Schipp to Wiehnachten. As ick bi denn Bootshändler in Wedel

Schipp to Wiehnachten.
As ick bi denn Bootshändler in Wedel anstillt wür, müss ick een Sommerdag mit `n
Mann un Fro ut Köln Proovseiln mit `n 32 Foot Motorseiler rund Lühsand moken.
Dorbi föll mi up, dat se woll dat seggen har.
As wü no de Prooftur wedder an Land würn, het se sick bannich bedankt un ick kreeg
ok noch `n Drinkgild von eer. He sää nich veel.
Poor Weken looter säh de Boos to mi – De hebt son Schipp bestillt un dat schass Du
Wiehnachtenobend Klock 3 in Monikendamm op de Warft utleebern, de Mann kricht
dat von eer a`s Wiehnachtgeschink-.
Ick heb denn blots noch frogt, ob man dat Schipp nich all vörher dor hinlebern kunn?
Nee säh he, ick schull Wiehnachten Obend Klock 3 mit dat Schipp dor ankomen, dor
har se up bestohn.
Bi uns Firmo güng dat no dat Motto -Un wenn se Kononen an Deck hebben wölt,
krigt se de-.
Dat Schipp wür 5 Doog vör Wiehnachten in Henan up Orust bi Chrischon Rassy klor
ton uploden säh de Boos, bestill Di man rechtiedig bi de Stena Line de Fohrkorten
von Fredikshavn no Gotenborg un wedder trück.
Vor de Hintur mit den leddigen Sattelzug wür dat keen Problem, ober vör de
Trückreis, müss ick mit dat ganze Geschütz a`s letzten up de Fähr un ok noch int
Middel stohn wegen de Heuchte.
Dat wüssen se ober all bi Stena un a`s ick de Fohrkorten bestilln däh, säh de
Fohrkortenverkäuper- Büst Du ok mol wedder bi uns an Buurd?-.
No je, ick denn 8 Doog vör Wiehnachtenobend no Henan, wo ick 6 Doog vör
Wiehnachtenobend ankeem, wobi dat so sinnig sneen däh.
A`s wü dat Schipp, wat `n Kielschipp wür un in son passenden Buck stünd uploden
dähn, (`n Kroon geef dat tomols noch nich, dat güng aal mit Smeerküssens und
Duunkraften) füng dat bannig an to Sneen, kunst bald de Hand nich mihr vör Oogen
sähn. Dat het dor i`n poor Stünds Tied `n halben Meter Snee bröcht.
Ick heb denn irstmol mien Sneekeeden uplegt, vonier dat von de Warft recht wat
bargup no de Stroot hin güng. De ganze Krom wür 4,08 Meter hoch un dat mierste
Gewicht, wür 2,50 Meter öber denn Upligger. In de Breede wür dat man n Beeten
öber 3 Meter . Wür jümmer `n viegeliensche Fohrere mit de Ort Scheepen, kunst
nich mol eben so mit üm de Eck fohrn.
As wü dat a`l klor harn, sneete dat jümmer noch vodull, kunst keen 5 Meter vörn
Wogen kieken. Chrischon Rassy is mit sein privot Auto vörweg fohrt bit no
Gotenburg an de Fähr. Dor heb ich ierstmol de Sneekeden affnohmen.
A`s ick den in Frederikshavn ankähm, heb ick mi denn so sinnig dör Dänemark un
Dütschland no Holland hin musselt, a`s son Lokomotivführer, de ton faste
Klockentied in Bohnhoff ween müss.
Up `n Punkt Klock Dree keem ick denn in Monikendamm bi de Warft an ( dor wür
ick in Sommer all miermols mit Scheepen wesen).
Toierst keem de Boos ut der Dör un seh gooden Dag, dorbi griente he vodull.
Denn keem de nee Eegner un sie Froo und se seh to em – Das ist Dein
Weihnachtsgeschenk- De Mann het gornix miehr segt.
A`s wü dat Schipp afflood harn geef dat ierstmol Kaffee un Koken un ick kreeg so
sinnig von der Froo `n dickes Breefkuvert in de Hand drückt, dorbi säh se glieks, dat
se dat all mit mien Boos besnackt har, dat ick in Freuhjor, wenn dat Schipp to Woter
käm, dat dor klormoken un mit Jüm noch Proofseiln müss.
Ick kreeg denn noch `n Tüt mit Koken von den Boos sein Froo mit un denn güng de
Reis dör de Wiehnachtsnacht wedder no Hus. Ick wür denn an 1. Wiehnachtsdag
gegen Middag wedder bie Hus.
Wiehnachtenobend hebt wü denn to Huus no holt un in dat Breefkuvert wür `n
scheunen Wiehnachten vör mi in.
Hein Eylmann

Download Report