Necrolog Ida Columberg-Nay, Mustér (*18.8.1945 – †09-11-2014) Necrolog d’Erwin Ardüser Radio Rumantsch 10-11-2014 L’onn passà ha la Televisiun Rumantscha festivà l’anniversari da 50 onns dapi che sia emprima emissiun è ida sur l’emettur. Bunamain dapi l’entschatta è era Ida Columberg, naschida Nay, stada engaschada sco collavuratura da la Televisiun Rumantscha. Sia carriera cumenza 1965. Il “Balcun Tort” duvrava ina nova moderatura. Dunna Ida è sa preschentada per la plazza tar Tista Murk ch’era da lez temp manader dal post da programs dal radio e da la televisiun rumantscha. Avant bun in onn – en connex cun il giubileum 50 onns Televisiun Rumantscha – è dunna Ida sa regurdada da quai temp. Sco ella ha raquintà ha ella stuì spetgar suenter l’emprim discurs passa 1 onn avant ch’ella ha survegnì la resposta positiva. Curt suenter, il schaner 1967, preschenta ella lura per l’emprima giada il Balcun Tort, e l’onn 1968 è ella ina da las 4 moderaturas ch’è preschenta en ina emissiun tut speziala. Quella che ha dà l’entschatta a las emissiuns en colur da la Televisiun svizra. Fin viaden ils onns 80a ves’ins l’Ida da la televisiun – sco ella vegniva era numnada – sco moderatura da las emissiuns da la dumengia da la Televisiun Rumantscha: Il Balcun Tort e pli tard la Svizra rumantscha, medemamain – e quai fin la fin dals onns 1990 – è ella ina da las moderaturas da l’ “Istorgina da buna notg”. Il favrer 2013 ha il Radio Rumantsch laschà vegnir a pled Ida Columberg-Nay en ina da las emissiuns da giubileum da la Televisiun Rumantscha. E là ha ella tranter auter era raquintà d’in cumpliment ch’ella udiva bainduras sch’ella vegniva pledentada sin via: “Tgei bi che ti eis stada en stiva tier mei ...”
© Copyright 2024 ExpyDoc
