Sujet: Mitarbaiter nòch Maass
Ganz versteggt, halb verdeggt irgendwo dieff im Wald liggt myy Huus und myy Labor.
Und ass mer kaine kunnt und myy Ghaimniss entdeggt, han ych yysigi Diire dervor.
Sie kenne doch sicher dr Franggestai und syy Gschèpf mit em kantige Gsicht?
Nai, dr Langi in dr Dischpo main y grad nit, dass isch ganz e anderi Gschicht.
Dr Franggestai het me ganz elai, z’Nacht iber e Friidhoof schlyyche see,
und är heb mee wie ain umme Egge bròòcht, denn hets halt d’Autibaan no nit gee!
Und bivòòr sich jetz èpper fir e Unfall interessiert, han ych denne d’Lyyche scho klaut,
die wärde sorgfältig im Käller versteggt, do dervo wärde denn myyni Chauffeure baut.
Ganz individuell und hoch aktuell, jede Wunsch wird erfillt, kai Problem!
Sii wänd lèngeri Ärm fir e Meebel-Transport? Fir mii isch gar nyt z’extrem!
Ych mach iihne e Waggis vo dr edlere Art, dä faart zwòòr nur Dresden, jo guet,
oder fir suuberi Faarzyyg e Sondermodäll, wo schuurig gärn bùtze duet.
Fir e Export oder fir Felix Transport, schruube ych rächts maischt e Bleifuess dra,
und zem demonschtriere, wie wyt me ka goo, ka me s’Modäll ‘’Rönne’’ au als Nichtraucher ha.
D’Läbere, d’Niere, s’Härz und no mee, mach ych nur no uss Kunschtstoff und Kitt,
das verringeret nämlig dr Uffwand seer, Ersatzdaili griege Sii mit.
Laider, isch’s wòòr, s’isch ùnder de Hòòr no zimmlig hool, das nur so als Tip,
denn s’Dängge, wenn mes so nenne will, erledigt e 8 Giga Micro-Chip.
Iber USB schliesse Sii s’Flottesyschtem aa und vyylicht e Navi derzue,
dernoo staarte Sii’s App und dä macht si Biez, Sii aber händ dr ganzi Daag Rueh.
Aber ganz verreggt isch’s neyschte Projeggt, ych baue doch aine mit Hirni, Sii, das goot!
Wenn Sii drei vo deene nämme, s’isch grandios, händ Sii grad no e Chauffeure-Root!
Die stregge Kèpfli denn zämme, blaiderle e bitz und kenne allefalls sogar no schryybe,
verändere dien die natyrlig nit viel, mir wänd’s jo nit grad iberdryybe!
S’isch mer unaageem, es git au Probleem, wie bi däm, won ych ‘’Gerry’’ ha tauft
dä blyybt nämlig allewyyl boggstyff stoo wenn irgendwo e Schildkrott umme lauft!
S’Modäll ‘’Olivier’’, ych han en us Ziircher gmacht, und mängmool, do flippt er drum uss,
z’Problem isch denn aber maischtens schnäll behoobe, s’isch aifach e Sicherig duss.
Au bim ‘’Tschanne’’ git’s Panne, s’Glyychgwicht stimmt nit, drum isch är vom Kaare gflooge,
dr ‘’Steffen’’, dr ‘’Dédé’’ und dr ‘’Hùsi’’ grad au, die händ sich alli d’Knoche verbooge.
Ych han drumm lang dodriiber nooche dänggt und han’s denn uusegfunde,
han e App installiert, wo das korrigiert, bim lande blyybe d’Haxe jetz unde.
S’isch laider esoo, Zyyt bliibt nit stoo, s’Alter bliibt au do nit verborge,
wel sich als wie mee het Patina aagsetzt, hän mer dr ‘’Willi’’ drum miesse entsorge!
Wo denn dr Nötzli duet fääle, do han ych’s probiert und verglèmmi mit knorze goots au,
han fir Buechhaltig eppis bäschelet, won y zwòòr nit verstand, wel s’erschtmool isch es e Frau!
Ych bitt Sii um Diskretion, ych bi dr Änggelsoon, Franggestai in dr vierte Generation!
Dr Urgossbabbe wär uss em Hyysli vor Fraid, ych vollände sini Vision!
Nòch dr Karriere kunnt jetz mii Hobby zem Zug und drum, miini Liebe, liggts uff dr Hand:
Dr Laschterwaggis sait «Adie mitnand» und goot in Ruhestand!
Y glaub 13 Joor han y jetz mit viel Fraid g’läschteret, zindet und gschtichlet, aber am maischte Spass han y
allewyl a däm Versteggspiili gha. Liebs Felix Team, hebet Sorg und händs guet! Adie!
Ych han grad no vernoo, e neye Bangg segg schyyns koo! Mues saage, find y guet e so!!