Prote – länga zi gholtn. S Nilpfert hotse
olla af oamo augfressn unt wor idealgiwichtig. Oans hots voschton: Jedo soll mit sain
Körpo zifridn san unt Dietn helfn sowiso net.
Lotte Forer
Do Fux unt do Roppe
Do Fux hot a wundoschianes Fell ghop unt do Roppe hett a schiana, worma Decke
firn Winto gipraucht. Guita Ideensan seina Sterke. Er hot a Schtikkl Fleisch afn Waia
gilegg unt hot zin Fux xsog: ”Schaug omol afn Waia, sem isch a Schtikkl Fleisch, gea
inne unt hols do!“ Do Fux sig lamma is Fleischschtikkl unt hupft in Waia inne. Obo
laido isch do Waia foscht gfrorn unt do Fux gfiart in. Weila net di gonze Nocht so
pleibm gikennt hot, hotta gimiaßt sein Fell hinte lossn. In nägschtn Tog schaint di
Sunne, do Roppe holt sich in Pelz. Do Fux hot so longe ohne Fell pleibm gimiaßt, bis
is noie giwoxn isch. Unt do Roppe hot sich hinto sein Puggl toat gilocht. Zu schian
terf man a et san.
Joao Pedro Lourenco de Souza
Kevins Ainhorn
Es wor wido a gonz normalo Tog ban Kevin. Er isch in die Schuile gong. Er hot in do
1. Stunde daitsch ghop. Sie hom ibo Sogn giredit. Do Kevin hot ba de Sogn et
wirklich zuikorcht, obo uana fa di Sogn hot ihn volle interessiert.
Es wor amo a Einhorn des hot Konstantinopl ghoaßn unt in Königreich Herenyo
gilep. In Lont fa di Ainhörner. Obo do König wor a Mensch. Konstantinopl wor awin
ondorscht wie di ondon. Er wor olbm glücklich und hot fa nix Ongscht ghop. Di ondon
Ainhörner hom ihn beneidet. Obo do König wor eifosüchtig af seina Gabe. Aines
regnerischen Tages hot do König in Konstantinopel zi sich gholt. „Wos isch König?“
„Konstantinopel! I will deina Gobe hom. Mir wern di morgn ba Bluitmond in Vulkan
opfon.“ Konstantinopel, der fa nix Ongscht hot, hot sich kuana Gedonkn dribo
gimocht. Es kimp di Nocht. Olla schlofn schun außo do Konstantinopel. Er schleicht
sich zin Vulkan. Es isch Bluitmond. Er wortit und wortit. Nix passiert. Wie gsog, sich
auregn isch maischtns umsischt.

Download Report